ဘာအၚ်၊ သိပ်တေမ်ပါ ၁
အပ္ဍဲတွဵုရးကရေၚ် သွက်ဂွံအာတိုန်ဘာယိုက်ဝန်ပၞာန် လၟိဟ်ကောန်ပၞာန်တၟိ ဟွံဍိုက်ပေၚ်ဂးတုဲ သ္ကိုပ်ဝန်ဇၞော်တွဵုရးကရေၚ် ဥူသဝ်မျေအ်ဥူ ကဵုလဝ်စၞောန်ပ္ညုၚ် သွက်သ္ဂောံရပ်ပဝ်တာသၟတ်တံတုဲ အကာဲအရာပရေၚ်ရပ်စၟဳစၟတ်တံ ပဵုပရေံဂၠိုၚ်တိုန်မာန်ရောၚ်ဂှ် ရိုဟ်ကၞက်ပရိုၚ်ဒေသတံ သ္ၚဳဂၠိပ်လဝ်ရ။
ဂကောံအလဵုအသဳတွဵုရးကရေၚ် ကၠောန်လဝ်ကောံဓရီု ကၞောတ်ဂိတုအဝ်ဂတ်လောန်ကၠုၚ်တေံဂှ် ဟိုတ်နူဇြဟတ်သၟတ်အတိုၚ်ရန်စွံလဝ် သွက်သ္ဂောံယိုက်ဝန်ပၞာန်လၟိဟ်ဟွံပေၚ်ကၠုၚ်တုဲ အပ္ဍဲဂအုံအရာပ်ကွာန်ဆေၚ်စပ်တံဂှ် သွက်သ္ဂောံပလံၚ်ဗစိုပ်ဏာ လိက်ရုၚ်ကော် ပရေၚ်ယိုက်ဝန်ပၞာန် ဇရေၚ်သၟတ်တံတုဲ အတိုၚ်ရန်လဝ် ယဝ်ရလၟိဟ်မၞိဟ်ဟွံပေၚ်မ္ဂး သ္ကိုပ်ဝန်ဇၞော်တွဵုရး ဥူသဝ်မျေအ်ဥူ စၞောန်ပ္ညုၚ်လဝ် သွက်သ္ဂောံရပ်ကေတ်ပဝ်တာ သၟတ်တံရောၚ် ပရိုၚ်မံက်တိုန်ကၠုၚ်ရ။
ဟိုတ်နူစၞောန်ပ္ညုၚ် သ္ကိုပ်ဝန်ဇၞော်တွဵုရးကရေၚ် ဥူသဝ်မျေအ်ဥူ မံက်တိတ်ကၠုၚ်လဝ်ဗီုဏံတုဲ အပ္ဍဲတွဵုရးကရေၚ် အကြာပွိုၚ်ဍုၚ်တံမ္ဂး ပရေၚ်ရပ်တံၚ်ပဝ်တာလတူသၟတ်တံ ပဵုတုဲဂၠိုၚ်တိုန်မာန်ဂှ်ရ ပ္ဍဲအရာပရေၚ်အာကၠုၚ်တံမ္ဂး သၟတ်တံညံၚ်သ္ဂောံမံၚ်ကဵုသတိညိဂှ် တမ်ရိုဟ်ကၞက်ပရိုၚ်ဒေသတံ ကဵုလဝ်သမ္တီဟီုလဴလဝ်ရ။
အတိုၚ်ပရေၚ်သ္ၚဳဂၠိပ် ရိုဟ်ကၞက်ပရိုၚ်ဒေသတံမ္ဂး အပ္ဍဲတွဵုရးကရေၚ် ပါဲနူဍုၚ်ဘာအၚ်တုဲ အကြာပွိုၚ်ဍုၚ်သှ်ေမံၚ်တၞဟ်ဟ်တံဂှ် ပရေၚ်ရပ်တံၚ်ပဝ်တာ သွက်ယိုက်ဝန်ပၞာန် ပဵုဂၠိုၚ်တိုန်မာန်တုဲ၊ အကြာသ္ကုတ်ဂၠံၚ် မွဲကွာန်ကဵုမွဲကွာန်ဆက်လဝ်တံဂှ် ပရေၚ်ရပ်မၞိဟ်တံ ပဵုဂၠိုၚ်မာန်ရောၚ် သ္ဂးရ။
