ကျာ်ထဝ်၊ အဝ်ဂတ် ၂၇
အပ္ဍဲတွဵုရးမန် ပွိုၚ်ဍုၚ်ကျာ်ထဝ် နကဵုတင်စောဲစပ် ဆက်စပ်မံၚ်ကဵု PDF တံဂးတုဲ ဒပ်ပၞာန်ဗၟာကၠုၚ်ရပ်ဏာ ကွးဘာပညာသ္ဇိုၚ် ၄ တၠရဂှ် ညးဒေသတံ ဟီုလဴကဵုဌာန်ပရိုၚ်သြၚ်လောန်တိုၚ်မ်ရ။
အပ္ဍဲဂိတုအဝ်ဂတ် ၂၃-၂၄ လောန်ကၠုၚ်တေံ ကွးဘာ ၄ တၠတံ အခိၚ်ကတ်ဗတောန်မံၚ်ပညာ ပ္ဍဲဘာတန်သၠုၚ် ဍုၚ်တိၚ်ဇြယျာတ် ပွိုၚ်ဍုၚ်ကျာ်ထဝ်ဂှ် ဒပ်ပၞာန်ဗမာတံကၠေၚ်ရပ်ဏာ အပ္ဍဲသ္ၚိတံရောၚ်။
ကွးဘာ နွံအာယုက်အကြာ ၁၃ သၞာံ ကဵု ၁၇ သၞာံ Grade 7 ကဵု Grade 11 တံပါတုဲ ဒးဒုၚ်ရပ်ဏာလဝ် အပ္ဍဲသ္ၚိနွံမံၚ် ဍုၚ်တိၚ်ဇြယျာတ် အရာပ် ၄ ကဵု ၆ တံ မဒှ်ရ။
အတိုၚ်တမ်ရိုဟ်ကၞက်ပရိုၚ် အပ္ဍဲဒေသတံဟီုလဴမ္ဂး အကြာတ္ၚဲလောန်ကၠုၚ်တ္ၚဲဘာကၟာတ်ဂှ် ကွးဘာရဲဒးဒုၚ်ရပ်ဏာလဝ်တံဏံ အဟိန်အာဝေၚ်လဝ်ဒၞာဲဂိက်ဒပ်စဵုဒၞာညးဍုၚ်ကွာန် PDF ကွာန်ဝေန်ကါန်ဂှ် တက်ဗွဳဒဳယိုဝ် ပတိုန်လဝ် tiktok လတူဇာဖိုၚ်မှာဇန်တုဲဒးဒုၚ်ရပ်လဝ်ရောၚ် သ္ဂးရ။
အပ္ဍဲကဵုကွးဘာဒးဒုၚ်ရပ်ဏာလဝ်တံဂှ်တှ်ေ ကောန်တြုံ အရန်ဗိုလ် နူတမ်ဒပ် ခမရ ၂၀၇ ဖျေံသ္ဇိုၚ် ဍုၚ်တိၚ်ဇြယျာတ်လေဝ်ပါလုပ်မံၚ်ရောၚ် သ္ဂးရ။
ကွးဘာဒးဒုၚ်ရပ်လဝ်တံဏံ သွက်ဂွံကလေၚ်ဗၠးတိတ်ကၠုၚ်မာန်ဂှ် နူလပါ်မိမညးဆေင်စပ်တံ အာသဳကၠဳပ္ညဳပ္ညပ်မံၚ်ကီုလေဝ် စဵုကဵုတ္ၚဲဏံဟွံကလေၚ်ဗလးကဵုလဝ်ဏီပုဟ် ဂွံတီကေတ်ရ။
အပ္ဍဲတွဵုရးမန်ဂှ်တှ်ေ ဒပ်ပၞာန်ဗၟာသီအဝဵုတံဗက်စၟဳစၟတ်ရပ်မံၚ် ညးဆက်စပ်ကဵုဒပ်စဵုဒၞာညးဍုၚ်ကွာန် PDF တံကီု၊ ညးချူ Comment ပ္ဍဲမုက်လိက်ဇာဖိုၚ်မှာဇန် ဂကောံပၠန်ဂတးတံကီု၊ စနူကဵုဒး Like ၊ ကဵုဒး Like ဗီုဂြိုဟ်တံရ။
ပ္ဍဲဂိတုအဝ်ဂတ် ၂၃ လောန်ကၠုၚ်တေံလေဝ် ဟိုတ်နူကဵုဒး Like ဗီုဂြိုဟ်မွဲ လ္တူပိုအ်အကံက် Facebook လကိုဟ်ရေဝ် ဂကောံပၠန်ဂတးချဳဒရာၚ်မံၚ် အကြာပွိုၚ်ဍုၚ်ရေဝ်ဂှ်တုဲ သၟတ်ဗြဴမံၚ်ဒၟံၚ်ပ္ဍဲကွာန်တၟံကၞေၚ်မွဲတၠဂှ်လေဝ် ဒပ်ပၞာန်ဗၟာလုပ်ရပ်ဏာလဝ် အပ္ဍဲသ္ၚိကီုရ။
ပရိုၚ် – သြၚ်လောန်တိုၚ်မ်
Photo – Social Media