ထဳလေန်၊ နဝ်ဝေမ်ဗာ (၃)
ကရောၚ်ပၞာန် ကံၚ်ဇြဳပၞာန် ကေုာံ ပျူသဝ်ထဳ မစံၚ်လဝ်ကွာန် ပ္ဍဲပွိုၚ်ဍုၚ်ထဳလေန် ရးမကွေတံတုဲ ကလေၚ်စဴကၠုၚ်တံဂှ် ဂကောံဒပ်စဵုဒၞါညးဒေသတံ ဗ္တိုက်လဝ်ဂှ်ရ သ္ကိုပ်ကရောၚ်ပၞာန် ဒးချိုတ်အာလဝ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ဂိတုနဝ်ဝေမ်ဗာ (၁) တေံ ကရောၚ်ပၞာန်ကံၚ်ဇြဳပၞာန် ဇြဟတ်ဒပ် ပွဳပွူ (၁၀၀) မပါလုပ်ဂှ် စံၚ်လဝ် ကွာန်ကျာခေဝ်တုဲ အခိၚ်ကလေၚ်စဴကၠုၚ်တံဂှ် ဒပ်စဵုဒၞါယဝ် YDF (ထဳလေန်) ဗ္တိုက်လဝ်အကြာဂၠံၚ်ရ။
ဟိုတ်နူပရေၚ်ဗ္တိုက်ဏံတုဲ ဆက်ဒှ်လဝ်ပေါဲဗ္တိုက် ဆေၚ်မုက်ၜါလ္ပာ်တံတုဲ အပ္ဍဲပေါဲဗ္တိုက်ဂှ် ကောန်ဒပ်ကံၚ်ဇြဳပၞာန် (၄) တၠဝွံ ချိုတ်အာလဝ် လွာဲဂှ်တုဲ သ္ကိုပ်ကရောၚ်ပၞာန်ဂှ် ဒးအာဂၞိၚ်တုဲ အခိၚ်စိုပ်ရုၚ်ဂဥုဲ ဒးချိုတ်အာလဝ်ရဂှ် ညးဒေသမွဲတၠ ဟီုရ။
ကရောၚ်ပၞာန်ကံၚ်ဇြဳပၞာန် မဒးဂိလဝ် ပ္ဍဲပေါဲဗ္တိုက်ဏံဂှ်ဝွံ ကြဴနူဒှ်ပေါဲဗ္တိုက်တုဲဂှ် ဖံက်ပန်သေနာတ် လုပ်စိုပ်ကၠုၚ် အပ္ဍဲကွာန်ပါမျေန်တုဲ အခိၚ်ဇိုၚ်သဝ်တ္ၚဲ ကလေၚ်စဴအာလဝ်ရဂှ် သာ်ဝွံ လဴပူထ္ၜးလဝ်ရ။
ဒပ်ကံၚ်ဇြဳပၞာန် ကေုာံ ဒပ်စဵုဒၞါဒေသ အပ္ဍဲခရိုၚ်ဂါတ်ဂဝ်တံဝွံ အပ္ဍဲသတ္တာဟလက္ကရဴအိုတ် ဂိတုအံက်တဝ်ဗာ တုဲကၠုၚ်တေံဂှ် က္တဵုဒှ်လဝ် ပေါဲဗ္တိုက်လၟေၚ်ဒဒှ်တ္ၚဲတုဲ လ္ပာ်ကံၚ်ဇြဳပၞာန် ဟွံအောန်နူကဵု (၄၀) တၠ ဇီုကပိုက်ချိုတ်အာလဝ် နွံရ။
ပ္ဍဲဂိတုနဝ်ဝေမ်ဗာ ပယျာံဂယးပြဟ်ဟ်ဂှ် ဒပ်ကံၚ်ဇြဳပၞာန် စံၚ်ပလီုလဝ် ကွာန်ကျာခေဝ်ဂှ်တုဲ သ္ၚိဒၟံၚ်ညးဍုၚ်ကွာန် (၁၄) မ ပၟတ်တူလီုလာ်အာလဝ်ရ။
အခိၚ်လၟုဟ်ဂှ် ဟိုတ်နူဂကောံပံၚ်ကောံ ကံၚ်ဇြဳပၞာန်တံ ကေုာံ ပျူသဝ်ထဳတံ ချဳဒရာၚ်ဒၟံၚ် ပရေၚ်ပၞာန်တုဲ ညးဒေသ မဒးဂြိပ်ဒဴပါဲဒလေတ်ဒၟံၚ်ဘဲပၞာန် အပ္ဍဲခရိုၚ်ဂါတ်ဂဝ် ကဵု ခရိုၚ်ပခုက္ကူတံ မၞုံကၠုၚ်စဵုကဵု ပွဳပွူ (၁) ကိုဋ်ပြၚ်ရဂှ် ဂွံတီကေတ် နူကဵုညးမရီုဗၚ်ကဵုဒၟံၚ် ပရေၚ်ပါဲဒဴဘဲပၞာန်တံရ။
ပရိုၚ်−သြၚ်လောန်တိုၚ်(မ်)