ပ္ဍဲကဵုပရေၚ်ပန်ပှော် သၞေဟ်ကွဳစက်တိုန်ဒဵုကျာ်ဣသိယဵုဂှ် သ္ကိုပ်ဝန်ဇၞော် တွဵုရးမန် မဒးဒုၚ်ရပ်ဒက်ဂှ်ကဵု ညးမစုတိအာလ္ၚဵုတံ ပါလုပ်ဆက်စပ်ဒၟံၚ်ရောၚ် ကံၚ်ဇြဳပၞာန် တြးဝါဒ

မတ်မလီု၊ နဝ်ဝေမ်ဗာ (၂)

ပ္ဍဲကဵုပရေၚ်ပန်ပှော် သၞေဟ်ကွဳစက်တိုန်ဒဵုကျာ်ဣသိယဵု မၞုံပွိုၚ်ဍုၚ်ကျာ်ထဝ်၊ တွဵုရးဍုၚ်မန်ဂှ် သ္ကိုပ်ဝန်ဇၞော် တွဵုရးဍုၚ်မန် ဒံက်တာအေဇြာန် မဒးဒုၚ်ရပ်ဒက်ဂှ်ကဵု ညးမစုတိအာလ္ၚဵုတံ နူကဵုဒပ်မဟာ (၁) KNU တံလေဝ် ပါလုပ်ဆက်စပ်ဒၟံၚ်ရောၚ် ကံၚ်ဇြဳပၞာန် တြးကၠုၚ်ဝါဒ ပ္ဍဲဂိတုအံက်တဝ်ဗာ (၃၁) တေံရ။

ပ္ဍဲကဵုပရေၚ်ပန်ပှော် သၞေဟ်ကၚ်စၟဳစၟတ်ကံၚ်ဇြဳပၞာန် မၞုံသၞေဟ်ကွဳစက်တိုန်ဒဵု ကျာ်ဣသိယဵု မက္တဵုဒှ်လဝ် ပ္ဍဲဂိတုအံက်တဝ်ဗာ (၁၂) တုဲကၠုၚ်တေံဂှ် သ္ကိုပ်ဒပ်မဟာ နူဒပ်မဟာ (၁) KNU ဂအုပ်သ္ကိုပ်ဗိုလ်သဝ်ပလေအ် ကေုာံ အမာတ် NLD ဒေသၜဳကလေၚ် ဥူကျဝ်မျဵုမေန် မစုတိအာတုဲတုဲတံ ပါလုပ်ဆက်စပ်ဒၟံၚ်ဂးတုဲ ကံၚ်ဇြဳပၞာန် လလောၚ်ပ္တိတ်ကၠုၚ် အဆက်အကြာညးတံ မွဲကရောံကဵု ဗီုဓာတ်တံရ။

ပ္ဍဲကဵုညးၜါတၠဏံဂှ် သ္ကိုပ်ဒပ်မဟာ ဒပ်မဟာ(၁) KNU ဂအုပ်သ္ကိုပ်ဗိုလ် သဝ်ပလေအ်ဝွံ ဒှ်ညးမစုတိအာ နကဵုဂိယဲ ဆီၜေတ် အပ္ဍဲဂိတုအဝ်ဂါတ်တေံတုဲ အမာတ် NLD ဒေသၜဳကလေၚ် ဥူကျဝ်မျဵုမေန်ဂှ်လေဝ် ဟိုတ်နူဒပ်ကံၚ်ဇြဳပၞာန်တံ ရပ်ဒက်ဂစိုတ်လဝ်ဂှ်ရ တုဲကၠုၚ်ဂိတုဂျောန် (၂၂) တေံ ဒးချိုတ်အာလဝ်ရ။

