မတ်မလီု၊ သိပ်တေမ်ပါ ၃
အပ္ဍဲကဵုဍုၚ်မတ်မလီု ဍုၚ်ဇၞော်မဟာတွဵုရးမန်ဂှ် ဂၠံၚ်ဍာန်ညးဍုၚ်ကွာန် စကာသုၚ်စောဲဂၠိုၚ်ဂှ် လီုမံၚ်အိုတ်စောန်ကီုလေဝ် နူဂကောံအလဵုအသဳတွဵုရးမန် ဗၜေက်လဝ်မတ် ဟွံပလေဝ်ကဵုပုဟ် ညးဒေသတံ ဟီုကဵု ဌာန်ပရိုင်သြၚ်လောန်တိုၚ်မ်ရ။
သီုကဵုဂၠံၚ်ဇၞော်ကၟိန်ဍုၚ်ကီု စနူကဵုဂၠံၚ်ဇျှော်ဟရော် ဍာန်ဍောတ်တ် ဒှ်ဂၠံၚ်အဓိကလတူဍုၚ်တံဂှ် ဟိုတ်နူဗြဲဂူတုဲ ပရေၚ် ပလေဝ်ပလေတ်လေဝ်ဟၟဲကီု ဒှ်မံၚ်ဟလံက်ဟနက်တံ လီုမံၚ်အိုတ်အစောန်တုဲ ပရေၚ်အာကၠုၚ် ဒှ်မံၚ်အခက်အခုဲရောၚ်။
ၜိုန်ရဂၠံၚ်ဗွဲမဂၠိုၚ် လီုမံၚ်ဗီုဏံအိုတ်စောန်ကီုလေဝ် နူဌာနဂၠံၚ်ဍာန် ပရေၚ်ဗဂဵုလဟဵုသာယာ သၟဝ်ဂကောံအလဵုအသဳတွဵုရးမန် ဂှ် ပရေၚ်ပလေဝ်ပလေတ်စ မွဲသာ်မှ ဟွံကၠောန်ပတုဲလဝ်ဏီပုဟ်။
ဂၠံၚ်ဗွဲမဂၠိုၚ် လီုလာ်ဂၠိုၚ်မံၚ်တုဲ ပ္ဍဲအဟိန်အာမံၚ်ဂၠံၚ်တံမ္ဂး ပါဲနူဒးဒှ်မံၚ် ပရေၚ်ပထုဲပလီုစိုတ်ဟွံမိပ်တုဲ ပရေၚ်လဇုဲလဇတံလေဝ် နွံမံၚ်ရောၚ် ညးဒဳကွဳစက်မွဲတၠ ဟီုရ။
“လီုလာ်ဒၟံၚ်ဂှ်တှ်ေ လီုမံၚ်ဗွဲမဂၠိုၚ်ရ။ သီုလပါ်ဖျာဂလာ ကဵု လပါ်ဖက်ခေန်တံလေဝ် ဂၠံၚ်လီုဒၟံၚ်တုဲ သွက်ရဲဒဳစကွဳစက် ဗီုပိုဲတံတှ်ေ ဒးအာဂၠံၚ်ဂှ် စိုတ်ဟွံမိပ်ပုဟ်။ တုဲတှ်ေ လဇုဲလဇအာ ကွေံကွေံရ။ ဟွံကလေၚ်ပလေဝ်ကဵု ဂၠံၚ်တံပုဟ်။ စွံလဝ်အတိုၚ်ဏံတုဲ အတိုၚ်ဏံပၠန်ရ။ ဒှ်ဒၟံၚ်ဗီုတြေံတေံ`ပကန်” သာ်ဝွံ သ္ဂးရ။
ဟိုတ်နူ ဂၠံၚ်ဗွဲမဂၠိုၚ်လီုလာ်ဒၟံၚ်တုဲ မၞိဟ်လ္ၚဵုတံ လိုန်ဒးဒၞာဲဟလံက်ဟနက်တုဲ ကွဳလိုန်ဓါတ်ဗကပ်အာလဝ် နွံမံၚ်၊ မၞိဟ်လ္ၚဵုတှ်ေ ပါဲဓလေတ်ဟလံက်ဟနက်တုဲ ဒဳအာမံၚ်ကီုလေဝ် ဒှ်အာလဝ် ပရေၚ်ဘဲအန္တရာဲကွဳစက်ယာန်တံလေဝ် နွံမံၚ်ကီုရောၚ် ညးဆက်ဟီုရ။
