မတ်မလီု၊ သိပ်တေမ်ပါ ၃
အပ္ဍဲတွဵုရးမန်ဂှ် နကဵုအလဵုဇကု သ္ကိုပ်ပရေၚ်အုပ်ဓုပ်အရာပ် ကွာန်လ္ၚဵုတံဂှ် ဗက်ရပ်ကေတ်ဒၟံၚ် သၟတ်လုပ်အဝေါၚ် ပရေၚ်ယိုက်ဝန်ပၞာန်တံတုဲ ပလံၚ်ဗ္စိုပ်မံၚ်ကဵု ဘာတန်ဗတောန်ပၞာန်တံ နွံကၠုၚ်ဂှ် ညးဒေသတံ ဟီုကဵု ဌာန်ပရိုင်သြၚ်လောန်တိုၚ်မ်ရ။
ဒပ်ပၞာန်သီအဝဵု နွံဒၟံၚ်ပၟိက်ကဵု ကောန်ပၞာန် သွက်ဂွံတိုန်ဘာ တန်ဗတောန် ပရေၚ်ယိုက်ဝန်ပၞာန် ပံက်မံၚ်လၟေၚ်ဂိတုတံနွံတုဲ ညံၚ်ဂွံဒးပကောံကဵု ပရေၚ်ယိုက်ဝန်ပၞာန်တံဂှ် ကဵုဒၟံၚ်ဇြဟတ်ဟရိုဟ် ကုသ္ကိုပ်ပရေၚ်အုပ်ဓုပ်တံ ဆက်ဆက် ကၠောန်ကၠုၚ်လဝ်ရ။
ဟိုတ်နူ ပရေၚ်ဇြဟတ်ဟရိုဟ် နူကဵုဒပ်ပၞာန်တုဲ သ္ကိုပ်ပရေၚ်အုပ်ဓုပ် လ္ၚဵုတံဂှ် ရပ်ကေတ်သၟတ်အပ္ဍဲဒေသတံကီု သီုကဵုမၞိဟ်အာတရဴလ္ၚဵု တံကီု ဆက်စၠောံကဵုဒပ်ပၞာန်တုဲ ပလံၚ်ဗ္စိုပ်မံၚ် ဇရေၚ်ဘာတန် ဗတောန်ပၞာန်တံရောၚ်။
အခိၚ်ကၠာတေံမ္ဂး ပရေၚ်ပကောံကောန်ပၞာန် စပ်ကဵုယိုက်ဝန်ပၞာန် တံဂှ် သ္ကိုပ်ပရေၚ်အုပ်ဓုပ်တံ ရာန်ကေတ်သၟတ် ဒးဒုၚ်ရပ်လဝ် နူကဵုဒပ်ပၞာန်ကဵု ဒပ်ဗၠာဲသၟိၚ်တံနွံတုဲ လၟုဟ်ဏံတှ်ေ နကဵုအလဵုဇကု ညးတံ ဗက်ရပ်ကေတ်တုဲ ပကောံကၠုၚ် ပရေၚ်ယိုက်ဝန်ပၞာန်တံရ။
အပ္ဍဲကဵုဗက်ရပ်မံၚ် ပရေၚ်ယိုက်ဝန်ပၞာန်ဂှ်တှ်ေ သွက်သၟတ်ဒးဒုၚ်ရပ် ဂွံကလေၚ်ဗၠးတိတ်ကၠုၚ်ဂးတုဲ နူကဵုသ္ၚိကၟိန်အိန်ထံၚ် ဆေၚ်စပ်တံဂှ် သ္ကိုပ်ပရေၚ်အုပ်ဓုပ်လ္ၚဵုတံ အာတ်ကေတ်ဒၟံၚ်သြန် လၟိဟ်ကိုတ်ကဵုကၠမ် တံ နွံကၠုၚ်ရ။
သ္ကိုပ်ပရေၚ်အုပ်ဓုပ်တံဂှ် ကေတ်လဝ်ဓယံက် ဒပ်မံၚ်ကွာန်(ပြည်သူ့စစ်) ဂကောံဗတိုက်ပလီုပရေၚ်ပကီုပရာတ် ပ္ဍဲအရာပ်ကွာန်တံသၟးဟွံက ကေတ်ဇၞးကဵုလွဟ်ဍေံတံရပ်လဝ်ဂှ်တုဲ ကၠောန်ဒၟံၚ်ဗီုဍေံတံ ဒးစိုတ်ရောၚ် ညးဒေသတံ သ္ဂးရ။
အပ္ဍဲတွဵုရးမန် သ္ကိုပ်ပရေၚ်အုပ်ဓုပ် နူကဵုအလဵုအသဳ ခါန်ကၞက်လဝ် တံဂှ် နူကဵုဒပ်ပၞာန်ကဵုလဝ်အခေါၚ်ရပ်လွဟ် ညံၚ်ရဴလုပ်သၞောဝ်ကီုရ။
မွဲလပါ်ပၠန်လေဝ် သၟတ်စိုပ်အဝဲ လုပ်အဝေါၚ်ပရေၚ်ယိုက်ဝန်ပၞာန်မ္ဂး သ္ကိုပ်ပရေၚ်အုပ်ဓုပ်တံ ပလံၚ်ဗစိုပ်ဏးလိက်ရုၚ်ကော်ကီု ဂၠံက်ကေတ်မာဲ ရုဲစှ်ဏာသၟးဟွံက ယဝ်ရယောၚ်ယာအာ ပရေၚ်စုတ်စရၚ်ယၟု ယိုက်ဝန်ပၞာန်မ္ဂး ကုသ္ၚိကၟိန်အိန်ထံၚ်တံဂှ် စုတ်ထောံစရၚ်ယၟုလီုရောၚ် ဘပဠမံၚ်လေဝ် နွံရ။
သွက်ပရေၚ်ယိုက်ဝန်ပၞာန် ပ္ဍဲအရာပ်ကွာန်တံ အိန်ထံၚ်မွဲမွဲမ္ဂး သ္ကိုပ်ပရေၚ်အုပ်ဓုပ်လ္ၚဵုတံ ကံက်ဒၟံၚ်သြန် စနူ ၁၀၀၀၀ စဵုကဵု ၃၀၀၀၀ နွံတုဲ ကလေၚ်ရာန်ကေတ်မၞိဟ် ထပက်အဇာညးယိုက်ဝန်ပၞာန်တုဲ ပကောံကဵုလဝ် ကောန်ပၞာန် သွက်ဒပ်ပၞာန်တံ နွံရ။
အတိုၚ်တင်နၚ် ဌာန်ပရိုၚ် သြၚ်လောန်တိုၚ်မ် ပကောံဂွံလဝ်မ္ဂး အပ္ဍဲတွဵုရးမန် တန်ဗတောန်ယိုက်ဝန်ပၞာန် ပံက်ဒၟံၚ်လၟေၚ်ဂိတု နူလၟေၚ် ၁ စဵုကဵုလၟေၚ် ၂၇ ဏံ ဒးဒုၚ်ပကောံ ကောန်ပၞာန်တၟိ ဟွံအောန်နူကဵု ၅၆၀၀ တၠ နွံမံၚ်ရောၚ်။
ပရိုၚ် – သြၚ်လောန်တိုၚ်မ်
ဗီုရုပ်-MOI