ကျာ်မြဟ်၊ ဂိတုအဝ်ဂတ် ၂၇
အပ္ဍဲတွဵုရးမန် ပွိုၚ်ဍုၚ်ကျာ်မြဟ် ဟိုတ်နူဗြဲဂူရိုပ်ထတ်ဂှ်ရ ဍာ်ၜဳကဍတ်သၠုၚ်တိုန်တုဲ အကြာအရာပ်လတူဍုၚ်တံကဵု ကွာန်ဇိုၚ်ၜဳတံဂှ် ပရေၚ်ဘဲဍာ်ဇၞော်စက္တဵုဒှ်မံၚ်ရောၚ် ညးဒေသတံ ဟီုလဴကဵုဌာန်ပရိုၚ်-သြၚ်လောန်တိုၚ်မ်ရ။
စနူဂိတုအဝ်ဂတ် ၂၄ လောန်ကၠုၚ်တေံ ဟိုတ်နူဗြဲဂူရိုပ်ထတ်တုဲ ဍာ်ၜဳကဍတ်သၠုၚ်တိုန်ကၠုၚ်ဂှ်ရ ပ္ဍဲဍုၚ်ကျာ်မြဟ် အကြာအရာပ်ဒၞာဲတိသဝ်ဝ်တံ ဍာ်စလုပ်ကၠုၚ်မံၚ်အိုတ်ရ။
တုပ်သာ်ဂှ်ကီု ပ္ဍဲကွာန်ဇိုၚ်ၜဳကဍတ် မပ္တံကဵုကွာန်ကမနာံ၊ ဥုလေ၊ ကုန်ပဝ်လဝ်၊ လမုခို၊ ကွာန်ဖာသီတံ သီုဖအိုတ် ဟွံအောန်နူ ၂၀ ကွာန်တံဂှ် ဒးဆဵုဂဗဒၟံၚ်ပရေၚ်ဘဲဍာ်ဇၞော် မဒှ်ရ။
ဟိုတ်နူဍာ်ဇၞော်တိုန်ကၠုၚ်တုဲ ဘာဗတောန်လိက်ဗွဲမဂၠိုၚ် ဒးကၟာတ်လဝ်မွဲခဏယာယဳကီု ညးဍုၚ်ကွာန်တံလေဝ် ဒးကၠောန်မံၚ် ပရေၚ်ဒစးဒုၚ်ပလေဝ်ပလေတ် ဘဲဍာ်တံနွံတုဲ ညးဒေသအရာပ်တိသဝ်ဝ်လ္ၚဵုတံဂှ် စပြံၚ်ဆုဲဒၟံၚ်ယျရောၚ်ဂှ် ဂွံတီရ။
အတိုၚ်ညးဒေသတံဟီုမ္ဂး အခိၚ်တ္ၚဲဍာ်ကတဵု ဂိတုခဍဲသဳပေၚ်ဏံ ယဝ်ရဗြဲဆက်ဂူမံၚ်ဏီမ္ဂး ပ္ဍဲပွိုၚ်ဍုၚ်ကျာ်မြဟ် ဘဲအန္တရာဲဍာ်ဇၞော်တိုန်တံဂှ် ပဵုတုဲပရေံတိုန်အာမာန်ရောၚ်။
အတိုၚ်ဌာနပရေၚ်ဗြဲကျာ လလောၚ်တြးလဝ် အခိၚ်နူဂယး ၈ နာဍဳ မ္ဂး ပ္ဍဲၜဳဂၚ်ကပ္ပလဳကီု ပ္ၚံက်ၜဳဂၚ်ဗၚ်္ဂလာတံကီု ကျာမန်သုံ ဇြဟတ် ထတ်မံၚ်တုဲ နူလပါ်သၠုၚ်ကျာ တွဵုရးကွာန်ယှဳ ရးနိဂီုဍုၚ်ကြုက်တေံ ဟိုတ်နူလဗိုတ်ကျာ “နာရာ” ပိုတ်တိတ်ကၠုၚ်လဝ်တုဲ စဵုကဵုစိုပ် ဂိတုအဝ်ဂတ် ၃၀ ဂှ် ပ္ဍဲတွဵုရးမန်ကေုာံ တွဵုရးတံသီုဖအိုတ်တံ ဗြဲဇၞော်တိုန်မာန်ရောၚ် ကဵုလဝ်သတိရ။
ဟိုတ်နူဗြဲဂူရိုပ်ထတ်တုဲ ပ္ဍဲဗွဲခဏ မွဲလစုတ်ဓဝ်ဍာ်ဇၞော်တိုန်က္တဵုဒှ်မာန်တုဲ စပ်ကဵုဘဲအန္တရာဲ ပရေၚ်ဍာ်ဇၞော်တိုန်ကၠုၚ်မာန်တံဂှ် ညးနွံမံၚ်ဗဒါဲၜဳကြုၚ်တံ ညံၚ်ဂွံဒစးဒုၚ်ပလေဝ်ပလေတ်စလဝ်ကိုပ်ကၠာညိဂှ် ကဵုလဝ်ကသပ်ရ။
ပွိုၚ်ဍုၚ်ကျာ်မြဟ်ဏံ ပ္ဍဲဇၟာပ်ပ်သၞာံ ဒးဆဵုဂဗဒၟံၚ်ကဵု ပရေၚ်ဘဲအန္တရာဲဍာ်ဇၞော်တံနွံတုဲ ဟိုတ်နူဒှ်ပွိုၚ်ဍုၚ်ဇၞော်ဂှ်ရ ပရေၚ်မံၚ်စံၚ် ဘဝညးဒေသတံ ဒးဆဵုဂဗဒၟံၚ်ကဵုအခက်အခုဲနာနာသာ်တံ မဒှ်ရ။
ပရိုၚ် – သြၚ်လောန်တိုၚ်မ်
Photo – CJ