အတိုၚ်စၞောန်ပ္ညုၚ် သ္ကိုပ်ဝန်ဇၞော်တွဵုရးကရေၚ် အလဵုအသဳပၞာန် ဥူသဝ်မျေအ်ဥူဂှ်မ္ဂး သွက်ပရေၚ်ယိုက်ဝန်ပၞာန်တံဂှ် ဒးဖန်ဖက်အာ ပ္ဍဲအကြာဂိက်သၞေဟ်ကၚ်လုပ်တိတ် ဍုၚ်လှာဒကှ် ကေုာံ အရာပ်လတူဍုၚ်တံရောၚ် ဂွံလဝ်ပရိုၚ်တုဲ ဟိုတ်ဂှ်ရညံၚ်သ္ဂောံချပ်ဗ္စာရဏာ ချိၚ်တုဲအာကၠုၚ်လတူဍုၚ် လှာဒကှ်ညိဂှ် ရိုဟ်ကၞက်ပရိုၚ်ဒေသ ကဵုလဝ်သမ္တီရ။
လတူဍုၚ်ဗြဝတဳ ဍုၚ်ပယျဵုဂှ်လေဝ် ပရေၚ်ရပ်တံၚ်မံၚ်ပဝ်တာ သွက်ယိုက်ဝန်ပၞာန်ဂှ်နွံမံၚ်ဆက်ဆက်တုဲ ဗွဲတၟေၚ် ပတဝ်က္ဍိုပ်ကဵု သၟာကမၠောန်ပြံၚ်ဆုဲကၠုၚ် နူကဵုဒေသတၞဟ်တၞဟ်တံတုဲ ကၠုၚ်ကၠောန်မံၚ်ကမၠောန် ပ္ဍဲဍုၚ်ဗြဝတဳတံဂှ် ဂကောံပၞာန်တံဗက်ဂၠာဲရပ်ကေတ်မံၚ် ဇၟာပ်ပ်ဗ္တံ မဒှ်ရ။
လတူဍုၚ်ဗြဝတဳဏံ ဂကောံပၞာန်တံ ဟိုတ်နူဗက်ဂၠာဲရပ်ကေတ်မံၚ် လၟိုန်န်နွံမံၚ်တုဲ ပရေၚ်မၞိဟ်ကၠေံအာတံ က္တဵုဒှ်မံၚ်မွဲဏှမွဲဏှတုဲ၊ သၟတ်ဒးဒုၚ်ရပ်ပဝ်တာသွက်ယိုက်ဝန်ပၞာန် ပ္ဍဲဍုၚ်ဗြဝတဳဂှ် လၟိဟ်မၞိဟ် စိုပ်အာကဵုစှော်ပြၚ်နွံရောၚ် ရိုဟ်ကၞက်ပရိုၚ်ဒေသတံ ဟီုရ။
တုဲပၠန် ဒၞာဲဂၠံၚ်ဇၞော် ပရေၚ်ကူသာန်ဗၞိက်ပယျဵု ဂၠံၚ်ဗြဝတဳ-ကအ်ကြိက်-ကြုၚ်ဒဵု-ဘာအၚ်၊ ဂၠံၚ်ကြုၚ်ဒဵု-ကျာကလေဝ်-ထဝ်ပၠၚ်တံကီု ဒၞာဲဂိက်သၞေဟ်ကၚ်စၟဳစၟတ် ဒဒန်သြၚ်လောန် မုက်လုပ်ဍုၚ်ဘာအၚ်တံဂှ်လေဝ် နူလပါ်ဂကောံပၞာန်တံ မၚ်ရပ်မံၚ်လၟိုန်ကီုရောၚ်ဂှ် ညးအာတရဴတံဟီုတုဲ ဂွံတီရ။
အပ္ဍဲတွဵုရးကရေၚ် သွက်ယိုက်ဝန်ပၞာန်လၟေၚ်ဂိတုမ္ဂး လၟိဟ်သၟတ် စနူ ၁၀၀ စဵုကဵုပွဳပွူ ၂၀၀ တံဂှ် ဒးဗလးပလံၚ်ကဵုမံၚ်ဘာတန်ဗတောန်ပၞာန်နွံတုဲ၊ သွက်သၟတ်တံဂွံအာတန်ဗတောန် ပရေၚ်ယိုက်ဝန်ပၞာန်ဂှ်တှ်ေ ညးတာလျိုၚ်ဆေၚ်စပ်တံဒးဗက်ဂၠာဲတုဲ ရာန်ကေတ်မံၚ်ကဵုသြန်နွံရောၚ် ဂွံတီရ။
ပရိုၚ် – သြၚ်လောန်တိုၚ်မ်
Photo – Social Media