မတ်မလီု၊ အဝ်ဂတ် ၂၇
အပ္ဍဲတွဵုရးမန် စနူအခိၚ်ဒပ်ပၞာန်သီအဝဵုတုဲ ၚုဟ်မးကပေါတ်တံ သၠုၚ်တိုန်ကၠုၚ်မံၚ်ရိမ်မ်တုဲ ကရောံပြသၞာပရေၚ်သြန်လုပ်တိတ် ဟွံညဳဒှ်မံၚ်ဂှ် သ္ဂေံာစပုၚ်ဟဂါပ်ဂွံဆက်အာမာန်ပၠန်ဂှ် ဒှ်မံၚ်ပရေၚ်အခက်အခုဲကွေံကွေံရောၚ် ညးဍုၚ်ကွာန်သ္ဇိုၚ်တံ ဟီုလဴကဵု ဌာန်ပရိုၚ်သြၚ်လောန်တိုၚ်မ်ရ။
အပ္ဍဲလက်ထက်အလဵုအသဳပၞာန်ပြံၚ်လဝ်ဗီုပြၚ် ဟီုကြဴဇာမံၚ် အလဵုအသဳဒီမဝ်ကရေဇြဳကီုလေဝ် ၚုဟ်မးကပေါတ်နာနာသာ်တံဂှ် ဆက်တုဲသၠုၚ်တိုန်မံၚ် မွဲဆတုဲမွဲဆတံဂှ် စနူခၟာဲစာၚ်မွဲမ ဒးရာန်စဒၟံၚ် ၇၀၀ ဒ္ကေဝ် ဒှ်အာရ။
ဟိုတ်နူရာန်ကၠေၚ်စက်ဝါတ်တိုန်ဂှ်ကီု၊ စရိတ်ပရေၚ်ပလံၚ်ဗ္စိုပ်တံ ဇၞော်တိုန်ဟွံဆဟွံတန်၊ ဓါတ်လလဳကၠုၚ်လၟေၚ်ဟွံဍာံ ကေုာံ ၚုဟ်မးသွက်ဂွံပတိတ်ကပေါတ်သၠုၚ်တိုန်အာတုဲ ၚုဟ်မးကပေါတ် သ္ဇိုၚ်နာနာသာ်တံ သၠုၚ်တိုန်စိုပ်အာမံၚ် စဵုကဵုက္ဍဟွံစိုပ် ဒှ်မံၚ်ရ။
ဟိုတ်နူၚုဟ်မးကပေါတ်နာနာ ဍၚ်မံၚ်တုဲ ရဲအိန်ထံၚ်လ္ၚဵုတံ ဆၜိုတ်စမံၚ်ကဵု ခရံက်ကဵုကၞပ် ခၞေဝ်ကေဝ်ခၞာညိညကီုလေဝ် ဟဂါပ်ဟွံဆက်တုဲ ဒှ်မံၚ်ခတှ်ပြးဇးနွံမံၚ်ရဂှ် ညးဗြဴပါၚ်ဖဴမွဲတၠ ဟီုရ။
“သြန်လုပ်သြန်တိတ်လေဝ် ဟွံညဳပုဟ်။ သွဖျုန်လေဝ် စဟွံမာန်ပုဟ်။ ဆၜိုတ်ခရံက်ကၞပ်တံ ကဵု ခၞေဝ်ကေဝ်ခၞာဟေၚ် သ္ၚိပုၚ်ဟဂါပ်ဟွံဆက်တံ နွံမံၚ်ဗွဲမဂၠိုၚ်ရ။ အခက်အခုဲနွံဗွဲမလောန်တုဲ လ္ၚဵုတံဂှ်တှ်ေ ဒှ်တိုန်ခတှ်။ ယဝ်ရလေဲကဵုဟွံမာန်မ္ဂး ဒးဂြိပ်ပါဲအာအိုတ်ဏောၚ်” သာ်ဝွံ သ္ဂးရ။
တုဲပၠန် သွက်သ္ဂောံစသုၚ်အာ ဇၟာပ်ပ်တ္ၚဲလၟေၚ်ၚ်တံမာန်ဂှ် ညးဍုၚ်ကွာန်သ္ဇိုၚ်တံ ၜိုန်ရပရေၚ်ထတ်ယုက်ဟွံခိုဟ်ကီုလေဝ် ကမၠောန်ဟွံဂံၚ်ကဵုလီုတုဲ စနူပရေၚ်စသုၚ်တံဂှ် ဒးဟအေတ် စသုၚ်အာမံၚ်ဗွဲမလောန်ရောၚ် ညးဆက်ဟီုရ။
ဟိုတ်နူကပေါတ်စသုၚ်သ္ဇိုၚ် မပ္တံကဵု သ္ၚု၊ ကၠေၚ်၊ ခၟာဲစာၚ်၊ ကဖျုန် စနူကဵုခၞေဝ်ကေဝ်နာနာတံဂှ် အောန်အိုတ်နူကဵု ၅ ဆ စဵုကဵု ၁၀ ဆ ၚုဟ်မးသၠုၚ်တိုန်အာတုဲ သွက်ညးဍုၚ်ကွာန်သ္ဇိုၚ်တံဂှ်တှ်ေ စိုပ်ကၠုၚ်မံၚ်အကာဲအရာ ရာန်စလေဝ် ဟွံမာန်ဒှ်မံၚ်ရ။