သ္ကိုပ်ဝန်ဇၞော် တွဵုရးဍုၚ်မန် ဒံက်တာအေဇြာန် မဒးဒုၚ်ရပ်ဒက်ဖျေံလဝ်ထံၚ် နူစဒပ်ပၞာန်သီအဝဵုတေံဂှ်လေဝ် ဒှ်ညးပါလုပ်ဆက်စပ် ပ္ဍဲလၟေၚ်ဒဒှ်ပန်ပှော် ကျာ်ဣသိယဵုဂှ်ဂးတုဲ လ္ပာ်ကံၚ်ဇြဳပၞာန် လလောၚ်ပ္တိတ်ကၠုၚ်လဝ်ရ။

သ္အာၚ်နူဂှ်ပၠန် ကုဒဝ်သဳရဳရတနာ အမာတ် NLD ဒေသၜဳကလေၚ် မဒးဂြိပ်ဒဴပါဲဒလေတ်ဒၟံၚ် ဒၟါနူဒပ်ကံၚ်ဇြဳပၞာန်တံ ဗက်ရပ်ဒက်ဒၟံၚ်ဂှ်ကီု၊ အမာတ် NLD တြေံ ဥူအံၚ်ကျဝ် ကေုာံ ဥက္ကဌဗော် NLD တွဵုရးမန် ဒံက်တာခေန်သံၚ်တံလေဝ် ဒှ်ညးပါလုပ်ဆက်စပ် ပ္ဍဲပရေၚ်ပန်ပှော်ကျာ်ဣသိယဵုဂှ်ဂးတုဲ ထ္မံက်ထ္ၜးလဝ်ရ။

ညးဒုၚ်တာလျိုၚ် PDF ခရိုၚ်သဓီု ကိုဝ်ဨမေန်ထောန်ဂှ် ပ္ဍဲကဵုတၚ်လလောၚ်တြး ကံၚ်ဇြဳပၞာန်ဂှ် စုတ်လဝ်မၞိဟ် မစုတိအာတုဲတုဲတံ ပ္ဍဲကဵုလၟေၚ်ဒဒှ်ဏံဂှ်ဝွံ ဒှ်သဘဴတြးဝါဒ ညံၚ်ဂွံဒှ်ဗီုပြၚ် NLD, KNU/KNLA ကေုာံ PDF တံ ပံၚ်ကောံတုဲ ဂစိုတ်ဒၟံၚ် ညးဍုၚ်ကွာန်တံရောၚ်ဂှ် သ္ဂးရ။

“ဍာံဍာံဂှ် ကၟာတ်ကၠေံဒုဟ်ဍေံတံရ၊ ကၟာတ်ထောံဒုဟ်တံဏံ ဂွံဟာဂးတုဲ ကၠောန်သ္ပလဝ်ရ၊ NLD, PDF , KNU/KNLA တံ ပံၚ်တောဲတုဲ ဂစိုတ်ဒၟံၚ် ကောန်ဍုၚ်ကွာန်တံလၟိုန် ညံၚ်ဂွံဒှ်ဗီုပြၚ်သာ်ဏံဂှ် တက်ပၠောပ်ဒၟံၚ် ပ္ဍဲကတောဝ်ညးဍုၚ်ကွာန်တံရ၊ ဆ္ဂး ညးဍုၚ်ကွာန်ဗွဲမဂၠိုၚ်ဂှ်တှ်ေ ဒဒှ်ကံၚ်ဇြဳပၞာန်ဂှ် တီမံၚ်တုဲတုဲရ၊ လၟုဟ်ဟီုမ္ဂး မၞိဟ်ဟွံမွဲရတံဂှ် ဍေံတံစုတ်တုဲ လလောၚ်ပ္တိတ်လဝ်ဂှ်တှ်ေ ဗၠေတ်ဒၟံၚ်တၟာဂလိုၚ်ယျ၊ ရံၚ်အာမဏံမ္ဂး နကဵုညးဍုၚ်ကွာန်တံ ကလေၚ်သ္ၚဳဂၠိပ်ကေတ် မွဲရ၊ ပ္ဍဲကဵုလၟေၚ်ဒဒှ် ဂြိုပ်ကပေါဝ် (ကၚ်းမွန်းချောၚ်း) ဂှ် ညးကၠုၚ်လ္ၚောဝ်ကျာ်တံ ကလိဂွံအာဝပ် တၟာဂလိုၚ်ရ၊ ညးဍုၚ်ကွာန်တံ ဂွံအာဝပ်တုဲ သီုကဵုဒးချိုတ်အာရ၊ လၟေၚ်ဒဒှ်ဏံကဵု ဍေံတံမလီဠာန်ဒၟံၚ်လၟုဟ်ဂှ်မ္ဂး တော်ရံၚ်ကေတ်ရလေဝ်၊ ဒးကလေၚ်သ္ၚဳဂၠိပ်လၟေၚ်ဒဒှ်ဏံမ္ဂး ဍေံတံ ပန်ပှော်လဝ်ဟီုဂှ် သာတုဲခိုၚ်ကၠိုက်အာရ” ဂှ် ညးသ္ဂးရ။

