ၜဳကလေၚ်၊ အဝ်ဂတ် ၂၈
ဟိုတ်နူဘဲအန္တရာဲ ဍာ်ဇၞော်တိုန်မာန်တုဲ ပ္ဍဲတွဵုရးမန် ပွိုၚ်ဍုၚ်ၜဳကလေၚ် ကေုာံ ရးဗဂေါ ပွိုၚ်ဍုၚ်ယှိုဲကျေၚ် ရဲမံၚ်ဒၟံၚ် ဒကဲဇိုင်ကြုၚ် ဒၞာဲတိသဝ်ဝ်တံ ဒစးဒုၚ်ပါဲဓလေတ်အာအိုတ်ညိဂှ် နူဌာနသ္ကိုပ်က္ဍိုက်ပ်စၞောန်ပ္ညုၚ်ပရေၚ်ဗြဲကျာဇလဗေဒ လလောၚ်တြး ကဵုလဝ်သတိနွံရ။
အတိုၚ်ပရေၚ်ၜတ်ကၞာတ် ဌာနပရေၚ်ဗြဲကျာဇလဗေဒ ပ္ဍဲအခိၚ်နူဂယး ၆ နာဍဳကဝက် အဝ်ဂတ် ၂၇ မ္ဂး ဍာ်ၜဳယှိုဲကျေၚ်ဂှ် စိုပ်ဒၟံၚ်သၟဝ်စၟတ်ဒဝိၚ်ဍာ် ဍုၚ်ယှိုဲကျေၚ် ၜိုတ် ၆ ၝောံတဲတုဲ အကြာပွိုၚ်မွဲတ္ၚဲဂတဏံ စိုပ်အာစၟတ်ဒဝိၚ်ဍာ်မာန်ရောၚ်ဂှ် ကဵုလဝ်သတိရ။
ဍာ်ၜဳကလေၚ်ကီုလေဝ် စိုပ်ဒၟံၚ်သၟဝ်စၟတ်ဒဝိၚ်ဍာ် ဍုၚ်ၜဳကလေၚ် ၜိုတ် ၁ ပေ ၃ ၝောံတဲတုဲ အပ္ဍဲပွိုၚ်မွဲတ္ၚဲဂတဏံ စိုပ်အာစၟတ်ဒဝိၚ်ဍာ်မာန်ရောၚ်။
ဟိုတ်ဂှ်ရ ညးမံၚ်ဒၟံၚ် ဒကဲဇိုင်ၜဳ ဒၞာဲတိသဝ်ဝ် ပ္ဍဲကဵုပွိုၚ်ဍုၚ်ယှိုဲကျေၚ် ကေုာံ ပွိုၚ်ဍုၚ်ၜဳကလေၚ်တံ ညံၚ်ဂွံဒစးဒုၚ် စွံလဝ်သတိအိုတ်ညိတုဲ ယဝ်ရဍာ်ၜဳသၠုၚ်တိုန်ကၠုၚ်မ္ဂး ဗွဲမဂတာပ်အခိၚ် သွက်သ္ဂောံပါဲဓလေတ်အာညိဂှ် ဖတိုက်ဖအောဝ်ကဵုလဝ်သတိရောၚ်။
ပ္ဍဲအကာဲအရာလၟုဟ်ဏံမ္ဂး ဍာ်ၜဳကလေၚ် ဆက်သၠုၚ်တိုန်ဒၟံၚ်တုဲ ရဲအိန်ထံၚ်ၜိုတ် ၄၀ နူအရာပ်လတူဍုၚ် ဒၞာဲတိသဝ်ဝ်လ္ၚဵုတံဂှ် ဒးပြံၚ်ဆုဲမံၚ်စံၚ်အာ ပ္ဍဲဗ္ဒိုပ်ရီုဗၚ်ဟံၚ်ပြာ်ဒဒိုက်ဘဲဍာ် ၝောံခန်ဝေၚ်ဒြဟတ် ပွိုၚ်ဍုၚ်ၜဳကလေၚ်ဂှ် ညးဒေသတံ ဟီုလဴကဵု ဌာန်ပရိုၚ် သြၚ်လောန်တိုၚ်မ်ရ။
ပ္ဍဲသတ္တဟဒုတိယ ဂိတုဂျူလာၚ် လောန်ကၠုၚ်တေံလေဝ် ဍာ်ကြုၚ် ၜဳကလေၚ်ဂှ် လောန်ၜက်အာလဝ် နူစၟတ်ဒဝိၚ်ဍာ်တုဲ ပ္ဍဲအရာပ်လတူဍုၚ် ၅ အရာပ် ကေုာံ ကွာန် ၃၀ ပြၚ်ၚ်တံဂှ် ဍာ်ဗၠိုက်အာတုဲ မၞိဟ်လၟိဟ်မွဲလက်ပြၚ်တံ ဒးလဝ်ဘဲဍာ်တံရ။
တုပ်သာ်ဂှ်ကီု ပ္ဍဲတွဵုရးမန် ပွိုၚ်ဍုၚ်ကျာ်မြဟ်လေဝ် ဟိုတ်နူဍာ်ၜဳကဍတ် သၠုၚ်တိုန်ဒၟံၚ်တုဲ အရာပ်၊ကွာန် ၃၀ ဟွံအောန်တံ ဗၠိုက်ဒၟံၚ်ဍာ်တုဲ ဘာဗတောန်လိက်ဗွဲမဂၠိုၚ် ဒးကၟာတ်လဝ်ယာယဳရောၚ်ဂှ် ဂွံတီလဝ် နူညးဒေသတံရ။
ပရိုၚ် – သြၚ်လောန်တိုၚ်မ်