မဝ်သကိုဝ်၊ အဝ်ဂတ် ၃၀
ကြဴနူပရိုၚ်ကောလဟောလံၚ် သွက်သ္ဂောံကော်အာပရေၚ်ယိုက်ဝန်ပၞာန် မံက်တိတ်ကၠုၚ်တုဲ အကြာပွိုၚ်မွဲသတ္တာဟဏံ ကောန်ဍုၚ်ရတ်ယှာ ၁၁၃,၀၀၀ တၠတံ တိတ်အာ ဍုၚ်ဂျဝ်ဂျဳယာတေံ နူကဵုဂိက်သၞေဟ်ကၚ်စၟဳစၟတ် ဗာခနဳလာသ်ဂှ် ဂွံတီရ။
ပ္ဍဲဂိတုအဝ်ဂတ် ၂၀ ပွိုၚ်မွဲတ္ၚဲဓဝ်ဂှ် မၞိဟ် ၂၀၀၀၀ ပြၚ်တံ တတ်တိတ်အာ နူဂိက်သၞေဟ်ကၚ်ပယျဵုဏံ သ္ဂးရ။
လၟိဟ်ဏံဝွံ ယဝ်ရၜတ်ကၞာတ်အာကဵု သၞာံတုဲကၠုၚ်တံမ္ဂး ဂၠိုၚ်တိုန်မံၚ်သောၚ်ၚ်ကၠးကၠးရောၚ်ဂှ် နူဌာနအကံက်ခေါန် ဖိတ်ဒရေဝ်ရတ်ယှာ ထမံက်ထ္ၜးလဝ်ရ။
ပ္ဍဲဂိတုဗွဲကြဴဏံ နူကဵုနန်ထဝ် ကရေၚ်မလေၚ် သၠုၚ်ပတိုန်မံၚ်အသိၚ် သွက်သ္ဂောံကော်ကောန်ပၞာန်တၟိ ကေုာံ သီုကဵုကော်ပကောံကောန်ပၞာန်အရန်တံကီု နွံရောၚ်။
အခေါၚ်အဝဵုပရေၚ်ကမၠောန် ဒပ်မၚ်မွဲကောန်ဂကူရတ်ယှာတံလေဝ် သၠုၚ်ပတိုန်လဝ် အဆံၚ်ကီုရ။
ပ္ဍဲမွဲအခိၚ်ဂှ်ဟေၚ် ပ္ဍဲရတ်ယှာဂှ် အစဳဇန် သွက်သ္ဂောံကော်ကောန်ပၞာန်တၟိ ဟၟဲတုဲ ရန်လဝ်လေဝ် ဟၟဲပုဟ် ညးစၞးလၟိုန်ရတ်ယှာ ဆေၚ်စပ်ကဵုကုလသမဂ္ဂ ဗာသဳလဳ နဳဗန်ဇယာ ကလေၚ်ခၠေဝ်ပ္လန် ဟီုလဝ်ကီုရ။
အတိုၚ်ရိုဟ်ကၞက်ပရိုၚ်တံဟီုလဝ်မ္ဂး ပ္ဍဲသၞာံဏံ သွက်ပွိုၚ်မွဲဂိတုဂှ် ရတ်ယှာ ကော်ကောန်ပၞာန်တၟိ ၃၀၀၀၀ ပြၚ် ပကောံဟွံဂွံဒှ်မံၚ်တုဲ ပ္ဍဲဂိတုလ္ၚဵုလ္ၚဵုတံမ္ဂး ဂွံလဝ်ၜိုတ် ၂၇၀၀၀ ဓဝ်ရောၚ် သ္ဂးရ။
ဟိုတ်နူဒှ်အာ အကာဲအရာဗီုဏံဂှ် စွံရန်တၟံအဓိကကဵု ကောန်ပၞာန်အရန် အာယုက်သၟဝ် ၅၅ သၞာံ ရဲဒေါအ်ဇူပၞာန်တံတုဲ ညးတာလျိုၚ်ရတ်ယှာတံ ကော်လဝ် ပရေၚ်ယိုက်ဝန်ပၞာန်ရ။
အတိုၚ် ပရေၚ်ထံၚ်ပရိုၚ်ယူခရုၚ် ထမံက်ထ္ၜးလဝ်မ္ဂး ရတ်ယှာ ရန်လဝ် သွက်သ္ဂောံကော်အာ ကောန်ပၞာန်တၟိ ၆ ကိုတ် အပ္ဍဲသၞာံ ၂၀၂၆-၂၀၂၇ ဏံရောၚ် ဂွံတီရ။
အပ္ဍဲသၞာံဏံ ကော် ၃ ကိုတ်ရန်လဝ်တုဲ သၞာံဂတဏံ ထပ်ကော်အာ ၃ ကိုတ်ပၠန်ဂှ် စဳဇန်လဝ် မဒှ်ရ။
ဟိုတ်နူ ရတ်ယှာ ကော်မံၚ် ပရေၚ်ယိုက်ဝန်ပၞာန်တုဲ ညးပါဲဒဴဒဒိုက်တံ ဂြိပ်ပါဲတိတ်အာ ဇရေၚ်ဍုၚ်အာမေနဳယျာတေံရ။
ဍုၚ်အာမေနဳယျာတံ ဒုၚ်တၠုၚ်မံၚ် ကောန်ဍုၚ်ရတ်ယှာတံရောၚ် ညးအုပ်ကာ ကံၚ်သဳပရေၚ်ဂီုကၠီုအာမေနဳယျာ အလာန် သဳမောန်ယန် ဟီုလဝ်ရ။
ကောန်ဍုၚ်ရတ်ယှာ စိုပ်ကၠုၚ်ဍုၚ်ပိုဲတံဂှ် အခိၚ်ပြေပြံၚ်မ္ဂး ကလေၚ်စဴအာ ဍုၚ်ရတ်ယှာမာန်ရောၚ်ဂှ်လေဝ် ညးဟီုရ။
ပ္ဍဲဂိတုဂျူလာၚ် ၂၀၂၆ သၞာံဏံ အတိုၚ်တင်နၚ်စရၚ် ပရေၚ်စၟဳစၟတ်လညာတ်ညးဍုၚ်ကွာန်မှာဇန် နူဗဟဵုသုတေသန ပကောံလညာတ်တံမ္ဂး ကောန်ဍုၚ်ရတ်ယှာ ၆၆ က္ဍိုပ်ကၠံတံဂှ် ပ္ဍဲအနာဂတ်မ္ဂး ဍုၚ်ညးတံ ဒးတတ်ကၠောံအာ အခိၚ်ကာလဝါတ်ခါတ်တံရောၚ် ပတေဟ်ကေတ်လဝ်ရ။
ဟိုတ်နူပရေၚ်ဇီုကပိုက်ပိုန်ဒြပ် ကေုာံ ပွမဗတိုက်ကဵုဒရုၚ်တာသ္ၚောဲ လတူစမြိုၚ်သ္ဇိုၚ်ကိစ္စဇၞော်တံ၊ ဟိုတ်နူရတ်ယှာ စကာဇြဟတ်ပေၚ်ၚ် လုပ်ဗတိုက်လဝ်ယူခရုၚ်တုဲ ကြဴနူကၟိန်ဍုၚ်သဵုဗဳယိတ် လီုလာ်သရိုဟ်စှ်ေအာတုဲဂှ် ပရေၚ်ဂွိၚ်ဖေက် ညးဍုၚ်ကွာန်မှာဇန်တံဂှ် က္တဵုဒှ်မံၚ်သၠုၚ်အိုတ်ရ။
Ref: United24media