ကျာ်မြဟ်၊ သိပ်တေမ်ပါ ၁
အပ္ဍဲတွဵုရးမန် ပွိုၚ်ဍုၚ်ကျာ်မြဟ် ဟိုတ်နူဗြဲဂူရိုပ်ထတ်ဍာ်ဇၞော်တိုန်ဆက်က္တဵုဒှ်မံၚ်တုဲ ဘာဗတောန်လိက်ကြပ် ၄၀ မ ဒးကၟာတ်လဝ်ယာယဳမွဲခဏရောၚ်ဂှ် ညးဒေသတံကေုာံ ဂကောံရီုဗၚ်ဟံၚ်ပြာ်မှာဇန်တံ ဟီုလဴကဵု ဌာန်ပရိုၚ်သြၚ်လောန်တိုၚ်မ်ရ။
စနူဂိတုအဝ်ဂတ် ၂၄ လောန်ကၠုၚ်တေံ ပ္ဍဲပွိုၚ်ဍုၚ်ကျာ်မြဟ် ဟိုတ်နူဗြဲဂူရိုပ်ထတ်မံၚ်ဂှ် ဍာ်ၜဳကြုၚ်ကဍတ် သၠုၚ်တိုန်မံၚ်အဆက်ဆက်တုဲ ဂအုံအရာပ်ကွာန် ၁၅ ဂအုံဂှ် ပရေၚ်ဍာ်ဇၞော်တံ က္တဵုဒှ်မံၚ်ရ ။
ဟိုတ်နူပရေၚ်ဍာ်ဇၞော်ဒှ်တိုန်တုဲ အိန်ထံၚ်ကြပ် ၇၀၀၀၊ လၟိဟ်မၞိဟ် ၃၂၀၀၀ ပြၚ်တံ ဒးဆဵုဂဗဒၟံၚ်ပရေၚ်ဘဲဒဒိုက်ဍာ်တုဲ ဒးပံက်လဝ်ဗ္ဒိုပ်ရီုဗၚ်ဟံၚ်ပြာ် ယာယဳ ၂ ဒၞာဲရ။
ညးဒးဘဲဒဒိုက်ဍာ်ဇၞော်တံဂှ် ဟိုတ်နူဒးဒုၚ်ဘဲၜက်ကၠုၚ် မွဲသတ္တာဟပြၚ်အာဂှ်တုဲ နွံမံၚ်ပၟိက်ကဵုပရေၚ်အထံက်ပၚ် ဇွောံမစၞစ၊ ဂဥုဲကေုာံ ပရေၚ်လွဳလွတ်ထတ်ယုက်တံရောၚ်ဂှ် ဂကောံရီုဗၚ်ဟံၚ်ပြာ်မှာဇန်တံ ဟီုရ။
အခိၚ်လၟုဟ်ဏံ ဍာ်ၜဳကြုၚ်ကဍတ် လောန်ၜက်အာနူတင်စၟတ်ဍာ်ဒွိၚ် ဍုၚ်ကျာ်မြဟ် ၅၀၀ သေန်တဳမဳတာ စိုပ်မံၚ် ၅၃၈ သေန်တဳမဳတာတုဲ လၟိဟ်ညးဒးဘဲဍာ်ဇၞော်တံ ထပ်ဂၠိုၚ်တိုန်မာန်ရောၚ် သ္ဂးရ။
သွက်ညးဒေသရဲဒးဘဲဍာ်တံဂှ် ဂကောံရီုဗၚ်ဟံၚ်ပြာ်တံကီု၊ ညးတၠဒါန်ကေုာံ ညးဍုၚ်ကွာန်ဒေသတံအာကဵုဒါန်၊ ပရေၚ်ထံက်ပၚ် မပ္တံကဵုစၞစ ဍာ်သ္အးဇ္ၚးတံရ။
အပ္ဍဲကဵုအရာပ်မိစောဗု ကေုာံ အရာပ်ယျာန်မျိုဝ်အံၚ် လတူဍုၚ်ကျာ်မြဟ်ကီု သီုကဵုကွာန်ဗဒါဲဇိုၚ်ၜဳ ကြုၚ်ကဍတ် ကွာန်ဥုလေဝ်၊ ကမနာမ်၊ သၞဟ်ဍုၚ်၊ ဍာ်တဴ၊ ကဍတ်၊ လမုခို၊ လှာကဇိုင်၊ ဖာသိမ်၊ ကလိုင်ကနိုင် ကေုာံ ကွာန်ၜါသွာၚ် သီုဖအိုတ် ၄၀ ကွာန်ပြၚ် ပရေၚ်ဍာ်ဇၞော်တိုန်ဏံ က္တဵုဒှ်မံၚ်ရ။
အပ္ဍဲဂိတုအဝ်ဂတ် ၂၄ လောန်ကၠုၚ်တေံလေဝ် ဟိုတ်နူဍာ်ဇၞော်တိုန်တုဲ လကျာ်မွဲဇကုနွံပိုန်အာယုက် ၆၈ သၞာံ နူဘာဂြိုပ်ဒဵုတၟံဍုၚ်ကျာ်မြဟ်ဂှ် ဗၠိုက်အာဍာ်တုဲပဝ်စဴအာလဝ်သွဝ်ရောၚ်ဂှ် ညးဒေသတံ ဟီုတုဲဂွံတီရ။
ပရိုၚ် – သြၚ်လောန်တိုၚ်မ်
Photo – CJ