ၜၚ်ကံက်၊ အဝ်ဂတ် ၂၉
အပ္ဍဲဂိတုအဝ်ဂတ် ၂၇ ဂှ် နူကဵုအလဵုအသဳသေံ ချူခၞံပတိတ်ဥပဒေ ညံၚ်သ္ဂောံဘာတ်ထဍေၚ်ထောံ ကောန်ဍုၚ်သအာၚ် ကၠောန်ပထုဲပလီုလဝ် ပရေၚ်ညးဍုၚ်ကွာန်မှာဇန် ညးဖံက်ပကဝ် ဒဂေတ်ပဋိပတ်ညးဂမၠိုၚ်တႏရ။
အပ္ဍဲဂိတုအဝ်ဂတ် ၂၆ ဂှ် သ္ကိုပ်ဝန်ဇၞော်သေံ အနုတေန် ဇျှာန်ဝဳရာကူ ထ္ပက်စၟတ်တဲ ပ္ဍဲဥပဒေ ပရေၚ်ဘာတ်ထဍေၚ်ထောံ ကောန်ဍုၚ်သအာၚ်တံတုဲ နူဌာန်ပရိုၚ်နန်သၟိၚ် ပတိတ်လလောၚ်တြးလဝ်ရ။
အတိုၚ်ဥပဒေဂှ်မ္ဂး သွက်သ္ဂောံကလေၚ်ပလံၚ်ဗ္စိုပ်အာ ကောန်ဍုၚ်သအာၚ်တံ ဇရေၚ်ရးနိဂီုတမ်မူလညးတံ ဗွဲမပြဟ်မာန် ကေုာံ ဍိုက်ပေၚ်ကဵုအဝဵုရေၚ်တၠုၚ်တံဂှ် ကဵုဏာကုအေဂျေန်သဳအလဵုအသဳတံရောၚ်။
အတိုၚ်ၝောံပိုဒ် ဥပဒေဂှ်မ္ဂး ကောန်ဍုၚ်သအာၚ် ကၠောန်ဗဒှ်ဏာ အကာဲအရာပရေၚ်ညိၚ်ဝပ် ပရေၚ်ဇီုကပိုက် ဒဂေတ်ပဋိပတ်ညးဍုၚ်ကွာန်တံ (ဟွံသေင်) ဖဵုညးဍုၚ်ကွာန်မှာဇန်တံ ဒှ်တၚ်ယုတ်ဒေက်ဟုတ်မာဲအာရောၚ် ထေၚ်ခယျမ္ဂး နူကဵုဍုၚ်သေံ ဘာတ်ပတိတ်အာရောၚ်။
နကဵုသ္ကိုပ်ကေၚ်ကာလၟိုန် ဌာနပရေၚ်ကေၚ်ကာအပ္ဍဲဍုၚ်ဂှ် သွက်သ္ဂောံစဳရေၚ်သ္ဂုတ်သွာတ်အာ ပရေၚ်ဘာတ်ပတိတ် ကောန်ဍုၚ်သအာၚ်တံတုဲ ဇရေၚ်ဌာနကေၚ်ကာအပ္ဍဲဍုၚ်ဂှ် ဒးဒုၚ်စဳရေၚ်ပတိုန်ထ္ၜးအာ အမှုတံဂှ်ရောၚ်။
လတူညးကၠောန်လဝ်ပရေၚ်ဏံ ဟွံသေၚ်မ္ဂး ညးဗိုၚ်ရီုဗၚ်ကဵုလဝ် ကောန်ဍုၚ်သအာၚ် အပ္ဍဲပွဗီုတံဏံဂှ်လေဝ် ဥပဒေဏံ ဇီုကပိုက်စိုပ်အာကီုရောၚ်။
ကၠောန်ဗဒှ်ပွဗီုလဵုမ္ဂး ဒးဒုၚ်ဘာတ်ပတိတ်ရော ပ္ဍဲကဵုသၞောဝ်ဥပဒေတၟိ အလဵုအသဳသေံဂှ် တင်နၚ်ချိုတ်တ်ပၠိုတ်တ်တံ ဟွံထမံက်ထ္ၜးလဝ်ကီုလေဝ်၊ ပရေၚ်ပထုဲပလီု ကုညးဍုၚ်ကွာန်မှာဇန် ဒှ်ဟွံဒှ်ဂှ်တှ်ေ ညးတာလျိုၚ်တံဟေၚ် ကဵုအာသ္ဂုတ်သွာတ်ရောၚ်။
အတိုၚ်ၝောံပိုဒ် ၄ ဂှ် စၟတ်ပိုၚ်ခြာလဝ် သွက်သ္ဂောံဘာတ်ပတိတ် ပလံၚ်ဖျဴဏာ ကောန်ဍုၚ်သအာၚ်တံတုဲ၊ အတိုၚ်ၝောံပိုဒ် ၅ ဂှ်တှ်ေ ကောန်ဍုၚ်သအာၚ် မကၠောန်လဝ်ပွပကီုပရာတ်ဥပဒေတံဂှ် ဒုၚ်ဒဏ်ထံၚ်တုဲမှ သွက်သ္ဂောံဘာတ်ပလံၚ်ပတိတ်ထောံရောၚ် စဳဇန်လဝ်ရ။
ညးလုပ်စိုပ်ကၠုၚ်ဍုၚ်သေံ ဗွဲဟွံလုပ်သၞောဝ်တံ၊ ညးဆက်မံၚ်စံၚ်ဒၟံၚ် ဟွံလုပ်သၞောဝ်တံ ကေုာံ ညးကၠောန်မံၚ်ကမၠောန် ဟွံလုပ်သၞောဝ်တံလေဝ် ဒးဒုၚ်ကေတ်အရေဝ် အတိုၚ်ဥပဒေဏံရောၚ်။
လတူပွမကၠောန်တၞးလိက်ပတောအ်အလဵုအသဳ၊ ပွမစကာလိက်ပတောအ်တံဂှ်လေဝ် ဖျေံအာသ္ဂုတ်သွာတ် ဒဏ်ထံၚ်စဵုကဵု ၅ သၞာံရောၚ် ဂွံတီရ။
ကောန်ဍုၚ်သအာၚ် မဒုၚ်မံၚ်ဒဏ်ထံၚ် သွက်ဒုဟ်မွဲမွဲတၚ်နွံမံၚ်တံဂှ် သွက်သ္ဂောံဘာတ်ထဍေၚ်ပတိတ်ထောံတုဲ ညးတာလျိုၚ်ထံၚ်တံ အောန်အိုတ် ပွိုၚ် ၅၀ တ္ၚဲ ဒးဒစးဒုၚ်ကဵုလဝ်သမ္တီ ဇရေၚ်ဌာနကေၚ်ကာအပ္ဍဲဍုၚ်ရောၚ် ထမံက်ထ္ၜး လဝ်ရ။
ပရိုၚ် – သြၚ်လောန်တိုၚ်မ်
Ref:Khasodenglish