မတ်မလီု၊ နဝ်ဝေမ်ဗာ (၂)
ပ္ဍဲတွဵုရးဍုၚ်မန်ဂှ် အခိၚ်သြောံကသီုတိတ်မ္ဂး သြောံကၠံနဂှ် ဂွံဒၟံၚ်ၚုဟ် ပွဳပွူ (၁၀) ကိုဋ်ဒ္ကေဝ်ကီုလေဝ် ဟိုတ်နူပၞာန်သီအဝဵုတုဲ ခရိတ်အိုတ်နာနာ သၠုၚ်တိုန်ဒၟံၚ် မွဲဆမွဲတာန်ဂှ်ရ ပရဲပရာ နွံကၠုၚ်ဟွံမာန်ပုဟ်ဂှ် သၟာဗ္ၚတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲတွဵုရးဂှ် အခိၚ်သြောံကသီုတိတ်မ္ဂး သြောံကၠံန မလုပ်ဂကောံသ္ၚုကြံၚ်ၚ်တံဂှ် ဂွံဒၟံၚ်ၚုဟ် ပွဳပွူ (၁၀) ကိုဋ်ဒ္ကေဝ်တုဲ သ္ၚု (ပေါ်ဆန်) သ္ၚုခိုဟ်ဟ်တံဂှ် ကၠံနမ္ဂး ဂွံဒၟံၚ်ၚုဟ် ပွဳပွူ (၁၂) ကိုဋ်ရ။
ဆ္ဂး ၚုဟ်သြောံလၟုဟ်ဂှ်ဝွံ ဒးတော်ကဵု ၚုဟ်သြောံ ပ္ဍဲဂိတုသေပ်တေမ်ဗာတုဲကၠုၚ်တေံတှ်ေ ကၠံနမ္ဂး နူကဵု (၃) ကိုဋ် ၚုဟ်စှ်ေဒၟံၚ် စဵုကဵု (၆) ကိုဋ်ရ။
ၚုဟ်သြောံလၟုဟ်ဂှ်ဝွံ ဒးတော်ကဵု ၚုဟ်ကပေါတ်တမ် အခိၚ်ကၠောန်ၚတံ မပါလုပ် သီုကဵုခရိတ်အိုတ်နာနာတံ က္ဍၚ်ကၠုၚ်တံဂှ်တုဲ ဒၟါနူတၟော်ဟွံကိတ်ကဵု ခရိတ်တဵုပၠောမ်တံဂှ်ရ ပရဲနွံဟွံမာန်ပုဟ်ဂှ် သၟာဗ္ၚတံ ဟီုရ။
“ၜိုတ်ကၠောန်ၚသၟးရဂှ် ဗီုလဵုတၟော်ဂွံကိတ်ဂှ်ရော၊ ၚုဟ်သြောံဂှ် စှ်ေဒၟံၚ်ကွေံကွေံဏောၚ်၊ ၚုဟ်ဖျာတၞဟ်ဟ်တံဂှ်တှ်ေ ဟွံစှ်ေပုဟ်လေဝ်၊ ၚုဟ်ဝါဲဓာတ်တံ၊ ၚုဟ်ကပေါတ်တမ်တံ၊ ကၠေၚ်စက်တံဂှ် ဟွံစှ်ေတုဲ ခရိတ်ရတ်သြောံဂှ်တှ်ေ သၠုၚ်တိုန်ဒၟံၚ်ကီုဏောၚ်၊ ဟိုတ်ဂှ်ရ သွက်သၟာဗ္ၚတံဂှ် တၟော်စဟွံကိတ် ကွေံကွေံပုဟ်၊ ယဝ်ရလၟုဟ် သၟာဗ္ၚတမ်ဟွံမွဲတံ၊ သၠုဲအပဵုဟွံမွဲတံ သြောံတိတ်ဂှ် ဒးသွံရောၚ်ဟီုမ္ဂး သွက်ညးတံ တၚ်ဝါတ်ဂါတ်မုနွံရောဟီုတှ်ေ ပရဲပရာဟွံမွဲပုဟ်၊ ၚုဟ်ဂွံစှ်ေနူဏံရ နွံ၊ အခိၚ်လၟုဟ် သြောံစတိတ်ရဂှ် ကျဒၟံၚ် ၜိုတ် (၁၂) ကိုဋ်ရတှ်ေ သြောံတံ တိတ်ဂၠိုၚ်ကၠုၚ်တှ်ေ ၚုဟ်ထပ်ဂွံစှ်ေရနွံ” ဂှ် သ္ဂးရ။
