မတ်မလီု၊ အဝ်ဂတ် ၂၈
ပ္ဍဲတွဵုရးမန် စိုပ်အခိၚ်ဥတုရာသဳရပ်က သၞာံဏံဂှ် နူဂိတုဂျူလာၚ်တေံ စကဵုအခေါၚ်ကီုလေဝ် ဟိုတ်နူဟွံသွံကဵုကၠေၚ်စက်တုဲ စိုပ်ဂိတုအဝ်ဂတ်ဏံအိုတ်လေဝ် ဂၠုၚ်ရပ်က နူကဵုပြင်ၜဳသ္ၚောဲသ္ၚောဲကြပ်ကြပ်ဗွဲမဂၠိုၚ်တံ တိတ်ဟွံမာန်ဏီဂှ် တၠကမၠောန်ပရေၚ်ကတံ ဟီုလဴကဵု ဌာန်ပရိုၚ်သြၚ်လောန်တိုၚ်မ်ရ။
ကၠေၚ်စက် သွက်ဂၠုၚ်ရပ်ကတံဂှ် ဆေၚ်ကၠေၚ်ဗွဲမဂၠိုၚ်တံ ဟွံသွံကဵု စေဝ်ဂါလန်တံ တိုၚ်ကဳတံတုဲ ဗီုကၠာကၠာတေံ ရာန်ကေတ်ဟွံလောဲသွာတုဲ ပါဲနူဂှ်ပၠန် ပ္ဍဲဗွိုၚ်ဆေၚ်မ္ၚးဖျာဒမၠုတံဂှ်လေဝ် သၠုၚ်ပတိုန်လဝ်ၚုဟ်မး ဟွံတန်ကဵုဆတံရ။
ဟိုတ်နူ ပရေၚ်အခက်အခုဲကၠေၚ်စက်နွံတုဲ ညးကၠောန်ကမၠောန်ကတံ ဒးယှအ်ဖျေံလဝ် လၟိဟ်ဂၠုၚ်ရပ်ကတံကီု၊ ဟိုတ်နူကၠေၚ်စက်ဟၟဲတုဲ ဂၠုၚ်ရပ်ကတံ တိတ်ဟွံမာန်ကီု၊ စဵုကဵု ဒးဒေါအ်ဇူထောံ ပရေၚ်ကမၠောန်က သီုဖအိုတ်တံ အကာဲအရာ က္တဵုဒှ်ကၠုၚ်မံၚ်ရ။
ပ္ဍဲဆေၚ်သွံကၠေၚ်တံဂှ် နကဵုစေဝ် ဟွံသွံကဵုကၠေၚ်စက်တံတုဲ ဂၠုၚ်ရပ်ကဗွဲမဂၠိုၚ်တံ တိတ်အာၜဳဟွံမာန်ဂှ်လေဝ် တၠကမၠောန်ပရေၚ်ကမွဲတၠ ဟီုလဴကဵု ဌာန်ပရိုၚ်သြၚ်လောန်တိုၚ်မ်ရ။
“ကၠေၚ်ဂှ် ဍေံတံဟွံသွံကဵုစေဝ်ပုဟ်။ ယဝ်ဟွံသွံကဵုစေဝ်တုဲ ရာန်ဟွံဂွံပုဟ်။ ရာန်ဟွံဂွံတှ်ေ ဂၠုၚ်တိတ်ဟွံဂွံပုဟ်။ ဗွဲမဂၠိုၚ် ဂၠုၚ်ကဝက်ပြၚ်တံ တိတ်ဟွံမာန်ရ၊ စုတ်ကဵုစေဝ်တှ်ေ ဍေံတံညိလေဝ်ဟွံသွံကဵုရ။ ဒးရာန်ကေတ်ကၠေၚ် နူဖျာဒမၠုတံ။ ကဵုၚုဟ်ဍၚ်ၚ်တုဲ ရာန်နူဖျာဒမၠုဂွံတှ်ေ တိတ်အာ၊ တော်ဟွံကိတ်တှ်ေ ဟွံတိတ်ပုဟ်၊ ၚုဟ်မးကပေါတ်တံလေဝ် သၠုၚ်တိုန်မံၚ်တှ်ေ” သာ်ဝွံ သ္ဂးရ။
တုဲပၠန် ကေတ်ပတိုန်နၚ် ဂၠုၚ်ရပ်ကတံ လတူကုန်တုဲ စုတ်ကၠေၚ်စက်လေဝ် ဟွံဂွံတှ်ေ ပရေၚ်ဟွံသွံကဵုကၠေၚ်စက် နကဵုစေဝ်တံဂှ် ညးတာလျိုၚ်ဆေၚ်စပ်တံ ထေက်ကဵုဒးသောၚ်ကလးဖန်ဇန်ကဵုထေက်ရ၊ ယဝ်ရဟွံသောၚ်ကလးကဵုအာမ္ဂး ပရေၚ်ကမၠောန်က သီုဖအိုတ်တံ ကြပ်ဒးဒေါအ်ဇူထောံမာန်ရောၚ်ဂှ် ညးဆက်ဟီုရ။
တၠကမၠောန်ကမွဲတၠပၠန်လေဝ် နကဵုၚုဟ်မးစၟတ်ပိုၚ်ခြာလဝ်ဂှ် ဟွံသွံမံၚ်ကဵုကၠေၚ်စက်တံတုဲ ဒးရာန်ကေတ်မံၚ်နကဵုၚုဟ်မးဖျာဒမၠုဍၚ်ၚ်ဂှ်တှ်ေ ဂၠုၚ်ရပ်ကတံ ခြာဟွံလံ ဒးထပ်ဒေါအ်ဇူအာမာန်ရောၚ်ဂှ် ဟီုလဴကဵု ဌာန်ပရိုၚ်-သြၚ်လောန်တိုၚ်မ်ရ။