ဒပ်ကံၚ်ဇြဳပၞာန်ဝွံ ပပ္တံနူ အခိၚ်သီအဝဵုကၟိန်ဍုၚ်တုဲဂှ် ရပ်စပ်စကာကၠုၚ် ဌာန်ပရိုၚ်ရုပ်ရမျာၚ်ကၟိန်ဍုၚ်ပိုၚ်တံ၊ မုက်လိက်ဇာဇၞိက်ပရေၚ်မၞိဟ်တံ ကေုာံ လိက်ပရိုၚ်တံ နဒဒှ်ဒၞါဲတြးဝါဒ သၠဲသၠဲလးလးရ။

ဆ္ဂး ပရိုၚ်ဗၠေတ်တ် တၠအဝဵုအဆက်က်တံ မစကာရပ်စပ်ကၠုၚ်တံဂှ်ဝွံ အခိၚ် (၂၁) ဗွဝ်ကၠံ ဂၠးတိဒှ်ကွာန်ဏံဂှ် ညးဍုၚ်ကွာန်တံ ဓဝ်ပတှ်ေဟွံမွဲကၠုၚ်တုဲ လ္ပာ်ကမ္ပဏဳသဵုယှေဝ်မဳဒဳယျာတံလေဝ် ပလှ်ဖျေံကၠုၚ်ဒၟံၚ် မပ္တံကဵု ချာန်နေဝ်၊ မုက်လိက် တြးဝါဒကံၚ်ဇြဳပၞာန်တံဂှ်ကီုရ။

အ္စာလိက်ပရိုၚ်ဝှ်ကြံၚ်မွဲတၠဂှ်လေဝ် ကံၚ်ဇြဳပၞာန် တြးကၠုၚ်ဝါဒ ကုညးမစုတိအာတုဲတုဲတံကဵု ညးဟွံဆက်စပ်တိုက်ရိုက်တံဂှ်ဝွံ ဒဒှ်ရထ္ၜးဒၟံၚ် ဍာ်ဒ္ကေဝ်ဟွံမွဲဂှ် သ္ၚဳဂၠိပ်လဝ်ရ။

