ဍာ်ဗု၊ သိပ်တေမ်ပါ ၁
အပ္ဍဲကဵုရးတၞၚ်သဳ ပွိုၚ်ဍုၚ်ဍာ်ဗု ဗွိုၚ်ဧရိယာသၞေဟ်ၜၚ်ဇြိုဟ် ဇြုၚ်ပရေၚ်ပိုန်ဒြပ်တၟေၚ်ထဝါဲ ကရောၚ်ပၞာန်ဒပ်ပၞာန်ဗမာထပက်ဒၟံၚ်ဂှ် ဒးဒုၚ်ကြတ်ဗတိုက်တုဲ ကောန်ပၞာန် ၁၅ တၠ ချိုတ်အာရဂှ် နူကဵုကရောၚ်ပၞာန်ဒူရက လလောၚ်တြးလဝ်ရ။
လောန်ကၠုၚ်ဂိတုအဝ်ဂတ် ၂၉ ၜိုတ်အခိၚ်နူဂယး ၆ နာဍဳဂှ် ဒပ်ပၞာန်ဗမာထပက်ကၠုၚ်ကရောၚ်ပၞာန် သွက်သ္ဂောံသ္အးဇ္ၚးပရေၚ်တိဍာ် ပ္ဍဲသၞေဟ်ၜၚ်ဇြိုဟ်ထဝါဲဂှ် ဒပ်ပံၚ်တောဲဂကောံဇြဟတ်ပၠန်ဂတးတံ ကြတ်ဗတိုက်လဝ် ပ္ဍဲကရပ်ကွာန်မံၚ်မေဝ်ယှံၚ်ဂှ်ရောၚ်။
အပ္ဍဲပရေၚ်ကြတ်ဗတိုက်ဏံ ကောန်ပၞာန်ဗမာချိုတ်အာ ၁၅ တၠသၟးဟွံက ဒးလဝ်ဝပ်ဗွဲမဂၠိုၚ်နွံတုဲ ပါဲနူဂှ်ပၠန် သီဂွံလဝ်သီုသေနာတ် MA1 ၆ ဇကိုအ်၊ MA3 ၂ ဇကိုအ်၊ ဖျေံကမ် ၁၁ မကဵု မကမ် ၂၀၀ မနွံရောၚ် သ္ဂးရ။
ဒပ်ပၞာန်ဗမာသီအဝဵုတံ သွက်သ္ဂောံထမံက်ရုပ်ရဴကိုန်အစဳဇန် ဇြုၚ်ပရေၚ်ပိုန်ဒြပ်တၟေၚ်ထဝါဲတုဲ ကၠောန်ဒၟံၚ်ပရေၚ်သ္အးဇ္ၚးတိဍာ်ဆက်ဆက် ပ္ဍဲပွဳဗွိုၚ်ကွာန်ဗဒါဲဗဒါဲတံဂှ်လေဝ် ထပက်ဒၟံၚ်ကရောၚ်ပၞာန် မွဲဏှမွဲဏှကီုရ။
အခိၚ်လၟုဟ်လေဝ် ဟိုတ်နူဒပ်ပၞာန်ဗမာထပက်ဒၟံၚ်ကရောၚ်ပၞာန် အကြာကွာန်နွံမံၚ်အပ္ဍဲဇြုၚ် ပရေၚ်ပိုန်ဒြပ်တၟေၚ်ထဝါဲတံတုဲ ညးဒေသနူ ၄ ကွာန်တံဂှ် စဵုကဵုအခိၚ်လၟုဟ် ကလေၚ်ဌာန်ဒၞာဲဟွံမာန်ဏီတုဲ ဒးပါဲအောပ်ဒၟံၚ်ဒၞာဲဒဵုဂြိုပ်ဗၠးၜးဘဲတံရ။
ပရေၚ်ပေါဲဗတိုက်ဏံဂှ် နူကဵုကရောၚ်ပၞာန်ဒူရက ဒပ်ပၞာန်ဗၠးၜးကောန်ဂကူ ထဝါဲ DNLA၊ ဒပ်စဵုဒၞာညးဍုၚ်ကွာန်ထဝါဲ TPLF၊ ကၠသာန်မပၞဟ်၊ ဂကောံဒပ်ဒမၠုက်ဗဳလုၚ်၊ ဂကောံဇြဟတ်စဵုဒၞာ ညးဍုၚ်ကွာန်ဂြိုပ်ဗမံက်ထဝါဲ DDF၊ ဂကောံကိုမျာတ်တူကေုာံ မုက်ဒပ်စဵုဒၞာညးဍုၚ်ကွာန် ခရိုၚ်ထဝါဲ DDPDF တံ ပံၚ်တောဲဗတိုက်လဝ် မဒှ်ရ။
ပရိုၚ် – သြၚ်လောန်တိုၚ်မ်
Photo – PDF