ၜိုန်ရ ဂၠံၚ်တံဏံလီုမံၚ်ကီုလေဝ် နူဌာနဗဂဵုလဟဵု ဟွံပလေဝ်ကဵုတုဲ အတိုၚ်ပၟိက်ဆန္ဒဇကု ကဵုဒါန်ပလေဝ်ကဵုကီုလေဝ် အခေါၚ်ပလေဝ် ဟွံမွဲပုဟ် ဌာနဆေၚ်စပ်တံဟီုတုဲ ကလေၚ်ပလီုထောံဂှ်လေဝ် နွံရောၚ် ညးဒေသမွဲတၠပၠန် ဟီုကဵု ဌာန်ပရိုင်သြၚ်လောန်တိုၚ်မ်ရ။
“ဂၠံၚ်တံဂှ် နူဌာနပရေၚ်ဗဂဵုလဟဵု ဟွံပလေဝ်ပလေတ်ကဵုပုဟ်လေဝ်။ ပ္ဍဲဍုၚ်မတ်မလီု သ္ကုတ်ဒိုၚ်ဝေန်ကွေၚ် (ဒိုင်ဝင်ကွင်း) ဏံဂှ် ဂၠံၚ်ဗွဲမဂၠိုၚ် လီုလာ်အိုတ်ယျ။ သွက်ဂွံပလေဝ်ဂၠံၚ် လီုလာ်မံၚ်ဇၞော်ဇၞော်တံ ယဝ်ရဒှ်မ္ဂး နကဵုပၟိက်စိုတ်ဇကု ကဵုဒါန်တုဲ ပလေဝ်တှ်ေလေဝ် ဟွံဂွံအခေါၚ်ပုဟ်။ ယဝ်ရပလေဝ်ဗီုဏံမ္ဂး အခေါၚ်ဏံ အာတ်လဝ်ဇရေၚ်ညးလဵုရော ဟီုတုဲ ပရေၚ်ပလေဝ်လဝ်တုဲတုဲတံဂှ်လေဝ် ကလေၚ်ပလီုထောံရ” သာ်ဝွံ သ္ဂးရ။
အပ္ဍဲသၞာံပရေၚ်ဘဏ္ဍာ ၂၀၂၆-၂၀၂၇ ဂှ် ဂကောံအလဵုအသဳတွဵုရးမန် ဂွံအခေါၚ်စကာသြန်ဂအုံ ဗါတ်ဂျက် သြန်ဒကေဝ် ၇၆,၄၀၀ ပြကောတိကိုတ် ပြၚ်နွံတုဲ၊ အပ္ဍဲဂှ် ဂကောံဗဂဵုလဟဵုပရေၚ်သာယာ ကေုာံ ဌာနဂၠံၚ်ဍာန်တံ မွဲဌာနမ္ဂး ဂွံအခေါၚ်စကာ သြန်ဂအုံဗါတ်ဂျက် သြန်ဒကေဝ် ၁၀,၀၀၀ ပြကောတိကိုတ် ပြၚ်နွံတုဲ ဒှ်ဌာန ပရေၚ်စကာ သြန်ဂၠိုၚ်အိုတ်ရ။
အခိၚ်လၟုဟ်ဏံ ဟိုတ်နူဂၠံၚ်တံဏံလီုလာ်မံၚ်ဂှ် နကဵုဇြဟတ် ဇကုကဵုဇကု ညးဒေသတံဒးကၠောန်မံၚ် သွက်သ္ဂောံဗဝ်စုတ်တိ ပ္ဍဲဒၞာဲဟလံက်ဟနက်တံ သၟးဟွံက ညံၚ်ညးဒဳကွဳစက်တံ ဂွံတီအာ ဒဒှ်ရ ဂၠံၚ်လီုမံၚ်တံဂှ် သွက်သ္ဂောံစွံကဵုတင်စၟတ် ဂတဵုမုက်မွဲမွဲဂှ်လေဝ် ဒးကၠောန်ကဵုမံၚ်အိုတ်ရောၚ်။
စပ်ကဵုပရေၚ်ဍုၚ်မတ်မလီုတုဲ သ္ကိုပ်ဝန်ဇၞော်တွဵုရးမန် ဥူအံၚ်ဝေန်ထောန် ဟီုကြီုလဝ် သွက်သ္ဂောံကၠောန်အာ ညံၚ်ဂွံဒှ်ဍုၚ် Smart City ကီုလေဝ်ပ္ဍဲအခိၚ်လၟုဟ် ဟိုတ်နူပရေၚ်ပလေဝ်ပလေတ် ဂၠံၚ်လီုလာ်တံဟွံမွဲတုဲ အပ္ဍဲအကြာညးဒေသတံမ္ဂး ပရေၚ်ပါ်ပါဲတံ သၠုၚ်တိုန်ဒၟံၚ်ရောၚ်။
ပရိုၚ် – သြၚ်လောန်တိုၚ်မ်
ဗီုရုပ်-CJ