“ဒးရာန်မံၚ်ကၠေၚ် ဗီုလဵုရောတှ်ေ ကွေံကွေံတှ်ေ ဒးကဵုမံၚ်ၚုဟ်မးပဵုအာ နူစၟတ်ပိုၚ်ခြာလဝ်တံရ။ ၚုဟ်မးဗွိုၚ်ဖျာဒမၠုဂှ် မွဲတိုင်ကဳတှ်ေ ဒးကဵုဒၟံၚ် ၁၁ ကိုတ် စဵုကဵု ၁၅ ကိုတ်နွံရ။ ဟိုတ်နူအခက်အခုဲကၠေၚ်စက်တုဲ ဂၠုၚ်ဇၞော်ဇၞော်တံ ဒးဒေါအ်ဇူလဝ်။ ယဝ်ရဆက်အာမံၚ် အတိုၚ်ဗီုပြၚ်ဏံရတှ်ေ ဂၠုၚ်ရပ်ကတံ ဒေါအ်အာအိုတ်ဏောၚ်” သာ်ဝွံ သ္ဂးရ။
အခိၚ်လၟုဟ်ဏံ ဟိုတ်နူအခက်အခုဲကၠေၚ်စက်ဂှ် ဂၠုၚ်ကဗွဲမဂၠိုၚ်တံ တိတ်ရပ်ကဟွံမာန်တုဲ ဒးဒေါအ်ဇူထောံကမၠောန်မ္ဂး ၚုဟ်ကကီု ကပေါတ်စၞစသုၚ်သ္ဇိုၚ်တံလေဝ် ထပ်တုဲသၠုၚ်တိုန်အာမာန်ရ။
ဟိုတ်နူ ပရေၚ်အခက်အခုဲကၠေၚ်စက်ဂှ် ဂၠုၚ်ရပ်ကတံတိတ်ဟွံမာန်တုဲ သၟာကမၠောန်စီုသကီု ဗွဲမဂၠိုၚ်တံ ဆဵုကမၠောန်စုက်ကဵုဇကုတံဂှ် ဒးဗက်ဂၠာဲကၠောန်အာကမၠောန်နွံတုဲ ညးလ္ၚဵုတံဂှ်တှ်ေ တိတ်အာဍုၚ်မ္ၚးဇိုၚ်ဝုတ်ဒိုဟ်တံလေဝ်နွံမံၚ်ရောၚ်ဂှ် တၠကမၠောန်ပရေၚ်ကတံ ဟီုရ။
ကၠေၚ်စက်အပ္ဍဲဒေသဂှ်တှ်ေ စနူသတ္တဟဒုတိယ ဂိတုဂျူလာၚ်တေံတုဲ နူအလဵုအသဳပၞာန်ပြံၚ်လဝ်ဗီုပြၚ် တွဵုရးမန် ဟိုတ်နူပတေၚ်ဓရတ်တိုန် အခေါၚ်ပတိတ်ကၠေၚ်စက်တုဲ ပွိုၚ်ဍုၚ်သီုဖအိုတ်တံဂှ် ဒးထပ်ဆဵုဂဗမံၚ်ကဵု ပြသၞာပရေၚ်ကၠေၚ်စက်ပိုတ်အာ မွဲဝါပၠန်ရောၚ်။
မွဲလပါ်ပၠန်လေဝ် အလဵုအသဳပၞာန်ပြံၚ်လဝ်ဗီုပြၚ်တံ ရန်တၟံသွက်သ္ဂောံယှအ်ဖျေံအာကၠေၚ်စက်တုဲ စနူဂိတုအေပြဳ ၂၂ တေံ သွံကဵုမံၚ်နကဵုသၞောတ် QR Code ကီုလေဝ် ဟိုတ်နူဟွံသွံကဵုစေဝ်တံ၊ တိုၚ်ကဳတံတုဲ ဂၠုၚ်ရပ်ကတံကီု ကမၠောန်စကာမံၚ် စက်ပတိတ်ဓါတ်လလဳဇၞော်ဇၞော်တံကီု ပရေၚ်ကမၠောန်ဒးလေၚ်ဂိအာလဝ် နွံရ။
ပ္ဍဲတွဵုရးမန်ဂှ်တှ်ေ ဂၠုၚ်ရပ်က သ္ၚောဲကြပ်နူကဵုပြင်ၜဳ သီုဖအိုတ် နွံမံၚ် ၃၀၀၀ ပြၚ်ၚ်တုဲ ရဲကၟိန်အိန်ထံၚ် ဗက်ဗ္ဒဗဒါဲမံၚ်လတူကမၠောန်ဏံ နွံမံၚ်လၟိဟ်မၞိဟ်နကဵုလက်ပြၚ်တုဲ ကမၠောန်ရပ်က သ္ၚောဲကြပ်ပြင်ၜဳဏံဂှ် ပ္ဍဲတွဵုရးမန်ဏံ ဒှ်ပရေၚ်ကမၠောန်ပိုန်ဒြပ် အဆံၚ်တတိယ မဒှ်ရ။
ပရိုၚ် – သြၚ်လောန်တိုၚ်မ်
Photo – CJ