ဗေကျေန်၊ ဂိတုသိပ်တေမ်ပါ ၁
စပ်ကဵုပရေၚ်ဘဲဍာ်ဇၞော် က္တဵုဒှ်လဝ် ပ္ဍဲပယျဵု နဳပဝ် ကေုာံ တိဗက် ပ္ဍဲဂိတုအဝ်ဂတ် ၂၆ ဂှ် ဟိုတ်နူတြးလဝ်ပရိုၚ်ဟွံဍာံ ကောလဟောလံၚ်ဂမၠိုၚ်ဂးတုဲ ညးတာလျိုၚ်ကြုက် ကေတ်လဝ်အရေဝ် မၞိဟ် ၁၀ တၠတံရ။
ပ္ဍဲဒေသဟိမဝန္တာ ဟိုတ်နူဍာ်ဇၞော်တိုန်ဇၞော်ကဵုဇြဟတ် ညံၚ်ရဴသူနာမဳတုဲ ကွာန်ကဵု ဒၞာဲဗွိုၚ်မၞိဟ်တံမံၚ်စံၚ် နွံမံၚ်ပယျဵုၜါလပါ် လီုလာ်အာ ဗွဲမဇၞော်ကဵုဇြဟတ်တုဲ စဵုကဵုဂိတုအဝ်ဂတ် ၃၁ ဂှ် လပါ်နဳပဝ်ကဵု တိဗက် ညးချိုတ်အာ နွံ ၉၀၀ ပြၚ်တုဲ မၞိဟ်ကြပ် ၄,၈၀၀ တၠတံ ကၠေံဒၟံၚ်ရောၚ် ဂွံတီရ။
ဌာနပရေၚ်ဂီုကၠီုသိုက်ဖာ သၟဝ်ဌာနဝန်ဇၞော်ပရေၚ်ဂီုကၠီုညးဍုၚ်ကွာန်မှာဇန်ကြုက် ပ္ဍဲဂိတုအဝ်ဂတ် ၃၁ ဂှ် ဟီုလဴထမံက်ထ္ၜးကၠုၚ် ပရူဒဒှ် မၞိဟ် ၁၀ တၠတံဏံတုဲ ဆက်ဗတိုက်ပလီုအာ ညးကၠောန်ပတိတ်တြးလဝ် တင်နၚ်ပရိုၚ်ဗၠေတ်ဗၠေတ် စပ်ကဵုဘဲသဘာဝတံရောၚ်ဂှ် ဟီုလဝ်ရ။
လတူဇာဖိုၚ်မှာဇန် စပ်ကဵုပရေၚ်လၟိဟ်ညးချိုတ် ကေုာံ ညးကၠေံမံၚ် ပ္ဍဲတိဗက်တံတုဲ ညးမဒးဒုၚ်ကေတ်အရေဝ်တံဂှ် အဓိကညးတံပတိုန်လဝ် မပ္တံကဵုလၟိဟ်ညးချိုတ် နွံၜိုတ်လ္ၚီပြၚ်၊ ညးကၠေံမံၚ်တံဂှ် ဂၠိုၚ်နူကဵု အလဵုအသဳလလောၚ်ပတိတ်လဝ်ဏီတုဲ တြးလဝ်ရောၚ် ညးတာလျိုၚ်ကြုက်တံ သ္ဂးရ။
အတိုၚ်စရၚ် နူလပါ်ကြုက် ပတိတ်လဝ်လၟုဟ်မ္ဂး ပ္ဍဲတိဗက် ညးချိုတ်လဝ်နွံ ၁၆ တၠတုဲ ညးကၠေံဗ္ဒန်နွံမံၚ် ၅၄၆ တၠရ။
နူလပါ်ကြုက် ဟီုဏာ ဆၜိုတ်ဖျေံလဝ်ဒုဟ်ဒဏ် စပ်ကဵုပရေၚ်အုပ်ဓုပ် ကုမၞိဟ် ၁၀ တၠတံတုဲ ဖျေံလဝ်ဒုဟ်ဒဏ်ဗီုလဵုကီု တြးလဝ်နူပလက်ဖံၚ်ဇာဖိုၚ်မှာဇန်လဵုရောဂှ် တင်နၚ်ချိုတ်တ်ပၠိုတ်တ်တံ ဟွံလလောၚ်တြးလဝ်ပုဟ်။
အတိုၚ်ဥပဒေ ရးနိဂီုဍုၚ်ကြုက်မ္ဂး ဘဲသဘာဝ၊ ယဲကပ်၊ ဘဲအန္တရာဲ ကေုာံ ပရိုၚ်ဗၠာဲသၟိၚ်တံဂှ် ယဝ်ရတြးလဝ် ပရေၚ်ဟွံဍာံပြ နကဵုရန်တၟံနွံနွံ ညံၚ်ပထုဲပလီုပရေၚ်မှာဇန်တံဒှ်အာမ္ဂး ဖျေံဒုဟ်ထံၚ် စဵုကဵု ၁၀ တ္ၚဲမာန်တုဲ သီုကဵုဖျေံဒဏ်သြန် ယွမ် ၁,၀၀၀ လေဝ် ဖျေံမာန်ရောၚ်။
