ဗေကျေန်၊ သိပ်တေမ်ပါ ၃
အကြာပယျဵု ကြုက် ကေုာံ နဳပဝ် ဂၠံၚ်ဇၞော်ပတဝ်လဝ်က္ဍိုပ် ဇရေၚ်ဒေသဂရဳယောန် မဒှ်ဂၠံၚ်တတ်ပယျဵုဂှ် ဟိုတ်နူဘဲဍာ် ဒးလီုလာ်အာတုဲ ပ္ဍဲအကြာပွိုၚ်မွဲသတ္တာဟဟေၚ် ကလေၚ်သိုၚ်ခၞံတုဲဒှ်အာ ပေၚ်ၚ်ရဂှ် ဂွံတီရ။
ပ္ဍဲလပါ်လတူ ပယျဵု နဳပဝ်-တိဗက် ပ္ဍဲသတ္တာဟလောန်ကၠုၚ်တေံ ဟိုတ်နူတၟံဍာ်ကလောအ်မွဲ လိုက်သရိုဟ်စှ်ေအာတုဲ ဂၠံၚ်ပယျဵုတံ လီုလာ်အာဇၟာပ်ပ်ဒၞာဲတုဲ တၟံဍာ်ကလောအ်ဂမၠိုၚ်၊ တၟံတံ ဂဗေၚ်တံ ဇွောဝ်စှ်ေအာ သၟဝ်အကြဒဵုဇြဟ်တံရ။
ဂၠံၚ်ဏံဂှ် ဒှ်ဂၠံၚ်ပလံၚ်ဗ္စိုပ် ပရေၚ်ကူသာန်ဗၞိက် အဓိက အကြာကြုက် ကေုာံ နဳပဝ်တံတုဲ၊ ဒှ်သ္ကုတ်ဒေသ နူဒေသဟိမဝန္တာမွဲ မဒှ်ရ။
ပ္ဍဲပယျဵုနဳပဝ် သွက်ရဲအာတရဴတံ ရဲပလံၚ်ကပေါတ်ဗၞိက်တံ သ္ဂောံစကာတတ်အာ ဇၞောဝ်ဒဵုတံဏံတုဲ စိုပ်အာ ဇရေၚ်ဍုၚ်ရာဆူဝါဝါဒီ ဂှ်လေဝ် ဒှ်ဂၠံၚ်အဓိကမွဲ မဒှ်ရ။
ဟိုတ်နူဂၠံၚ်ဏံ လီုလာ်အာတုဲ သွက်ဂကောံရီုဗၚ်ဟံၚ်ပြာ်တံ သ္ဂောံစိုပ်အာ ဒေသလ္ၚဵု ပ္ဍဲလပါ်ရးနိဂီုကြုက် ဒးဒုၚ်ဘဲဍာ်ပရေံအိုတ်စောန်တံမာန်ဂှ် ဒှ်အာအခက်အခုဲရ။
အတိုၚ်ဌာန်ပရိုၚ်ရုပ်ရမျှာၚ်အလဵုအသဳကြုက် CCTV ထမံက်ထ္ၜးမ္ဂး၊ သ္ကုတ်လက္ကရဴအိုတ် ဂၠံၚ်ဏံ ပ္ဍဲဂိုတုသိပ်တေမ်ပါ ၂ ဂှ် ကလေၚ်ပံက်လဝ်တုဲ၊ ပ္ဍဲအခိၚ်လၟုဟ်တှ်ေ ဂကောံရီုဗၚ်ဟံၚ်ပြာ်တံ စိုပ်ကၠုၚ်ဗွဲမဂၠိုၚ်တုဲ ဂစာန်ဂၠိုက်ဂၠာဲမံၚ် ညးကၠေံဒၟံၚ်တံ နကဵုအသိၚ်ဇၞော်ဇၞော်ရ။
နူလပါ်ကြုက် ကလေၚ်ဖံက်ဂၠံၚ်ဏံ တုဲဒှ်အာတုဲ ကြဴနူရဲရီုဗၚ်နဳပဝ်တံ စကာၜၚ်ကျာဟေလ်လဳကဝ်ပတာ ကေုာံ ပရေၚ်ရီုဗၚ်နူဗလးကျာတၞဟ်ဟ်တံတုဲ ပလံၚ်ဗ္စိုပ်ဏာ ညးဟွံအောန်နူကဵု ၁၁၈ တၠ ဇရေၚ်ဒၞာဲဂီုကၠီုနွံနွံ တုဲဒှ်အာရ။
