ကျာ်မြဟ်၊ သိပ်တေမ်ပါ ၂
အပ္ဍဲတွဵုရးမန် ပွိုၚ်ဍုၚ်ကျာ်မြဟ် ကေုာံ ပွိုၚ်ဍုၚ်ၜဳကလေၚ်တံဂှ် က္တဵုဒှ်ဒၟံၚ်ပရေၚ်ဘဲဍာ်ဇၞော်တိုန် ဗွဲမသကာတ်မြဟ်ကီုလေဝ် ညးဒးဒဒိုက်ပရေၚ်ဘဲဍာ်လၟိဟ်လက်ပြၚ်ဏံဂှ် နူကဵုအလဵုအသဳဟွံဂွံလဝ်ပရေၚ်ရီုဗၚ် အထံက်ပၚ်ဏီပုဟ်၊ ညးဒးဒဒိုက်ဘဲဍာ်တံ ဟီုကဵု ဌာန်ပရိုင်သြၚ်လောန်တိုၚ်မ်ရ။
အပ္ဍဲပွိုၚ်ဍုၚ်ကျာ်မြဟ် စနူဂိတုအဝ်ဂတ် ၂၄ လောန်ကၠုၚ်တေံတုဲ ဟိုတ်နူဗြဲဂူရိုပ်ထတ် ဍာ်ၜဳကြုၚ်ကဍတ် သၠုၚ်တိုန်ဒၟံၚ်ဆက်ဆက်တုဲ ပ္ဍဲဂအုံအရာပ်ကွာန် ၁၅ ဂအုံ၊ ကွာန် ၄၀ ကွာန်ပြၚ်တံဂှ် က္တဵုဒှ်မံၚ် ပရေၚ်ဍာ်ဇၞော်ရောၚ်။
တုပ်သာ်ဂှ်ကီု ပ္ဍဲပွိုၚ်ဍုၚ်ၜဳကလေၚ် ဂှ်လေဝ် စနူဂိတုအဝ်ဂတ် ၂၆ တေံဂှ် ဟိုတ်နူဍာ်ကြုၚ် ၜဳကလေၚ်သၠုၚ်တိုန်တုဲ ဒၞာဲအရာပ်တိသဝ်ဝ် ကွာန်ဟွံအောန်နူ ၁၇ ကွာန်တံဂှ် ပရေၚ်ဍာ်ဇၞော်က္တဵုဒှ်မံၚ်ရ။
ညးဒးဒဒိုက်ဘဲဍာ်တံဂှ် နကဵုအစဳဇန်ဇကုဇကု ဒးပြံၚ်ပဆုဲမံၚ်စံၚ်အာ သ္ၚိဗဒါဲဒၞာဲသၠုၚ်ၚ်တံကဵု ဘာလကျာ်တံတုဲ ညိလေဝ်ပရေၚ်ရီုဗၚ် နူကဵုအလဵုအသဳပၞာန် ဟွံဂွံလဝ်ဏီပုဟ်ဂှ် ညးဒေသကျာ်မြဟ်မွဲတၠ ဟီုကဵု ဌာန်ပရိုင်သြၚ်လောန်တိုၚ်မ်ရ။
“အကာဲအရာပရေၚ်ဍာ်ဇၞော်ဂှ် သၠုၚ်တိုန်ဒၟံၚ်ညိညိရ။ သၠုၚ်ၜက်အာ နူမၞိဟ်ယျလေဝ်။ ဍာ်ဗၠိုက်ဒၟံၚ်ဂှ် နွံကြပ်ၜါသတ္တာဟယျ။ ပြံၚ်အာသ္ၚိဗဒါဲဒၞာဲသၠုၚ်ၚ်ရ။ မံၚ်ပ္ဍဲဘာလကျာ်၊ ဗီုဏံရ ဂေတ်ဂေၚ်မံၚ်အာရ။ ပရေၚ်ရီုဗၚ်နူအလဵုအသဳ မုလေဝ်ဟွံဂွံပုဟ်။ အခက်အခုဲဂှ်တှ်ေ ပ္ဍဲဒၞာဲပရေၚ်စသုၚ်တံ ဒှ်အခက်အခုဲရ” သာ်ဝွံ သ္ဂးရ။
တုဲပၠန် ဟိုတ်နူဍာ်ဗၠိုက်အာတ္ၚဲလအ်အာတုဲ ကပေါတ်စၞစသ္ဇိုၚ်၊ ဍာ်သုၚ် ပါဲနူဂှ်ပၠန် သွက်ညးယဲတံဂှ် စနူဂဥုဲနွံကၠုၚ်ပၟိက်တုဲ ဟိုတ်နူအလဵုအသဳပၞာန် ဟွံကဵုပရေၚ်ရီုဗၚ်ဂှ်ရ ၜိုတ်နွံကဵုနွံဒးသောၚ်ကလး ဖန်ဖက်အာမံၚ်ကေတ်တ်ဂှ် ညးဆက်ဟီုရ။
အပ္ဍဲပရေၚ်ဘဲဍာ်ဇၞော်ဏံ ညးတၠဒါန်တံကီု ဂကောံပရဟိတတံဟေၚ် ဗိုၚ်ထံက်ပၚ်ကဵုဒၟံၚ်တုဲ နူလပါ်အလဵုအသဳပၞာန်ဂှ်တှ်ေ မုပရေၚ်ရီုဗၚ်မွဲသာ်မှ ကဵုလဝ်အထံက်ပၚ်ဟၟဲဏီပုဟ်ဂှ် ညးဒေသၜဳကလေၚ် မွဲတၠ ဟီုကဵု ဌာန်ပရိုင်သြၚ်လောန်တိုၚ်မ်ရ။
