ကျာ်မြဟ်၊ သိပ်တေမ်ပါ ၂
အပ္ဍဲတွဵုရးမန် ပွိုၚ်ဍုၚ်ကျာ်မြဟ် ဟိုတ်နူပရေၚ်ဍာ်ဇၞော်က္တဵုဒှ်ဒၟံၚ် ကြပ်ပေၚ်စိုပ် ၁၀ တ္ၚဲကီုလေဝ် ကွာန်ဗွဲမဂၠိုၚ်တံဂှ် ပရေၚ်ရီုဗၚ် စိုပ်ဟွံစိုပ်ဏီတုဲ စနူဍာ်သုၚ်၊ စၞစ ကေုာံ ဂဥုဲဇဗတံဂှ် ဒှ်ကၠုၚ်ပရေၚ် ပၟိက်ဇၞော်မံၚ်ကွေံကွေံရောၚ်ဂှ် ညးဒးဘဲဍာ်တံ ဟီုကဵု ဌာန်ပရိုင်သြၚ်လောန်တိုၚ်မ်ရ။
အပ္ဍဲပွိုၚ်ဍုၚ်ကျာ်မြဟ် စနူဂိတုအဝ်ဂတ် ၂၄ လောန်ကၠုၚ်တေံ ဟိုတ်နူဗြဲဂူရိုပ်ထတ် ဍာ်ၜဳကြုၚ်ကဍတ် သၠုၚ်တိုန်ဒၟံၚ်ဆက်ဆက်တုဲ ပ္ဍဲဂအုံအရာပ်ကွာန် ၁၅ ဂအုံ၊ ကွာန် ၄၀ ကွာန်ပြၚ်တံဂှ် က္တဵဒှ်မံၚ် ပရေၚ်ဍာ်ဇၞော်ရ။
သွက်ကွာန် ဒးဒုၚ်မံၚ် ဘဲဒဒိုက်ဍာ်ဗၠိုက်တံဂှ် နူလပါ်အလဵုအသဳတွဵုရးမန် ထ္ၜးဟိုတ်ပရေၚ်ဂီုကၠီုဟွံခိုဟ်တုဲ ကၠုၚ်ကဵုပရေၚ်ရီုဗၚ်တံ ဟၟဲဏီပုဟ်။
“ဍာ်ဇၞော်တိုန်ဒၟံၚ်ဂှ် ၜက်အာမွဲသတ္တာဟပြၚ်ယျ။ ပရေၚ်ရီုဗၚ်တံ စိုပ်ဟွံစိုပ်ကၠုၚ်ဏီပုဟ်။ ဂွံလဝ်နွံညိညဂှ်ရ ယှအ်တုဲစမံၚ်အိုတ်ရ။ ဍာ်လေဝ် ဟွံအောန်စှ်ေဏီပုဟ် တ္ၚဲလအ်အာမ္ဂး အေၚ်ကၠောဝ်အာအိုတ်ရောၚ်” သာ်ဝွံ ညးဒေသကွာန်ၜါသွာၚ်မွဲတၠ ဟီုကဵု ဌာန်ပရိုင်သြၚ်လောန်တိုၚ်မ်ရ။
ဟိုတ်နူ တ္ၚဲဍာ်ဇၞော်တိုန်လအ်အာဂှ်ကီု ပရေၚ်ရီုဗၚ်တံလေဝ် ဟွံစိုပ်ကၠုၚ်ဂှ်ရ စနူသ္ၚု၊ ကၠေၚ်၊ ကပေါတ်တောမ်သွ ကေုာံ ဍာ်သုၚ်တံ ပရေၚ်ကြာပ်ဇၟာပ်သ္ၚိဒှ်မံၚ်တုဲ နွံမံၚ်ပၟိက်ကဵုပရေၚ်ရီုဗၚ်အထံက်ပၚ်တံရောၚ် သ္ဂးရ။
အပ္ဍဲဂိတုအဝ်ဂတ် ၂၈ လောန်ကၠုၚ်တေံ နူကဵုအလဵုအသဳတွဵုရးမန်ဂှ် ကၠုၚ်စိုပ်အရာပ်မိစောဗု ကေုာံ အရာပ်ယျာန်မျိုဝ်အံၚ် လတူဍုၚ်ကျာ်မြဟ်တုဲ ၜိုန်ရ ကၠုၚ်ထ္ၜးစပရေၚ်ရီုဗၚ်ကီုလေဝ် သွက်ကွာန်ဗဒါဲဗဒါဲကြုၚ်ကဍတ် ဒးဒုၚ်ဍာ်ဗၠိုက် အကာဲအရာပရေံမံၚ်တံဂှ်တှ်ေ ဟိုတ်နူ ဂွိၚ်ဖေက်ကဵုပရေၚ်ဂီုကၠီုဂှ်တုဲ ပရေၚ်အာကဵုဒါန်တံ ဟၟဲပုဟ်။
ကွာန်ဗဒါဲဇိုၚ်ၜဳ ကြုၚ်ကဍတ် ကွာန်ကမနာမ်၊ သၞေဟ်ဍုၚ်၊ ဍာ်တဴ၊ ကဍတ်၊ လမုခို၊ လှာကဇိုင်၊ ဥုလေဝ်၊ ဖာသိမ်၊ ကလိုင်ကနိုင် ကေုာံ ကွာန်ၜါသွာၚ် သီုဖအိုတ် ၄၀ ကွာန်ပြၚ်တံ ပရေၚ်ဍာ်ဇၞော်တိုန်ဏံ က္တဵုဒှ်မံၚ် အကာဲအရာပရေံကွေံကွေံရ။
မွဲလပါ်ပၠန်လေဝ် ဟိုတ်နူဍာ်ဇၞော်မံၚ် လံကဵုတ္ၚဲတုဲ သီုကဵုကပေါတ် ညးဗြဴတံစကာသုၚ်စောဲ စပ်ကဵုလွဳလွတ် ပရေၚ်ထတ်ယုက်တံလေဝ်နွံမံၚ်ပၟိက် ပရေၚ်အထံက်ပၚ်တံကီုရ။
ဟိုတ်နူဍာ်ဇၞော်တိုန်တုဲ ပ္ဍဲပွိုၚ်ဍုၚ်ကျာ်မြဟ် အိန်ထံၚ်ကြပ် ၇၀၀၀၊ လၟိဟ်မၞိဟ် ၃၂၀၀၀ ပြၚ်တံ ဒးဆဵုဂဗမံၚ် ပရေၚ်ဘဲဒဒိုက်ဍာ်တုဲ ဒးပံက်လဝ်ဗ္ဒိုပ်ရီုဗၚ်ဟံၚ်ပြာ် ယာယဳ ၂ ဒၞာဲရ။
သွက်ပရေၚ်ဘဲဍာ် ပ္ဍဲပွိုၚ်ဍုၚ်ကျာ်မြဟ်ဂှ် ဂကောံရီုဗၚ်ဟံၚ်ပြာ် ကေုာံ ညးဍုၚ်ကွာန်ဒေသတံဟေၚ် ဗိုၚ်ရီုဗၚ်မံၚ်ညးသ္ကံတုဲ အာကဵုဒါန်ရေၚ်တၠုၚ်ဖန်ဖက်မံၚ်ကီုလေဝ် သွက်သ္ဂောံစိုပ်အာသီုကွာန်ဖအိုတ်တံဂှ် ဖဍိုက်ပေၚ်ကဵု ဟွံမာန်ဏီပုဟ်။
ပရိုၚ် – သြၚ်လောန်တိုၚ်မ်
Photo – CJ