ထဝါဲ၊ သိပ်တေမ်ပါ ၃
အပ္ဍဲကဵုရးတၞၚ်သဳ ပွိုၚ်ဍုၚ်ထဝါဲ ဒေသဂြိုပ်ဗမံက်ဂှ် ဒပ်ပၞာန်သီအဝဵု ဟိုတ်နူကြဳဗုမ် လတူကွာန်လ္ၚဵုတံတုဲ ညးဒေသလၟိဟ်ကဵုလ္ၚီပြၚ်တံ ဒးပါဲဓလေတ်ဒၟံၚ်ဘဲအိုတ်ရဂှ် ရိုဟ်ကၞက်ပရိုၚ်ဒေသတံ ဟီုကဵု ဌာန်ပရိုၚ် သြၚ်လောန်တိုၚ်မ်ရ။
စနူဂိတုသိပ်တေမ်ပါ ၁ ဂှ် ကရောၚ်ပၞာန်ဒပ်ဗမာ ဇြဟတ် ၁၅၀ ပြၚ်တံ ထပက်ပၞာန်လုပ်ကၠုၚ် ပ္ဍဲဒေသဂြိုပ်ဗမံက်ထဝါဲတုဲ နူဗလးကျာဂှ် ကြဳဖျေံဗုမ်ရ။
ဟိုတ်နူဒပ်ပၞာန်ဗမာ ကြဳဗုမ်တုဲ ဒတုံစှ်ေခတိုဟ်အာ အကြာကရပ်ကွာန်ဍာ်ဗိုၚ် ဒေသဂြိုပ်ဗမံက်ထဝါဲကီုလေဝ် မၞိဟ်ဒးဝပ်ချိုတ်ဟၟဲပုဟ် သ္ဂးရ။
ပြဟ်ဟ်ဏံ ဟိုတ်နူဒးလဝ်ဘဲဗုမ်ပၞာန်ကျာ ဒပ်ပၞာန်ဗမာတုဲ ညးဒေသ ၁၀၀၀ ပြၚ် နူကွာန်ယေဝ်အိုၚ်၊ ပခါတ်အေန်၊ ကုၚ်ကၚ်၊ ကြုင်အေဲအိုက် ကေုာံ ကွာန်ဍာ်ဗိုၚ်တံ ဒးပါဲဓလေတ်ဒၟံၚ် ဇရေၚ်ဒၞာဲဗၠးဘဲမာန်တံဂှ်ရ။
အပ္ဍဲဂိတုသိပ်တေမ်ပါ ၂ ဂှ် ကရောၚ်ပၞာန်ဗမာ စိုပ်ကၠုၚ် ကရပ်ကွာန်ယေဝ်အိုၚ်တုဲ အကာဲအရာပၞာန် အကြာၜါလပါ် အကာဲအရာကြံၚ်မ္ၚိုဟ် ဒှ်မံၚ်ကဵု ဂကောံဇြဟတ်ပၠန်ဂတးဒေသတံရ။
ပရေၚ်ကရောၚ်ပၞာန် ထပက်ကၠုၚ်ဏံဂှ် ပ္ဍဲဂိတုအဝ်ဂတ် ၂၉ လောန်ကၠုၚ်တေံ ဟိုတ်နူပေါဲဗတိုက်ၜါလပါ် က္တဵုဒှ်လဝ် ပ္ဍဲကရပ်ကွာန်မံၚ်မေဝ်ယှံၚ်ဂှ် ဒပ်ပၞာန်ဗမာ ဒးလဝ်ဝပ်ဂိအာတုဲ ထပ်ကလေၚ်ထပက်ကၠုၚ်ကရောၚ်ပၞာန် နကဵုဇြဟတ် ဂၠိုၚ်ၚ်ရောၚ် ရဲလပါ်ဂကောံဇြဟတ်ပၠန်ဂတးတံ သ္ဂးရ။
အပ္ဍဲကဵုပေါဲဗတိုက်ဒှ်လဝ် ပ္ဍဲကရပ်ကွာန်မံၚ်မေဝ်ယှံၚ်ဂှ် နူလပါ်ကရောၚ်ပၞာန်ဗမာ ကောန်ပၞာန် ၁၅ တၠ ချိုတ်အာတုဲ သီဂွံလဝ် သေနာတ် ၈ ဇကိုအ်ကဵု ကပေါတ်ဆက်စပ်တံနွံမံၚ်ရောၚ်ဂှ် နူကရောၚ်ပၞာန်ဒူရက ပတိတ်လလောၚ်တြးလဝ် ပရိုၚ်ရ။
ပရိုၚ် – သြၚ်လောန်တိုၚ်မ်
ရုပ် – Social Media