ပ္ဍဲမၞိဟ် ၁၁၉ တၠ ဟံၚ်ပြာ်ဂွံလဝ်တံဂှ် ကောန်ဍုၚ်နဳပဝ် ၁၁၈ တၠ ကေုာံ ကောန်ဍုၚ်အဂႅလိက် ၁ တၠ ပါလုပ်မံၚ်ရောၚ်ဂှ် ဒပ်ပၞာန်နဳပဝ် ဟီုလဴရ။
ကောန်ဍုၚ်အဂႅလိက်ဂှ် ဒှ်ညးတၠစေတနာ ပရေၚ်ရီုဗၚ် စိုပ်မံၚ် နဳပဝ်ဂှ် ဗွဲကြဴနူဂှ်မှ ဂွံတီကေတ်ရ။
ဟိုတ်နူဒဒန်တံဏံ လီုလာ် ဆက်စၠောံပိုတ်ဒၟံၚ်တုဲ ညးပလံၚ်မံၚ်ကဵုပရေၚ်ရီုဗၚ် ဇရေၚ်ညးဒေသတံဂှ်တုဲ၊ ဂကောံရီုဗၚ်တံ ထေၚ်ဗၠေတ်အာ ညးကဵု ညးဒးဒုၚ်ပရေၚ်ဘဲဍာ်တုဲ ဟံၚ်ပြာ်ဏာလဝ် မဒှ်ရ။
ပ္ဍဲအခိၚ်ဏံလေဝ် ပ္ဍဲမွဲဒမြိပ်ၜဳ ထရဳယှူလီ ဂှ်၊ ပ္ဍဲအပ္ဍဲဥမၚ်သၟဝ်တိတံ ဗဂဗေၚ်တံပေၚ်မံၚ်တုဲ ပ္ဍဲစမြိုၚ်ပရေၚ်ပတိတ်ဓါတ်လလဳဇြဟတ်ဍာ်တံဂှ် သၟာကမၠောန် ၆၀၀ ပြၚ်တံ မာတ်ဆိုအ်ဒၟံၚ်ရောၚ် ပတေဟ်လဝ်တုဲ ဆက်ဂၠိုက်ဂၠာဲမံၚ် ကရောံမၞိဟ်လၟိဟ်လ္ၚီပြၚ်တံ ဖိုဟ်ရ။
နူဒၞာဲရုၚ်စက်ဓါတ်လလဳအသိၚ်ဇြဟတ်ဍာ်တံဂှ် ဟံၚ်ပြာ်ဂွံလဝ်မၞိဟ် ၂၇၉ တၠတုဲယျဂှ် သ္ကိုပ်ဝန်ဇၞော်နဳပဝ် ဘာလန်ဒရာယှာ ဟီုလဴလဝ် ပ္ဍဲဂိတုအဝ်ဂတ် ၃၁ ရ။
သွက်သ္ဂောံဂၠာဲဆဵုအာ ညးမာတ်ဆိုအ်ဒၟံၚ်တံမာန်ဂှ် ဂကောံရီုဗၚ် နဳပဝ်၊ အိန္ဒိယ ကေုာံ ကြုက် တံ ဂစာန်မံၚ်တုဲ၊ တၠပညာနူ ကိုဝ်ရဳယာသၠုၚ်ကျာ ကေုာံ အဝ်သတေလျ တံလေဝ် ဗိုၚ်ရီုဗၚ်မံၚ်ကီုရ။
ဟိုတ်နူပရေၚ်ဘဲဍာ်တုဲ လၟိဟ်ညးချိုတ်အာတံဂှ် ပ္ဍဲဂိတုသိပ်တေမ်ပါ ၁ ဂှ် ၁၀၀၀ တၠပြၚ်အာတုဲ၊ မၞိဟ်ၜိုတ် ၄၀၀၀ ဂှ် ဆက်ကၠေံမံၚ်ဏီ မဒှ်ရ။
အပ္ဍဲညးကၠေံဗ္ဒန်မံၚ်တံဂှ် ကောန်ဍုၚ်သအာၚ် ၅၈၃ တၠ ပါလုပ်မံၚ်ဂှ် ညးတာလျိုၚ်နဳပဝ်တံ ဟီုရ။
ကြဴနူဒှ်ပရေၚ်ဘဲဍာ်တုဲ မၞိဟ် ၁၁,၀၀၀ ပြၚ် ကေုာံ ကောန်ဍုၚ်သအာၚ် ၃၃၀ တၠတံဂှ်လေဝ် ဟံၚ်ပြာ်ဂွံလဝ်ယျဂှ် နူဂကောံရဲအာတရဴဂၠးကဝ်နဳပဝ် ဟီုလဴလဝ် ပ္ဍဲဂိတုသိပ်တေမ်ပါ ၁ ဂှ်ရ။
Ref:Independent