မတ်မလီု၊ အဝ်ဂတ် ၂၇
အပ္ဍဲကာလပရေၚ်သီအဝဵုဏံ ပရေၚ်ပိုၚ်ပြဳညးဍုၚ်ကွာန်တံဂှ် ပွမသီကေတ်လဝ်ဟၟဲကဵုပရေၚ်သၞောဝ်ဓဝ်ကီု ဟိုတ်နူကၟာတ်ချိက်သီကေတ်ထောံသ္ၚိဌာန်တံကီု ပွမသီကေတ်ထောံကပေါတ် နွံပ္ဍဲသ္ၚိတံကီု ပလီုပလာ်ထောံကီုတုဲ ပရေၚ်ပိုၚ်ပြဳညးဍုၚ်ကွာန် ၈၄၇ တၠတံ ဒးဒုၚ်ကၟာတ်လဝ်ချိက်ရောၚ် ဂွံတီနူကဵု ဗော် NLD တံရ။
စနူသၞာံ ၂၀၂၁ စဵုကဵုစိုပ် ဂိတုဂျူလာၚ် ၃၁၊ သၞာံ ၂၀၂၆ ဏံ အတိုၚ်ဂကောံကံက်တင်နၚ်အခေါၚ်အရာမၞိဟ် ဗော် NLD ၜိုတ်ဍစိုပ်ဂွံလဝ်စရၚ်တံဂှ် လလောၚ်တြးကဵုလဝ်သမ္တီ ပ္ဍဲဂိတုအဝ်ဂတ် ၂၂ တေံ ရ။
အပ္ဍဲဂကောံပၞာန်တံကၟာတ်ချိက် သီကေတ်လဝ်ပရေၚ်ပိုၚ်ပြဳညးဍုၚ်ကွာန်တံဂှ်မ္ဂး ပရေၚ်ပိုၚ်ပြဳအမာတ်စၠတ်ထဝ် NLD ၁၉၉ တၠ ကေုာံ ကောန်ဗော် ၂၆၂ တၠတံလေဝ်ပါလုပ်မံၚ်တုဲ တင်နၚ်ဒးဆောံလေၚ်အာလဝ် ၁၀၀၀ ပြၚ်ၚ်တံဂှ် ဂွံလဝ်တင်နၚ်တုဲ သ္ပလဝ်စၟတ်သမ္တီ မဒှ်ရ။
ပတဝ်လဝ်က္ဍိုပ်ကဵု ရုၚ်ဌာန်ဂဥုပ်ဗဟဵုဗော် NLD ကီု ရုၚ်ဗော်နွံအပ္ဍဲရးဒေသဇၞော်၊ တွဵုရး၊ ရုၚ်ခရိုၚ်၊ ရုၚ်ပွိုၚ်ဍုၚ်ကေုာံ သီုကဵုရုၚ်အရာပ်ကွာန်တံတုဲ နူကဵုဂကောံပၞာန်ပလီုပလာ်လဝ် ၁၇၀ အလန် နွံမံၚ်ရဂှ် ထမံက်ထ္ၜးလဝ် ပ္ဍဲကဵုလိက်တင်စၟတ်သမ္တီဏံရ။
တုဲပၠန် လတူရဲညးဍုၚ်ကွာန် ဒစဵုဒစးပရေၚ်ပၞာန်သီအဝဵုတံဂှ် ဟၟဲကဵုသၞောတ်သၞောဝ် နူကဵုဂကောံပၞာန်တံ ရပ်စပ်ကေတ်လဝ်အရေဝ်တုဲ မၞိဟ်ဒးဒုၚ်ရပ်ချုက်ထိၚ်လဝ် ဟၟဲကဵုပရေၚ်ဓဝ်ဍာံ အပံၚ်ဖအိုတ် နွံ ၁၉,၃၇၀ ပြၚ်ကီု၊ အပ္ဍဲဂှ်မ္ဂး အမာတ်စၠတ်ထဝ် NLD ၁၅၀ တၠ၊ ကောန်ဗော် ၂၇၄၄ တၠ၊ ကောန်ၚာ်အာယုက်ဟွံပေၚ် ၂၆၀ တၠ ကေုာံ ညးဗြဴ ၂၇၃၅ တၠတံ ပါလုပ်မံၚ်ရောၚ်။
