လ္ဂုၚ်၊ နဝ်ဝေမ်ဗာ (၃)
အလုံကၟိန်ဍုၚ်မွဲ သွက်ဂွံဝေၚ်ပါဲ ပဋိပက္ခတံကဵု ပွပကီုပရာပ်တံဂှ်တုဲ ကောန်ၚာ်သၟတ် ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်တံ မၞုံကၠုၚ် (၅၂၀,၀၀၀) ပြၚ်ရဂှ် ဂကောံမၚ်မွဲရံၚ်စံၚ်ကောန်ၚာ်သၟတ် Save the Children လလောၚ်ပ္တိတ်လဝ်ရ။
အတိုၚ်ဂလာန် Save the Children ဂှ်မ္ဂး ဟိုတ်နူပရေၚ်သီအဝဵုတုဲ ညးထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်တံ မၞုံကၠုၚ် စဵုကဵု (၁ ဒဿမ ၄) ပြကောဋိကိုဋ်တုဲ ပ္ဍဲကဵုဂှ် ကောန်ၚာ်သၟတ် (၅) ကိုဋ်ပြၚ် ပါလုပ်ဒၟံၚ်ရ။
ပၞောဝ်ကဵုဂှ် ကောန်ၚာ်သၟတ် (၂) ကိုဋ်ပြၚ်ဂှ်ဝွံ စနူ (၆) ဂိတုတုဲကၠုၚ်တေံမှ ဒှ်ကၠုၚ်ညးထောံလသာသ္ၚိဌာန် ဒးဂြိပ်ဒဴတံရဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဝွံရ။
သ္ကိုပ်စၞောန်ပ္ညုၚ် ကေၚ်ကာအာယှ Save the Children အဵုဗဳဗာဖရာန်ချဳဂှ် လၟိဟ်ဂၞန် ကောန်ၚာ်သၟတ် ထောံလသာသ္ၚိဌာန် မဒးဂြိပ်ဒဴပါဲဒလေတ်ဒၟံၚ်တံဝွံ ကဵုဏာသတိ သွက်ဂၠးတိ ညံၚ်ဂွိုအ်ဝိုတ်ကၠေံ ဍုၚ်ဗၟာရောၚ်ဂှ် ဟီုလဝ်ရ။
ညးချဳဒရာၚ်ကတိုၚ်ကၟဟ် ဒဳမဝ်ကရေဇြဳမွဲတၠဂှ်လေဝ် ဟိုတ်နူကံၚ်ဇြဳပၞာန် ဗ္တိုက်ကဵုက္ၜၚ်ကျာ၊ ထ္ပက်ကၠုၚ်ကရောၚ်ပၞာန်တံဂှ်တုဲ အလုံမွဲကၟိန်ဍုၚ် ညးပါဲဒဴဘဲပၞာန်တံ မွဲတ္ၚဲတုဲမွဲတ္ၚဲ ဂၠိုၚ်ကၠုၚ်တုဲ ကောန်ၚာ်သၟတ်ပါဲဒဴဘဲပၞာန် မၞုံကၠုၚ် (၅) ကိုဋ်ပြၚ်ဂှ်ရ နကဵုဍုၚ်သ္အာၚ်တံ သွက်ဂွံကေတ်ကဵုအရေဝ် ကုကံၚ်ဇြဳပၞာန်ဂှ် အာတ်မိက်လဝ်ရ။
ကောန်ၚာ်သၟတ် ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်တံဝွံ ပြဟ်ဟ်ဏံ ဒးမံၚ်ဒၟံၚ် ပ္ဍဲဒၞါဲဗၠးဘဲပၞာန် မၞိဟ်အာကၠုၚ်ပိုတ်တံ နကဵုဒၞါဲမစ္ၜုဲစ္ၜော်ယာယဳတံတုဲ မ္ၚးနူဒးဂဗဒၟံၚ်ကဵု အခက်အခုဲဇွောံမစၞစ၊ အခက်အခုဲပရေၚ်ထတ်ယုက်တံ ကေုာံ ဓာတ်အာဟာရ ဟွံဍိုက်ပေၚ်တံဂှ် သီုကဵုအန္တရာယ် ကူသာန်သွံရာန်မၞိဟ်တံဂှ်တုဲ ဒးဆေၚ်ဒၟံၚ်မုက်ကဵု အရာမဘပဠ စပ်ကဵုအန္တရာယ်လမျီုတံ လၟေၚ်ဒဒှ်တ္ၚဲရ။
အတိုၚ်စရၚ် ဂကောံမၚ်မွဲရီုဗၚ် ကောန်ထံၚ်ပရေၚ်ဍုၚ်ကွာန် AAPP စဵုကဵုဂိတုနဝ်ဝေမ်ဗာ (၁) ဂှ်မ္ဂး ကြဴနူဒပ်ပၞာန်သီအဝဵုတုဲ ပ္ဍဲကဵုညးမဒးချိုတ်အာ အလုံကၟိန်ဍုၚ်မွဲ (၂၄၀၀) ပြၚ်ဂှ် ကောန်ၚာ်သၟတ် (၂၄၄) တၠပါလုပ်တုဲ ပ္ဍဲကဵုညးမဒးဒုၚ်ရပ်ဒက် မွဲဠက်တြဴလ္ၚီပြၚ်ဂှ် ညးအာယုက်ဟွံပေၚ် (၄၆၅) တၠ ပါလုပ်ဒၟံၚ်ဂှ် လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)