နူဇာဖိုၚ်မှာဇန်ဂှ် ဟိုတ်နူတြးလဝ်ပရိုၚ်ဗၠေတ်ဗၠေတ်တုဲ ယဝ်ရဖဵုအဆက်ပရေံပရေံ က္တဵုဒှ်ကၠုၚ်မ္ဂး ဖျေံထံၚ် စဵုကဵု ၃ သၞာံ၊ ယဝ်ရဖဵုအဆက် ဇၞော်ကဵုဇြဟတ်ဒှ်အာမ္ဂး စဵုကဵု ၇ သၞာံ ဖျေံထံၚ်မာန်ဂှ် ဥပဒေဗီုတံနွံမံၚ်ရောၚ် ဂွံတီရ။
စပ်ကဵုကရောံပရေၚ်ကေတ်လဝ်အရေဝ်တံဏံတုဲ ပရိုၚ်လ္ၚဵုပြးဒၟံၚ်လတူအန်လာၚ် စပ်ကဵုပရေၚ်ဘဲဍာ်တံဂှ် ဒှ် “ပရိုၚ်ဗၠေတ်တ်” ရောၚ် နူလပါ်ပရေၚ်ဍုၚ်သအာၚ်ကြုက် တးပါဲလဝ်ရ။
ရုၚ်ကလုတ်ကြုက် ဆေၚ်စပ်ကဵုရးနိဂီုဍုၚ်နဳပဝ် ကလေၚ်ခၠေဝ်ပ္လန်လဝ် တင်စောဲစပ်အဓိက ၂ တၚ် ပြးဒၟံၚ်လတူအန်လာၚ်ရ။
တင်စောဲစပ်ပထမဂှ်တှ်ေ ဟိုတ်နူ လပါ်ကြုက် ဒစးဒုၚ်ဟွံကဵုလဝ်သတိကၠာတဲ ကုနဳပဝ်တုဲ လပါ်နဳပဝ်ဂှ် မၞိဟ်ဒးချိုတ်အာဂၠိုၚ် မဒှ်ရ။
တင်မရနုက်ကဵုၜါဂှ်တှ်ေ ဟိုတ်နူဘဲအန္တရာဲဘူမိတိ က္တဵုဒှ်လဝ် ပ္ဍဲလပါ်ကြုက်တုဲ ကၟာၚ်ဍာ်သဘာဝကၟာၚ်ဍာ်တာလဝ် ထကးအာတုဲ ပ္ဍဲလပါ်နဳပဝ် လီုလာ်အာဇၞော်ကဵုဇြဟတ်ရောၚ် ဂးရ။
ရုၚ်ကလုတ်ကြုက် တးပါဲထောံ တင်စောဲစပ်တံဏံတုဲ ဟိုတ်နူပရေၚ်ဘဲဍာ် ပ္ဍဲနဳပဝ်ကြုက်ၜါဍုၚ်တံ ညးချိုတ် ညးကၠေံဗ္ဒန်တံ က္တဵုဒှ်အာလဝ်ရောၚ် ဟီုရ။
ပ္ဍဲအကြာဒေသဟိမဝန္တာဂှ် ဒၞာဲဘဲအန္တရာဲက္တဵုဒှ်မာန်တံ ဇၞော်လှဲလးပြးဇးဒၟံၚ်တုဲ သွက်သ္ဂောံစၟဳစၟတ်အာ ပ္ဍဲကဵုဗလးတိလၟိုန် ဒၞာဲဒေသသၠုၚ်ၚ်တံဂှ် တင်အခက်အခုဲတံနွံမံၚ်ရောၚ် နူလပါ်ကြုက် သောၚ်ကလးလဝ်ရ။
ဂကောံတၠပညာကြုက်တံဂှ် နကဵုနဲကဲပရေၚ်ပညာလၟုဟ်ဏံ ၜိုတ်သ္ပမာန် မၚ်ရံၚ်ဗဵု၊ သ္ၚဳဂၠိပ်၊ ပါ်ပါဲအာတုဲ တင်နၚ်ပရိုၚ်ကိစ္စဇၞော်တံဂှ် ပတိတ်လဴလှာဲကဵုလဝ် လပါ်နဳပဝ် ဗွဲဂတာပ်အခိၚ်ရောၚ်ဂှ်လေဝ် ရုၚ်ကလုတ်ကြုက် ဟီုလဝ်ရ။
Ref:CNA