လတူညးဍုၚ်ကွာန်တံ အပ္ဍဲကဵုပရေၚ်ဂကောံပၞာန်တံကၠောန်လဝ် ပကီုပရာတ်အခေါၚ်အရာမၞိဟ်ဂှ်တှ်ေ ပွမပလီုပလာ်ပေါဲထ္ၜးဆန္ဒတံတုဲ ကၠောန်လဝ်ပရေၚ်ပကီုပရာတ် ၊ ပျဲပျာံလ္တူညးဒးဒုၚ်ရပ်လဝ်တံကီု၊ ပွမဂစိုတ်ထောံ၊ ပွမဟွံကဵုအခေါၚ်ဝဳယဲ ဒၞာဲရုၚ်ဂဥုဲရုံရုံဂပ်ပ်၊ ပတိတ်ဏာမ္ၚးထံၚ်တုဲ ဂစိုတ်ထောံလေဝ် ပါလုပ်မံၚ်ကီုရောၚ်။
ပေါဲဗတိုက်ဟၟဲမွဲသာ် လုပ်အာအပ္ဍဲကွာန်တုဲ ရပ်ပျဲပျာံဂစိုတ်ထောံညးဍုၚ်ကွာန်တံဂှ်ကီု၊ ပွမစံၚ်ဂစိုတ်ထောံလဝ်ဂျိုၚ်ၚ်၊ စကာနကဵုဂဒံၚ်မၞိဟ်တုဲ ပလေအ်ထောံ၊ လတူညးဗြဴတံ ကၠောန်ပရေၚ် ပကီုပရာတ်လိၚ်တုဲ ဂစိုတ်ထောံ၊ ပရေၚ်ဂစိုတ်ကဠက်လဝ် မွဲဂအုံမွဲကလောအ်ကောံကောံတံဂှ်လေဝ် ဂွံလဝ်တင်နၚ်ရောၚ် သ္ဂးရ။
တုဲပၠန် ပ္ဍဲဒၞာဲအကြာကွာန်အရာပ်ညးဍုၚ်ကွာန်တံနွံဒၟံၚ်ဂှ် ပန်ပၠောပ်ဏာလွဟ်ဇၞော် လွဟ်ဍောတ်တံတုဲ နူဗလးကျာလေဝ် ပန်ပလီုဏာလဝ် ဒၞာဲစမြိုၚ်ပရေၚ်ဘာသာတံ၊ ဘာဗတောန်လိက်၊ ရုၚ်ဂဥုဲတံကဵု သီုကဵုဒၞာဲညးဍုၚ်ကွာန်တံ အောပ်မံၚ်တံဂှ်ရောၚ်။
ဟိုတ်နူကၠောန်လဝ် ပရေၚ်ဖံက်ပကဝ်အခေါၚ်အရာမၞိဟ် ဗီုတံဏံဂှ် စမြိုၚ်ဒၞာဲ ၁၇၇၀၀ ပြၚ် လီုလာ်အာတုဲ ညးဍုၚ်ကွာန် ၆,၅၀၇ တၠတံ ဒးချိုတ်လဝ်၊ အပ္ဍဲဂှ်တှ်ေ အမာတ်စၠတ်ထဝ် NLD ၈ တၠ၊ ကောန်ဗော် ၁၂၅ တၠ၊ ကောန်ၚာ်အာယုက်ဟွံပေၚ် ၅၇၃ တၠ ကေုာံ မၞိဟ်ဗြဴ ၁,၁၁၉ တၠတံ ပါလုပ်မံၚ်ရောၚ်။
မွဲလပါ်ပၠန် ဟိုတ်နူဂကောံပၞာန်တံ ကၠောန်လဝ်ပရေၚ်လဝေၚ်ပၞာန်ကဵု ပရေၚ်ပကီုပရာတ်တံတုဲ သ္ၚိဌာန်ညးဍုၚ်ကွာန်ကဵု စမြိုၚ်ဒၞာဲအပံၚ် ဖအိုတ် ၇၇,၆၂၄ မတံ ဒးဒုၚ်စံၚ်ပလီုထောံတုဲ ပ္ဍဲဒေသလ္ၚဵုတံဂှ်တှ်ေ ဒးဒုၚ်စံၚ်ပလီုလဝ်ဂၠိုၚ်ၚ်ကဵုအလန်နွံမံၚ်တုဲ လၟေၚ်ပရေၚ်က္တဵုဒှ်လဝ် နွံမံၚ် ၁,၉၈၂ ဝါရောၚ်ဂှ် NLD ထမံက်ထ္ၜး စၟတ်သမ္တီလဝ်ရ။
