ဘာအၚ်၊ အဝ်ဂတ် ၂၆
အပ္ဍဲတွဵုရးကရေၚ် ဍုၚ်ဘာအၚ် ဟိုတ်နူဆေၚ်သွံကၠေၚ်ဇၞော်ဇၞော်တံ သွံကဵုမံၚ်ကၠေၚ်စက် နကဵုသၞောတ်ဗ္ၜတ်ပိုၚ်ခြာလဝ်တုဲ သွက်သ္ဂောံရာန်ကၠေၚ်စက်ဂှ် ဒှ်ကၠုၚ်မံၚ်အခက်ခဲ ဒးအာပြေၚ်ရေၚ် မၚ်ရာန်မံၚ်အခိၚ်လအ်လတံ ကလေၚ်ဒှ်မံၚ်ပၠန်ရောၚ် ညးဒေသတံဟီုတုဲ ဂွံတီရ။
ဟိုတ်နူ အလဵုအသဳပၞာန် ယှအ်ဖျေံထောံသၞောတ်ဗ္ၜတ် လၟိဟ်ကၠေၚ်စက်တုဲ စနူအဝ်ဂတ်လဒေါဝ်ဂိတုဏံ ကၠေၚ်စက် ကလေၚ်ပိုတ်အာဂှ်ကီု ဆေၚ်သွံကၠေၚ်ဇၞော်ဇၞော် ပ္ဍဲဍုၚ်ဘာအၚ်တံဂှ် ကလေၚ်သွံကဵုမံၚ်နကဵုသၞောတ်ဗ္ၜတ်ပိုၚ်ခြာလဝ်တုဲ ဒးမၚ်ရာန်ကေတ်မံၚ်အခိၚ်လအ်လရောၚ်။
ပ္ဍဲဍုၚ်ဘာအၚ်ဂှ် ကွဳစက်ဖ္ဍိုက်ကၠေၚ်စိုပ်ကၠုၚ်မှ ဆေၚ်သွံကၠေၚ်ဇၞော်ဇၞော်တံ သွံကဵုတုဲ သွက်သ္ဂောံဂွံကၠေၚ်စက် မာန်ဂှ် ညးဒေသတံ ဒးပြေၚ်ရေၚ်ရာန်ကေတ်မံၚ်အခိၚ်လအ်လကီု ပ္ဍဲဆေၚ်သွံကၠေၚ်စက်ဇၞော်တံဂှ် ကၠေၚ်လေဝ်ဟၟဲကီုတုဲ အခိၚ်ကၟာတ်လဝ်ဆေၚ်ဂှ်ဂၠိုၚ်မံၚ်ရောၚ် ညးဒေသတံ ဟီုရ။
ပ္ဍဲဂိတုအဝ်ဂတ် ၂၅ နူကမ္မတဳပရေၚ်ကောပ်ကာဲ ကမၠောန်ပၠုပ်တြး ခြိုၚ်သွံကၠေၚ်စက် အလဵုအသဳပၞာန်တံ အတိုၚ်လလောၚ်တြးလဝ်မ္ဂး အပ္ဍဲဍုၚ်ဘာအၚ် တွဵုရးကရေၚ်ဂှ် ကၠေၚ်ဓာတ် 92 မွဲလေတ် ၃၆၈၅ ဒ္ကေဝ်၊ 95 ဂှ် မွဲလေတ် ၃၈၀၀ ဒ္ကေဝ် ၚုဟ်တန်လဝ်ရောၚ် ထမံက်ထ္ၜးလဝ်ရ။
ဟိုတ်နူၚုဟ်မးကၠေၚ်စက် ခုတ်ပိုၚ်ခြာတန်လဝ်ဗီုဏံတုဲ မၞိဟ်တံ ဒးအာမၚ်ရေၚ်ကေတ်မံၚ် ပ္ဍဲကဵုဆေၚ်ကၠေၚ်စက်ဇၞော်ဇၞော်တံကီု ပ္ဍဲဗွိုၚ်ဆေၚ်မ္ၚးမ္ၚးတံဂှ်တှ်ေ မွဲလေတ် ၁၀၀၀၀ ဒကေဝ် ပတိုန်လဝ်ၚုဟ်မးနွံတုဲ ညးဒေသတံဒးဆက်ရာန် စကာအာမံၚ် ၚုဟ်သၠုၚ်ၚ်ရောၚ် ညးဒေသတံ သ္ဂးရ။
အတိုၚ်ညးဒေသတံဟီုမ္ဂး ကၠေၚ်စက်ပါ်ကဵု သွက်ဆေၚ်သွံကၠေၚ်ဇၞော်ဇၞော်တံဂှ် သွက်ညးဒေသတံဂွံစကာ သွံကဵုမံၚ်ညိညဓဝ်နွံတုဲ ကၠေၚ်စက်ဗွဲမဂၠိုၚ်တံဂှ်တှ်ေ သွံဏာလပါ်ဗွိုၚ်ဆေၚ်မ္ၚးတံဂၠိုၚ်မံၚ်ရောၚ် ပရေၚ်ပါ်ပါဲဟီုဂးတံ နွံရ။
ပ္ဍဲတွဵုရးကရေၚ် ဟိုတ်နူကၠေၚ်စက်ပိုတ်၊ ရာန်ကေတ်အတိုၚ်ပၟိက်စိုတ်ဟွံဂွံ သီုကဵုဒးရာန်ကေတ်မံၚ်နူကဵုဗွိုၚ်ဆေၚ်မ္ၚး ၚုဟ်မးသၠုၚ်သၠုၚ်တုဲ ညးဒေသတံဒးဆဵုဂဗမံၚ်ကဵု ၚုဟ်မးကပေါတ်စၞစသုၚ်သ္ဇိုၚ် သ္ရု၊ ကသိုန်၊ အာလူ၊ ခၟာဲစာၚ်တံကဵု ပရေၚ်အာကၠုၚ်တံ ၚုဟ်မးသၠုၚ်တိုန် အာမံၚ် သီုဖအိုတ်ရောၚ်။
ပရိုၚ် – သြၚ်လောန်တိုၚ်မ်
Photo – CJ