ဝါယှေန်တာန်၊ အဝ်ဂတ် ၂၇
ဂကောံအလဵုအသဳ သမ္မတအမေရိကာန် ဒဝ်နေဝ်ထရ ပရေၚ်ချိၚ်ကဵုတ္ၚဲ အေန်တာဗျူ သွက်ညး ပတိုန်ထ္ၜး ဗဳဇာအခေါင်ဆုဲပြံၚ်မံၚ်စံၚ် နူအလုံဂၠးကဝ် သွက်သ္ဂောံမံၚ်စံၚ်တန်တဴအာလၟိုန် ပ္ဍဲရးနိဂီုအမေရိကာန်ဂှ် ဒေါအ်ဇူထောံ ဗွဲယာယဳရ။
ပရေၚ်ဒေါအ်ဇူဗီုဏံဂှ်တှ်ေ ပ္ဍဲလက်ထက်အလဵုအသဳထရ မရနုက်ကဵု ဒုတိယဝါဏံ ကၠောန်ကရေပ်ဓရတ်ကောပ်ကာဲအာမံၚ် ပရေၚ်လုပ်တိတ်လဝက ကေုာံ ပရေၚ်ကလေၚ်ထဍေၚ်ဘာတ်ပတိတ်ထောံနူဍုၚ်တံ က္တဵုဒှ်ကၠုၚ်လဝ်ရောၚ်။
ရုၚ်ကလုတ် ကေုာံ ရုၚ်ဃံၚ်ဝန်ပၞာန် အမေရိကာန်တံ အလုံမွဲဂၠးကဝ် စပ္တံရေၚ်တၠုၚ်မံၚ် အစဳဇန်တန်ဗတောန်ပရေၚ်ခန်လ္ၚတ်မွဲရ။ သွက်သ္ဂောံကိတ်ညဳကဵု တန်ဗတောန်တံဂှ်တုဲ ပရေၚ်ချိၚ်တ္ၚဲပရေၚ်ပတိတ်ကဵုဗဳဇာတံဂှ် ကလေၚ်ညဳပ္ညပ်ချိၚ်ကဵုအာရောၚ် ညးနွံအခေါၚ်ဟီုဂး ဌာနပရေၚ်ဍုၚ်သအာၚ် အမေရိကာန် ဟီုလဴကဵုလဝ်ရ။
နူကဵုဌာနပရေၚ်ဍုၚ်သအာၚ်တှ်ေ ပရူပရာ စပ်ကဵုပရေၚ်ကၠောန်အာတန်ဗတောန်ဏံတုဲ တၚ်နၚ်ချိုတ်တ်ပၠိုတ်တ် အခိၚ်ပွိုၚ်မူစိတ္ၚဲ လံမာန်ဂှ် ဟွံဟီုလဴလဝ်ပုဟ်။
ဆဂး တန်ဗတောန်ဏံဂှ် ရန်တၟံလဝ် သွက်သ္ဂောံစၟဳစၟတ်ထမံက်အာရုပ်ရဴ ကြဴနူညးစိုပ်အာလဝ် အပ္ဍဲဍုၚ်အမေရိကာန်တံတုဲ လတူညးဗက်ဗ္ဒဗ္ဒာဲစ အထံက်ပၚ်ပရေၚ်မၞိဟ် အလဵုအသဳတံလောန်ကာဲတံဂှ် သွက်သ္ဂောံစၟဳစၟတ်အာ ညးကၠုၚ်ပတိုန်ထ္ၜး ပရေၚ်ဗဳဇာတံရောၚ် ဂွံတီရ။
အလဵုအသဳထရ ဂှ် အခိၚ်လၟုဟ်ဏံ လတူညးဆုဲပြံၚ်လုပ်ဍုၚ်ဟွံလုပ်သၞောဝ်တံ ပွမကဵုဒုဟ်ဒဏ်ပလံၚ်ဖျဴပတိတ်နူဍုၚ်ဂှ် ကၠောန်မံၚ်တုဲ ပရေၚ်သီကေတ်ကာတ်ဂရၚ်တံ၊ အာတ်လဝ်ဗဳဇာ အခေါၚ်မံၚ်စံၚ်အာလၟိုန်တံဂှ် ထ္ၜးဟိုတ်နာနာသာ်တုဲတးပါဲထောံတုဲ သၞောဝ်ပရေၚ်လဝကတံဂှ် ဓရတ်သၠုၚ်ပတိုန်မံၚ် အသိၚ်ရ။
အပ္ဍဲထ္ၜးဟိုတ်တံဂှ်တှ်ေ ညးမပတိုန်ထ္ၜး လညာတ်ပရေၚ်ဍုၚ်ကွာန် ပရေၚ်ပါလုပ်လဝ် ပ္ဍဲပေါဲထ္ၜးဆန္ဒ ညးဆာန်ဂကူပါလေတ်သတိုၚ် ဒစဵုဒစးလဝ် ပရေၚ်လဝေၚ်ပၞာန်အေတ်သရေ အပ္ဍဲဂါဇာတံလေဝ် ပါလုပ်ကၠုၚ်ရ။