အခိၚ်လၟုဟ် သၟာဗ္ၚတံဝွံ အခိၚ်သြောံတိတ်ဂှ် ၜိုတ်ထေၚ်လဝ်ဂှ် ဟွံဂွံၚုဟ်တုဲ ၚုဟ်သြောံထပ်စှ်ေကၠုၚ်ပၠန်ဂှ် ဂွိၚ်ဂွါဲဒၟံၚ်အိုတ်ရ။
သၟာဗ္ၚလ္ၚဵုတံဂှ်တှ်ေ ကြဴနူဒပ်ပၞာန်သီအဝဵုတုဲဂှ် ဟိုတ်နူၚုဟ်ကပေါတ်တမ် ပရေၚ်တဵုလွဳတံ က္ဍၚ်ဒၟံၚ်ဂှ်ရ စုတ်ကဵုဝါဲ ဟွံမာန်ရတုဲ သီုကဵုဒးဆေၚ်ဒၟံၚ်မုက်ကဵု ဒမြိပ်သြောံတိတ်အောန်စှ်ေတံရ။
သ္အာၚ်နူဂှ်ပၠန် ပ္ဍဲသၞာံဏံလေဝ် ဟိုတ်နူစၟပလီုသြောံတံတုဲ အလုံဝါမွဲ လီုလာ်တံ နွံကၠုၚ်လဝ်ဂှ်ရ သၟာဗ္ၚလ္ၚဵုတံမ္ဂး ဒးဂဗဒၟံၚ်ကဵု သီုကျဗြံတံရ။
“သြောံဂှ် တိတ်ဂှ်တိတ်ဒၟံၚ်ရ၊ ဒးစၟတုဲ လီုအာ တၟာဂလိုၚ်ယျ၊ မုစၟရောဟီုဂှ် ဟွံတီပုဟ်၊ ဗီုကဵုခုန်တံ ရေန်တံ သောဲသောဲရဏောၚ်၊ သီုတိ ဍာဲအာ၊ ဍေံတံ စထောံတုဲ တၞံသြောံတံဂှ် ဒှ်အာဗီုကဵု တူပၟတ်တုဲ ကှ်အာ၊ လီုလာ် တၟာဂလိုၚ် ကြပ်မွဲခံက်ရ၊ လၟုဟ်ဂှ်တှ်ေ ဇၟာပ်ပ်ဝါရ၊ လ္ၚဵုဂှ်တှ်ေ (၁၀) ဨကဂှ် အိုတ်အာ သီု (၁၀) ဨက၊ လ္ၚဵုတံဂှ် သှ်ေၜိုတ် (၂) ဨက (၃) ဨက ရ၊ ကျဒၟံၚ် အေဗီုဏံ တၟာဂလိုၚ်ရ၊ ၚုဟ်ဝါဲဂှ်လေဝ် ဒှ်ဒၟံၚ် မွဲကိုဋ်ပြၚ် (၂) ကိုဋ်ပြၚ်တုဲ အေဇှ် လၟုဟ်ဂှ်တှ်ေ ကျဒၟံၚ်ယျ” ဂှ် သ္ဂးရ။
သၟာဗ္ၚတံဝွံ သၞာံတုဲကၠုၚ် ပ္ဍဲရာသဳကၠောန် သြောံကသီုတေံဂှ်လေဝ် ဟိုတ်နူဒးလဝ် ဘဲသဘာဝတံကဵု စၟစၟန်တံတုဲ ဒမြိပ်သြောံတိတ် အောန်စှ်ေအာလဝ်ဂှ်ကီု၊ ဒၟါနူၚုဟ်ကပေါတ်တမ်တံ မက္ဍၚ်ကၠုၚ်ဒၟံၚ် ဟိုတ်နူဒပ်ပၞာန်သီလဝ်အဝဵုဂှ်တုဲလေဝ် ဒးကျလဝ်ကီုရ။
ပ္ဍဲတွဵုရးဍုၚ်မန်ဂှ် ဨကကၠောန်သြောံကသီု ဗ္ဒါဲ (၇) ကိုဋ်နွံဒၟံၚ်တုဲ လၟေၚ်သၞာံ သြောံတိတ်ဒၟံၚ် အပံၚ် (၄) ကိုဋ်နပြၚ်ရ၊ သြောံမတိတ်ကၠုၚ်တံဂှ် ဗုတ်တုဲ ပလံၚ်ပ္တိုန်သွံတြးဒၟံၚ် ရးဒေသ ကေုာံ တွဵုရးလ္ၚဵုတံရ။
ဆ္ဂး သၟာဗ္ၚတံဝွံ ဒးဒုၚ်စသိုၚ်ဒၟံၚ် ဘဲဒဏ်ပရေၚ်သီအဝဵု ညံၚ်ရဴကမၠောန်တၞဟ်သ္အာၚ်တံ ဇၞော်ကဵုဇြဟတ်ကီုရ။
ပရိုၚ်−သြၚ်လောန်တိုၚ်(မ်)