ဗြဝတဳ၊ အဝ်ဂတ် ၂၈
ပ္ဍဲတွဵုရးကရေၚ် လပါ်သၠုၚ်ကျာဍုၚ်ဗြဝတဳ ဒၞာဲမေန်လက်ပံ ၆ ကေုာံ ဒေသဖလူတံ ပေါဲဗတိုက်အကြာ ဒပ်ပၞာန်ဗၟာသီအဝဵု ကဵု ဂကောံဇြဟတ်ပၠန်ဂတးတံ ဇၞော်ကဵုဇြဟတ် ဆက်ဒှ်ဒၟံၚ်တုဲ ပရေၚ်ကြဳဗုမ် နူကဵုဗလးကျာတံ ဆက်နွံမံၚ်ဖိုဟ်ရောၚ်ဂှ် ညးဒေသတံ ဟီုလဴကဵု ဌာန်ပရိုၚ်သြၚ်လောန်တိုၚ်မ်ရ။
ပ္ဍဲဗဒါဲပယျဵု သေံ-ဗၟာ လပါ်သၠုၚ်ကျာဍုၚ်ဗြဝတဳ ကွာန်မေန်လက်ပံ၊ ဖလူကေုာံ ကွာန်ကြုၚ်ဗတဳဗုတံဂှ် အကြာကရောၚ်ပၞာန်ဗၟာ လုပ်ချဳဒရာၚ်မံၚ်ပရေၚ်ပၞာန်တံကဵု ဂကောံဇြဟတ်ပၠန်ဂတး KNLA မဟာဒပ် ၆ က္ဍိုက်ပ်တံ စဵုကဵုစိုပ် ဂိတုအဝ်ဂတ် ၂၇ ဂှ် ပေါဲဗတိုက်ဆက်က္တဵုဒှ်ဒၟံၚ်ရ။
အကြာတ္ၚဲတံဏံပၠန် ဒပ်ပၞာန်ဗၟာ ပန်ပၠောပ်ဒၟံၚ်လွဟ်ဇၞော် လပါ်သၠုၚ်ကျာဍုၚ်ဗြဝတဳနွံတုဲ မွဲအလန်ဓဝ် နကဵုၜၚ်ကျာပၞာန် Y-12 တံ ဆက်ကြဳဗုမ်ဗတိုက်ဒၟံၚ်ကီုဂှ် ညးဒေသဖလူးမွဲတၠ သ္ဂးရ။
မွဲလပါ်ပၠန်လေဝ် အကြာအလဵုအသဳပၞာန် ကဵု ဂကောံရပ်လွဟ်ကရေၚ် ဖျေံလဝ်သ္ဇိုၚ်ဒေသလပါ်သၠုၚ်ကျာဍုၚ်ဗြဝတဳ ဒပ်ပၞာန်ကရေၚ်ဒတုဲဖိုလ်ဒီမိုကရေစီ DKBA တံ သဳကၠဳပ္ညဳပ္ညပ်မံၚ် သွက်သ္ဂောံပလီုပလာ်ထောံ စမြိုၚ်ဒၞာဲ ကျာဖျ နွံအပ္ဍဲဒေသကျံက်ခက် ပ္ဍဲပယျဵု သေံ-ဗၟာတံ မဒှ်ရ။
ပ္ဍဲဒေသကျံက်ခက် ဒၞာဲဒေသ ဒုသ္ကိုပ်ပၞာန် သိုၚ်ကျဝ်လှ (DKBA) ထိၚ်ချုက်လဝ်ဂှ် ဒပ်ပၞာန်ဗၟာ ပတဝ်က္ဍိုပ်ထပက်လုပ်ကၠုၚ်တုဲ ပေါဲဗတိုက်ဒှ်မံၚ်ကဵု ဂကောံဇြဟတ်ပၠန်ဂတးတံ ပ္ဍဲဗဒါဲကွာန်ကြုၚ်ဗတဳဗုဂှ် သွက်သ္ဂောံဆက်တိုန်အာဂတမာန်တုဲ ဒပ်ပၞာန်ဗၟာတံ ကြဳဗုမ်ဗတိုက်နူကဵုဗလးကျာဂှ် ညးဒေသတံ သ္ဂးရ။
အကြာဒပ် DKBA မထ္ပက်လဝ်လိက်ကသုက်ဒေါအ်ပန်ပှော် NCA ကဵု ကမ္မတဳပ္ညဳပ္ညပ်ပရေၚ်ၜိုဟ်လလမ် ညဳသၟဟ်ကောန်ဂကူ NSPNC သၟဝ်အလဵုအသဳပၞာန်တံ ဆဵုဂဗသဳကၠဳလဝ် ပ္ဍဲဂိတုဂျူလာၚ် ၉ တေံတုဲ ညံၚ်ဟွံဂွံဆက်စပ်ကဵု ကမၠောန်ကျာဖျတံဂှ် ဥက္ကဌ NSPNC သ္ကိုပ်ပၞာန်ဇၞော် ယာပျေအ်ကဵုလဝ်သတိ ကု DKBA ကီု သွက်သ္ဂောံဗတိုက်ပလီုအာ ပရေၚ်ကျာဖျ ပ္ဍဲ ကျံက်ခက် – ဝဝ်လေ – ကျာ်ပိတံ ဂှ်လေဝ် သဳကၠဳလဝ်ကီုရောၚ်။
ကြဴနူအလဵုအသဳပၞာန် ကဵု DKBA ဆဵုဂဗတုဲ ကမၠောန်ကျာဖျ ကြုက်တံ နွံမံၚ်ဒေသကျံက်ခက် ပယျဵု သေံ-ဗၟာ တံဂှ် DKBA ပြံၚ်ပဆုဲကဵုမံၚ်ဒၞာဲပြဟ်ဟ်ကီု ပ္ဍဲဗဒါဲရုၚ်ဌာန်ဂဥုပ်ဗဟဵု DKBA တေံဂှ် သိုၚ်ခၞံစမြိုၚ်ဒၞာဲတၟိတံတုဲ ဖျေံကဵုဒၞာဲ ကမၠောန်ကျာဖျ ကြုက် ပြံၚ်ဆုဲကၠုၚ်မံၚ် နူကျံက်ခက်တံ မဒှ်ရ။
ပရိုၚ် – သြၚ်လောန်တိုၚ်မ်
Photo – Social Media