တင်စၟတ်သမ္တီလဝ်တံဏံဂှ်တှ်ေ ထမံက်ထ္ၜးလဝ်ကဵု အတိုၚ်ရးဒေသဇၞော် တွဵုရးမွဲမွဲတံဟွံသေၚ်တုဲ နူဂကောံကံက်စရၚ်တင်နၚ် အခေါၚ်အရာမၞိဟ်တံကံက်ဂွံလဝ် အတိုၚ်သၞောတ်ဗ္ၜတ်အလုံမွဲဍုၚ်ဂှ်ပတိုန်ထ္ၜးလဝ် အပ္ဍဲလိက်ဒုၚ်စဳရေၚ် သွက်ပေါဲကောံဓရီုကာလအကြာ ဒုတိယကမ္မတဳဗဟဵု အလန်အဋ္ဌမဂှ်ရောၚ်။
အပ္ဍဲဂိတုမေ ၂၀၂၁ တေံဂှ် စဒက်ပ္တန်လဝ် ဂကောံကံက်စရၚ်တင်နၚ်အခေါၚ်အရာမၞိဟ်ဏံတုဲ စနူအခိၚ်တေံရ နကဵုပရေၚ်ပံၚ်တောဲရီုဗၚ်ကောန်ဗော်ကေုာံ ညးဍုၚ်ကွာန်အလုံမွဲဍုၚ် နူကဵုရးဒေသတံကဵုတွဵုရးဂမၠိုၚ်တံတုဲ ဗီုဂကောံပၞာန်တံကၠောန်လဝ်ပရေၚ်ပကီုပရာတ် ဖံက်ပကဝ်ကၠုၚ်လဝ်အခေါၚ်အရာမၞိဟ်တံဂှ် နကဵုသၞောတ်စှ်ေစှ်ေ ပကောံကၠုၚ်လဝ်တင်နၚ်တံဂှ်ရောၚ်။
ဟိုတ်နူအကာဲအရာဗလးတိကဵု အကာဲအရာကလိဂွံလဝ်တၚ်နၚ်ပရိုၚ်တံတုဲ ပရေၚ်ပကီုပရာတ်အခေါၚ်အရာမၞိဟ် က္တဵုဒှ်လဝ်ဇေတ်တ်တံဂှ်တှ်ေ ပဵုဂၠိုၚ်နူကဵုတင်စၟတ်သမ္တီလၟုဟ်ဏံမာန်ဏီဂှ် နူဂကောံကံက်စရၚ်တင်စၟတ် အခေါၚ်အရာမၞိဟ် NLD တံ သ္ဂးလဝ်ရ။
တင်စၟတ်သမ္တီတံဏံဂှ်တှ်ေ သွက်သ္ဂောံထမံက်ရုပ်ရဴ တင်နၚ်ပရေၚ်ဓဝ်ဍာံ၊ သွက်သ္ဂောံကလိဂွံပရေၚ်ဓဝ်ဍာံ ကေုာံ သွက်သ္ဂောံနွံကဵုပရေၚ်ကေတ်တာလျိုၚ် ပရေၚ်ဒုၚ်တာလျိုၚ် လတူကၠောန်လဝ် ပရေၚ်ပကီုပရာတ်အခေါၚ်အရာမၞိဟ်တံတုဲ နကဵု ပရေၚ်သက်သဳတင်စၟတ်သမ္တီတံ ဆက်မၚ်မွဲစကာအာရောၚ်ဂှ် ပ္ဍဲလိက်လလောၚ်တြးဏံ ကဵုလဝ်သမ္တီရ။
ပရိုၚ် – သြၚ်လောန်တိုၚ်မ်
Photo – Social Media