ပရေၚ်ဌာနလဝက ကရေပ်ဓရတ်ဗီုဏံဂှ် ရန်တၟံလဝ် သွက်သ္ဂောံဗဗိုန်သၠုၚ်ပတိုန် ပရေၚ်ဂီုကၠီု သွက်အပ္ဍဲဍုၚ်အမေရိကာန်ရောၚ် နူလပါ်ထရ ဟီုလဴကဵုလဝ်ရ။
ဆဂး မူဝါဒအလဵုအသဳထရတံ လ္ၚဵုဂှ် ဒးဆဵုဂဗဒၟံၚ်ကဵု ပရေၚ်တၚ်ကော်ဆော နူရုၚ်သၞောဝ်ဓဝ်တံကီုရ။
ပ္ဍဲဂိတုအဝ်ဂတ် ၂၁ လောန်ကၠုၚ်တေံလေဝ် နာဲဗ္စာအမေရိကာန်မွဲတၠ တးပါဲထောံ မူဝါဒအလဵုအသဳမွဲတၚ် ပရေၚ်ဒေါအ်ဇူလဝ် ပွမပတိတ်ကဵုဗဳဇာ လတူညးမပတိုန်ထ္ၜးဗဳဇာအခေါင်ဆုဲပြံၚ်မံၚ်စံၚ် နူဍုၚ်ပံၚ် ၇၅ ဍုၚ်တံရ။ မူဝါဒဂှ်တှ်ေ ဟိုတ်နူလောန်ၜက်အာမံၚ် နူကဵုအဝဵုပရေၚ်စၟတ်ပိုၚ်ခြာလဝ် ဥပဒေ ဝန်ဇၞော်ပရေၚ်ဍုၚ်သအာၚ် မာကိုရဝ်ဘဳယဝ်ဂှ် နာဲဗ္စာ သ္ဂုတ်သွာတ်လဝ်ရောၚ်။
အပ္ဍဲအကာဲအရာဆုဲပြံၚ်ပရေၚ်ချိၚ်တ္ၚဲ အလန်ဏံဂှ်တှ်ေ ညးမပတိုန်ထ္ၜးဗဳဇာအခေါင်ဆုဲပြံၚ်မံၚ်စံၚ်လ္ၚဵု မချိၚ်လဝ်အေန်တာဗျူတုဲတုဲ ပ္ဍဲကဵုရုၚ်ကလုတ် ကေုာံ ရုၚ်ဃံၚ်ဝန်ပၞာန် အမေရိကာန်တံဂှ် ကလိဂွံလဝ်အဳမေဝ် စပ်ကဵုကလေၚ်ဆုဲပြံၚ်ထောံတ္ၚဲ ချိၚ်လဝ်တမ်မူလတံဂှ်ရောၚ်ဂှ် ဌာန်ပရိုၚ် Financial Times ထမံက်ထ္ၜးလဝ်ရ။
သွက်တ္ၚဲအေန်တာဗျူတၟိဂှ်တှ်ေ နူလပါ်ရုၚ်ကလုတ်၊ ရုၚ်ဃံၚ်ဝန်ပၞာန်ဆေၚ်စပ်တံ ဆက်ကဵုအာသမ္တီပၠန်ရောၚ်ဂှ် ပ္ဍဲအဳမေဝ်တံဂှ် ချူလဝ်ရ။
မွဲလပါ်တှ်ေ ဂကောံအခေါၚ်အရာမၞိဟ်တံဂှ် မူဝါဒကရေပ်ဓရတ်လဝ် ပရေၚ်လဝက အလဵုအသဳထရ တံဂှ် ဟိုတ်နူ ဒှ်မံၚ်ပွမပါ်ခြာဆက်ဆောံ ကေုာံ ကၠောန်မံၚ်ပကီုပရာတ်ကဵု အခေါၚ်အရာဟီုဂးသၠးၜး သီုကဵုအခေါၚ်အရာ လၟေၚ်ကမၠောန်သၞောဝ်ဓဝ်ဍာံတံတုဲ ဒးဒုၚ်ပါ်ပါဲမံၚ် ဗွဲမသကာတ်မြဟ်ရ။
တုဲပၠန် အပ္ဍဲဍုၚ်အမေရိကာန်လေဝ် ဟိုတ်နူမူဝါဒကရေပ်ဓရတ်လဝ်ဗီုဏံတုဲ ဗွဲတၟေၚ် သွက်ဂကောံမၞိဟ်ဂကူအောန်န်တံဂှ် ပရေၚ်ဂွိၚ်ဖေက်ဒးဒုၚ်စၟဳစၟတ်ပါ်ခြာပရေၚ်ဂကောန်ဂကူ သၠုၚ်တိုန်ကၠုၚ်တုဲ ဖန်ဗဒှ်ကၠုၚ်ဗွိုၚ် ဟၟဲကဵုပရေၚ်ဂီုကၠီုမွဲမာန်ဂှ် ဂကောံအခေါၚ်အရာမၞိဟ်တံ ဟီုလဝ်ရ။
Ref:Reuters