“ယဝ်ရရံၚ်အာကဵုပွိုၚ်ဍုၚ် ၜဳကလေၚ်မ္ဂး ကွာန်ဍာ်ဗၠိုက်ဒၟံၚ်တံဂှ် စနူနာတ်ကျဳတုဲ စဵုစိုပ်လပါ်လိက်ခုၚ် (စးအရုတ်) ၜိုတ် ၁၇ ကွာန်နွံရ။ နူဂကောံမွဲ ကၠုၚ်ကဵုဒါန်ပုၚ်ဂွဳ သွက်နူဂယး။ ဣဏံလေဝ် ညးဍုၚ်ကွာန်တံရ၊ တုဲတှ်ေ မာမာမွဲထုပ်၊ မာမာကဵုသ္ၚုတံ ကၠုၚ်ကဵုဒါန် မွဲဂကောံကီုရ၊ ဂကောံပရဟိတတံဟေၚ် ၜိုတ်ဇကုအစောံနွံဂှ် ဗိုၚ်ထံက်ပၚ်ရ။ အလဵုအသဳလၟုဟ်ဏံ ကၠုၚ်ရီုဗၚ်ကဵုလဝ် မွဲသာ်မှဟၟဲဏီပုဟ်” သာ်ဝွံ သ္ဂးရ။
မွဲလပါ်ပၠန်ဂှ် အလဵုအသဳတွဵုရးမန် နူဒပ်ပၞာန်ပြံၚ်လှာဲလဝ်ဗီုပြၚ်ဂှ် ပ္ဍဲဂိတုအဝ်ဂတ် ၂၈ လောန်ကၠုၚ်တေံ ပ္ဍဲပွိုၚ်ဍုၚ်ကျာ်မြဟ် ၜိုန်ရကၠုၚ်ရီုဗၚ်ကဵုလဝ် စၞစဇွောံမလ္ၚဵု ကုညးဒးဒဒိုက်ပရေၚ်ဘဲဍာ် ၁၃၀ ပြၚ် နကဵုထ္ၜးစဗီုကီုလေဝ်၊ သွက်ဒၞာဲတၞဟ်ဟ်တံဂှ်တှ်ေ ထ္ၜးဟိုတ် ပရေၚ်ဂီုကၠီုဟွံမွဲတုဲ အာကဵုဒါန်ရီုဗၚ်လဝ်တံဟၟဲပုဟ်။
ပ္ဍဲလက်ထက်အလဵုအသဳ NLD တေံ ယဝ်ရပရေၚ်ဍာ်ဇၞော်က္တဵုဒှ်မ္ဂး သ္ကိုပ်ဝန်ဇၞော်ကီု ညးတာလျိုၚ်တံကီု ပံက်လဝ်ရုၚ်က္ဍိုက်ပ် သွက်ဘဲဒဒိုက်ဍာ်တုဲ နကဵုအလဵုဇကုညးတံ စဳရေၚ်ဖန်ဖက်ကဵုမံၚ်ဂှ်ရ သွက်ညးဒးဒဒိုက်ပရေၚ်ဘဲဍာ်တံ ကေၚ်ဂွံလဝ်ပရေၚ်ရီုဗၚ် ဗွဲမဂၠိုၚ်နွံရောၚ်ဂှ် ညးဒေသတံ သ္ဂးရ။
ပ္ဍဲအခိၚ်လၟုဟ်ဏံတှ်ေ ညးဒးလဝ်ဒဒိုက်ဘဲဍာ်ဗွဲမဂၠိုၚ် ကလိဂွံလဝ်ပရေၚ်ရီုဗၚ်နူအလဵုအသဳပၞာန်ဟၟဲတုဲ ကပေါတ်စၞစသ္ဇိုၚ်၊ ဍာ်သုၚ်၊ ဂဥုဲဇဗနာနာတံ ပါဲနူဂှ်ပၠန် စနူကပေါတ်စကာညးဗြဴတံလေဝ် နွံမံၚ်ပၟိက် ပရေၚ်အထံက်ပၚ်ရောၚ် ဂွံတီရ။
အပ္ဍဲတွဵုရးမန် သွက်ညးဒးဘဲဍာ် ပ္ဍဲပွိုၚ်ဍုၚ်ကျာ်မြဟ်ကေုာံ ပွိုၚ်ဍုၚ်ၜဳကလေၚ်တံဂှ် ဂကောံပရဟိတ၊ ညးတၠဒါန် ကေုာံ ညးဒေသတံဟေၚ်က္ဍိုက်ပ်တုဲ နကဵုဇြဟတ်ဇကုဇကုၜိုတ်သ္ပမာန် ကၠောန်ကဵုမံၚ် ပရေၚ်အရီုဗၚ်တံနွံမံၚ်ရောၚ် ဂွံတီရ။
ပရိုၚ် – သြၚ်လောန်တိုၚ်မ်
Photo – CJ