လှာဒကှ်၊ အဝ်ဂတ် ၂၆
အပ္ဍဲတွဵုရးကရေၚ် ပွိုၚ်ဍုၚ်လှာဒကှ် သ္ကုတ်ဂၠံၚ် လှာဒကှ် – ကျာ်ပိ ဟိုတ်နူဗြဲဂူရိုပ်ထတ် ဍာ်ၜဳဟဇၞော်တိုန်ကၠုၚ်တုဲ ကွဳစက်လၟိဟ်ကၠံပြၚ် ကၟာတ်ဆိုအ်အာရဂှ် ညးဒေသတံ ဟီုလဴကဵု ဌာန်ပရိုၚ် – သြၚ်လောန်တိုၚ်မ်ရ။
စနူဂိတုအဝ်ဂတ် ၂၀ လောန်ကၠုၚ်တေံတုဲ ဟိုတ်နူဗြဲဂူရိုပ်ထတ်မံၚ် ဍာ်ၜဳဆက်သၠုၚ်တိုန်မံၚ်တုဲ ပ္ဍဲသ္ကုတ်ဂၠံၚ် လှာဒကှ် – ကျာ်ပိ အကြာသ္ကုတ်ဂၠံၚ် ကွာန်လိုၚ်ကၞုဲ၊ လှာခဍး၊ ကွာန်ဒဵုထောၚ်တံဂှ် ဍာ်သၠုၚ်တိုန်အာလတူဂၠံၚ်ကွဳစက် စနူ ၃ ပေ စဵုကဵုစိုပ် ၄ ပေ ဒှ်အာရ။
ဟိုတ်နူဍာ်ဇၞော်တိုန်ဒၟံၚ်တုဲ ပ္ဍဲသ္ကုတ်ဂၠံၚ် လှာဒကှ် – ကျာ်ပိ ကွဳစက်တိုန်စှ်ေ လၟိဟ် ၁၀၀ မပြၚ်ၚ်တံ ကၟာတ်ဆိုအ်မံၚ်ၜိုတ် ၅ တ္ၚဲဒှ်ကၠုၚ်တုဲ ဆက်အာလေဝ်ဟွံဂွံ ကလေၚ်ဆုတ်လေဝ်ဟွံဂွံ ဒှ်မံၚ်အိုတ်ရောၚ်။
အခိၚ်လၟုဟ်ဏံတှ်ေ သၟာဒဳကွဳစက်ကေုာံ ညးအာတရဴလ္ၚဵုတံဂှ် ကဵုသြန်တုဲ ဒးဖန်ဇန်ရာန်စသုၚ်မံၚ် ပ္ဍဲဆေၚ်ဖျာဗဒါဲတံဂှ်တုဲ အခိၚ်ဗ္တံ မ္ဂးဒးအာဇူဒီုမံၚ် ပ္ဍဲကဵုဘာလကျာ်တံရ။
ဟိုတ်နူဗြဲဂူဆက် လတူဂၠံၚ်ကွဳစက်ဍာ်ထပ်သၠုၚ်တိုန်အာတုဲ ဒှ်မံၚ်အခိၚ်တ္ၚဲဍာ်ကတဵုကီုဂှ်ရ ဒးထပ်ဆဵုဂဗအာကဵု ဘဲအန္တရာဲဍာ်ဇၞော် တိုန်မာန်ပၠန်ရောၚ် ညးဒေသတံဟီုရ။
အပ္ဍဲဂိတုအဝ်ဂတ် ၂၁ လောန်ကၠုၚ်တေံလေဝ် အခိၚ်ဍာ်ဇၞော်တိုန်ဒၟံၚ်ဂှ် ဂၠုၚ်စက်မွဲဖ္ဍိုက် ရဲအာတရဴပါ ၁၁ တၠ အခိၚ်တတ်အာ ကၟာအၚ်လိုၚ်ကၞုဲဂှ် ဂၠုၚ်ဟကပ်အာကီုလေဝ် ရဲအာတရဴ သီုဖအိုတ်ဂှ် ညးဒေသတံ ဟံၚ်ပြာ်ဂွံဏာ ဂျိုၚ်ၚ်ရ။
ပရိုၚ် – သြၚ်လောန်တိုၚ်မ်
Photo – Social Media