“စုတ်ကၠုၚ် မၞိဟ်မချိုတ်အာ တုဲတုဲတံ မွဲပၠန်တှ်ေ ညးဟွံဆက်စပ် တိုက်ရိုက်တံ ပ္ဍဲကဵုသတ်ဇာတ်တြးဝါဒ သာ်ဏံတံတုဲ ချူတြးဒၟံၚ်ဟီုဂှ် နူကဵုကံၚ်ဇြဳပၞာန်တံ မတြးဒၟံၚ်ဝါဒဂှ်ဝွံ ၜိုတ်လဵု ဍာ်ဒ္ကေဝ်ဟွံမွဲ ကဆံၚ်သဝ်ကၠုၚ်ဒၟံၚ်ဂှ် ထ္ၜးပျးဒၟံၚ်ဂှ် ဂွံညာတ်ကေတ်ရ၊ ပ္ဍဲအရာလလောၚ်ပရိုၚ်တံ၊ ကိစ္စစပ်ကဵု ပရိုၚ်တံဂှ်လေဝ် ပရိုၚ်မဳဒဳယျာတံ အခေါၚ်သၟာန်သၟုက်ဂွံ ဟွံမွဲဒၟံၚ်ပုဟ်၊ ရပ်ဒက်ဒၟံၚ်သၟာပရိုၚ်မဳဒဳယျာတံတုဲ စပ်ကဵုသၟာန် နူပရိုၚ်မဳဒဳယျာတံဂှ်လေဝ် အခိၚ်လဵုမှ ဒုၚ်တဲမာန်ဂှ် ဟွံမွဲလဝ်ပုဟ်၊ အတိုၚ်ဍေံတံ ဖန်ဗဒှ်လဝ်၊ တေက်လဝ်ဇာတ်တံဂှ်ရ လလောၚ်ပ္တိတ်ဒၟံၚ်အိုတ်၊ ရန်တၟံကဵု မၞိဟ်မတှ်ေလ္ၚဵုတံဂှ်တုဲ လလောၚ်တြးဒၟံၚ်ရောၚ်ဂှ် ချိၚ်ခယျကေတ်ရ” သာ်ဝွံ ညးသ္ဂးရ။

ဗော်သွးကောန်ဂကူကရေၚ် KNU ဗဟဵုဂှ် ညးဍုၚ်ကွာန်အာလ္ၚောဝ်ကျာ်လ္ၚဵုတံ ဇီုကပိုက်ချိုတ်အာလဝ် အပ္ဍဲပရေၚ်ပန်ပှော် သၞေဟ်ကွဳစက်တိုန်ဒဵုကျာ်ဣသိယဵုဂှ်ဝွံ ဒၟါနူကောန်ဒပ်ကံၚ်ဇြဳပၞာန်တံ ပန်ပှော်လဝ် ကြာန်န် မဒှ်တဴရဂှ် တုဲကၠုၚ်ဂိတုအံက်တဝ်ဗာ (၁၄) တေံ လလောၚ်ပ္တိတ်လဝ်ရ။

အပ္ဍဲပရေၚ်ဗ္တိုက်ၜါလ္ပာ်တံဂှ် နူလ္ပာ်ကံၚ်ဇြဳပၞာန် ပန်ပှော်လဝ် လွဟ်လက်နက်ဇၞော်၊ လွဟ်လက်နက်ဍောတ်တံ ကြာန်န်တုဲ ကၟုဲလ္ၚောဝ်ကျာ် ညးဗြဴ (၃) တၠ ဒးကမ်သေနာတ် ချိုတ်အာလဝ်တုဲ (၁၃) တၠ ကလိဂွံလဝ်ဝပ်ဂှ် KNLA သ္ဂးလဝ်ရ။

ကံၚ်ဇြဳပၞာန်ဂှ် ပရေၚ်ဗ္တိုက်ဏံဂှ်ဝွံ ဂကောံ PDF သၟဝ်တဲဒပ်မဟာ (၁) KNLA ကေုာံ NUG, CRPH တံ ဟိုတ်ဟွံမွဲ ပန်ပှော်လဝ် လွဟ်ဇၞော်ဍောတ်တံဂှ်တုဲ ညးဍုၚ်ကွာန်အာလ္ၚောဝ်ကျာ် (၃) တၠ ချိုတ်တုဲ (၁၉) တၠ ကလိဂွံလဝ်ဝပ်ဂှ် လလောၚ်ပ္တိတ်လဝ်ရ။ ပရိုၚ်−သြၚ်လောန်တိုၚ်(မ်)