ဟိုတ်နူ ပရေၚ်ၚုဟ်မးကပေါတ်နာနာသာ်တံဍၚ်တိုန်မံၚ်တုဲ သွက်ရဲကၟိန်အိန်ထံၚ်တံဂွံစသုၚ်အာဖဲဖဲလှဲလှဲမာန်ဂှ် စိုပ်မံၚ်ပရေၚ်ဝါတ်ဂါတ်ဗွဲမလောန်ရောၚ် ညးဒေသတွဵုရးမန်မွဲတၠတှ်ေ ဟီုလဴကဵု ဌာန်ပရိုၚ်သြၚ်လောန်တိုၚ်မ်ရ။
“အခေါၚ်အရာ ကမၠောန်လေဝ်ဟၟဲ၊ သြန်လေဝ်ဝါတ်ဂါတ်၊ သြန်လေဝ်ဟွံပြေပြံၚ်၊ သွက်သ္ဂောံရာန်စပၠန် ၚုဟ်မးကပေါတ်တံ သၠုၚ်လောန်မံၚ်ကွေံကွေံ။ သွက်အိန်ထံၚ်မွဲမွဲ ဂွံစအာဖဲဖဲလှဲလှဲမာန်ဂှ်တှ်ေ စိုပ်မံၚ်အဆံၚ် ပရေၚ်အခက်ခုဲဗွဲမလောန်။ စိုပ်မံၚ် ကာလဝါတ်ဂါတ်လောန်ကွေံကွေံ၊ စိုပ်မံၚ်ကာလကပ်ကၞောဝ်တံဏောၚ် ဟီုဂွံရ” သာ်ဝွံ သ္ဂးရ။
အပ္ဍဲဒေသဂှ်တှ်ေ ညးဍုၚ်ကွာန်သ္ဇိုၚ်တံ ဒးဆဵုဂဗမံၚ်ပြသၞာ ပရေၚ်သြန်လုပ်တိတ်ဟွံညဳဇၞော်ကဵုဇြဟတ်တုဲ အိန်ထံၚ်လ္ၚဵုတံဂှ် ဂၠေံကေတ်သြန်တုဲတိတ်အာဍုၚ်မ္ၚး နကဵုဂၠံၚ်တရဴဟွံလုပ်သၞောဝ်ဂှ် ဂၠိုၚ်တိုန်မံၚ်ရ။
အတိုၚ်လိက်လလောၚ်တြး ပရေၚ်ပံၚ်တောဲ အကြာဂကောံစၞစဇွောံမ ပရေၚ်ဂၠးကဝ် WFP ကေုာံ သမဂ္ဂယူရောပ် EU ပ္ဍဲဂိတုမေ ၁၈ လောန်ကၠုၚ်တေံမ္ဂး အပ္ဍဲကဵုဍုၚ်ဗၟာ ပ္ဍဲမၞိဟ် ၄ တၠတှ်ေ ၁ တၠ၊ လၟိဟ်မၞိဟ်ကြပ် ၁၂.၄ ပြကောတိကိုတ်တံဂှ် ဒးဆဵုဂဗမံၚ်ကဵု ဘဲအေၚ်ကၠောဝ်တံနွံမံၚ်ရဂှ် လလောၚ်တြးလဝ်ရ။
တုဲပၠန် ဟိုတ်နူပရေၚ်ဇီုကပိုက် ပဋိပက္ခဒေသဗၟံက်အဒေါဝ်တေံတုဲ ၚုဟ်မးကၠေၚ်စက်ကဵု ကပေါတ်စသုၚ်သ္ဇိုၚ်နာနာသာ် ဍၚ်တိုန်ဒၟံၚ်ဂှ် ကီု၊ ဟိုတ်နူပဋိပက္ခအပ္ဍဲဍုၚ်တုဲ အခက်အခုဲစၞစဇွောံမတံ အကာဲအရာ ပဵုတုဲပရေံကၠုၚ်ဒၟံၚ်ရောၚ် သ္ဂးရ။
ဆဂး နကဵုဂကောံအလဵုအသဳပၞာန်ပြံၚ်လဝ်ဗီုပြၚ်ဂှ်တှ်ေ ပရေၚ်သောၚ်ကလးပြသၞာ ၚုဟ်ကပေါတ်ဍၚ်သၠုၚ်တိုန်မံၚ်တံဂှ် မွဲသာ်မှသောၚ်ကလးကဵုဟွံမာန်တုဲ ညးဍုၚ်ကွာန်တံဂှ်ရ ဒးဒုၚ်ဒၟံၚ်ဘဲဒဏ် ပရေၚ်ၚုဟ်မးကပေါတ်ဗၞိက်ဍၚ်မံၚ် ဟွံသက်သာကွေံကွေံပုဟ် သ္ဂးအိုတ်ရ။
ပရိုၚ် – သြၚ်လောန်တိုၚ်မ်
Photo – Social Media