ဘာအၚ်၊ သိပ်တေမ်ပါ ၂
အပ္ဍဲတွဵုရးကရေၚ် ဍုၚ်ဘာအၚ် ဟိုတ်နူဍာ်ၜဳသြၚ်လောန် ၜက်တိုန်အာနူကဵုပၞောန်ဒဝိၚ်တုဲ ညးဒေသနူအရာပ်တိသဝ်ဝ် လတူဍုၚ်တံဒးပြံၚ်ဆုဲမံၚ် အကာဲအရာပရေၚ်ကာမံက်တိုန်ရ သာ်ဝွံ ဂကောံရီုဗၚ်ဟံၚ်ပြာ်မှာဇန်တံ ဟီုကဵု ဌာန်ပရိုင်သြၚ်လောန်တိုၚ်မ်ရ။
အတိုၚ်တၚ်လလောၚ်တြး အခိၚ်တ္ၚဲစေၚ် ဂိတုသိပ်တေမ်ပါ ၁ နူကဵုဌာန စၞောန်ပ္ညုၚ်ပရေၚ်ဗြဲကျာဇလဗေဒမ္ဂး ဍာ်ၜဳသြၚ်လောန်ဂှ် စိုပ်အာဒၟံၚ်လတူပၞောန်ဒဝိၚ် ဍုၚ်ဘာအၚ် ၄ ပေပြၚ်တုဲ ဍာ်ၜဳဏံ အပ္ဍဲပွိုၚ်မွဲတ္ၚဲ ဂတဏံမ္ဂး ထပ်သၠုၚ်တိုန် ၜိုတ်ကဝက်ပေပြၚ်မာန်ရောၚ် ချိၚ်လဝ်ရ။
ဟိုတ်ဂှ်ရ အပ္ဍဲပွိုၚ်ဍုၚ်ဘာအၚ် ရဲတန်တဴမံၚ်အကြာဗဒါဲဗဒါဲ ၜဳသြၚ်လောန်ကဵုဒၞာဲတိသဝ်ဝ်တံမ္ဂး ညံၚ်သ္ဂောံပါဲဓလေတ်အာ ဒၞာဲဗၠးဘဲဍာ်တံမာန်ဂှ် နူဌာနစၞောန်ပ္ညုၚ်ပရေၚ်ဗြဲကျာဇလဗေဒ ကဵုလဝ်သတိရ။
ဟိုတ်နူဍာ်ၜဳသြၚ်လောန် ပရေၚ်ဍာ်ထပ်ဇၞော်တိုန်မွဲဝါပၠန်တုဲ ပ္ဍဲဒၞာဲတိသဝ်ဝ် လ္တူဍုၚ်ဘာအၚ် မပ္တံကဵု မျာၚ်သဇေင်၊ ဂေါ်ဍိုတ်၊ ကၠဟ်ထၜိုတ်၊ အံၚ်နန်တံဂှ် ဍာ်ဗၠိုက်ဒၟံၚ်ရောၚ်။
ပ္ဍဲအခိၚ်လၟုဟ်ဏံတှ်ေ ဒပ်ပလိုတ်ပၟတ် တွဵုရးကရေၚ်ကေုာံ ဂကောံရီုဗၚ်ဟံၚ်ပြာ်တံ ပြံၚ်ဆုဲပလံၚ်ဏာလဝ် ညးဒေသဒးဆဵုဂဗမံၚ်ဘဲဍာ်တံ ဇရေၚ်ဗ္ဒိုပ်ရီုဗၚ်ဟံၚ်ပြာ်ယာယဳရောၚ်။
အပ္ဍဲဂိတုအဝ်ဂတ် လောန်ကၠုၚ်တေံဂှ် ဟိုတ်နူဗြဲဂူရိုပ်ထတ် ဍာ်ဒဵုဆၚ်စှ်ေကၠုၚ်ဂှ် ဍာ်ၜဳဍာ်ကြုၚ်တံ ဇၞော်တိုန်ကၠုၚ်တုဲ ပ္ဍဲတွဵုရးကရေၚ် မၞိဟ်လၟိဟ်ကဵုလ္ၚီပြၚ်တံ ဒးပါဲမံၚ်ပ္ဍဲဗ္ဒိုပ်ရီုဗၚ်ဟံၚ်ပြာ် ယာယဳတုဲ သီုမၞိဟ်မွဲတၠလေဝ် ဗၠိုက်ဍာ်ချိုတ်အာလဝ်ဂှ် ဂွံတီကေတ် နူဂကောံရီုဗၚ်ဟံၚ်ပြာ်မှာဇန်တံရ။
ပရိုၚ် – သြၚ်လောန်တိုၚ်မ်
Photo – CJ