မုဟ်ဍုၚ်၊ သိပ်တေမ်ပါ ၅
အပ္ဍဲအကံက် Facebook ပရေၚ်မှာဇန် ဂကောံလကိုဟ်ရေဝ် မဒှ်ဂကောံပၠန်ဂတး ဖျေံသ္ဇိုၚ်ပ္ဍဲတွဵုရးမန်ဏံ မၞိဟ်လုပ်ချူလဝ် Comment ကောန်ကွာန်ဗလံက်ညံၚ်ဝိုၚ် ပွိုၚ်ဍုၚ်မုဟ်ဍုၚ်မွဲတၠ ဒးဒုၚ်ဖျေံထံၚ် ၇ သၞာံရဂှ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ဥူဇြေန်မေန်ခိုၚ် အာယုက် ၅၀ သၞာံ ကောန်ကွာန်ဗလံက်ညံၚ်ဝိုၚ် ပွိုၚ်ဍုၚ်မုဟ်ဍုၚ်ဝွံ ပ္ဍဲဂိတုအဝ်ဂတ် ၈ လောန်ကၠုၚ်တေံ အခိၚ်အာဒုၚ်နၚ်ကၟုဲ ပ္ဍဲကွာန်တံၚ်ဖလုတ် ပွိုၚ်ဍုၚ်ဇြပ်ဗုဂှ် ဒပ်ပၞာန်ရပ်ဏာရ။
ကြဴနူဂှ် နကဵုၝောံပိုဒ် ၅၂ သၞောဝ်ဗတိုက်ပလီုပကီုပရာတ် ပံက်ဏာအမှုကု ဥူဇြေန်မေန်ခိုၚ်ဂှ်တုဲ နူရုၚ်သၞောဝ်ဓရ် ပွိုၚ်ဍုၚ်ဇြပ်ဗု ဖျေံထောံအမိၚ်ဒဏ်ထံၚ် ၇ သၞာံရ။
စနူ ဥူဇြေန်မေန်ခိုၚ် ဒးဒုၚ်ရပ်တုဲဂှ်တှ်ေ ညံၚ်ဂွံကလေၚ်ဗလး ပတိတ်ကဵုညိဂှ် ကျာ်ဇၞော်ဘာ ကွာန်ဗလံက်ညံၚ်ဝိုၚ်ကီု ညးဇၞော်ကွာန်တံကီု အာအာတ်အရီုဗၚ်ကီုလေဝ်ဟွံဗလးကဵုတုဲ ဖျေံထောံဒုဟ်ထံၚ် ဟဂှ်ရောၚ် ကောန်ကွာန်မွဲတၠ ဟီုရ။
ဥူဇြေန်မေန်ခိုၚ်ဝွံ စကာလဝ် နကဵုယၟုအကံက် “လင်းလက်လမင်း” တုဲ သၟဝ်အကံက်လကိုဟ်ရေဝ်ပတိုန်ပိုအ်ဂှ် “ကောဒေံတံယျေ သ္ပဂရုအိုတ်ညိ” ဟိုတ်နူညးလုပ်ချူလဝ်မလိက်သာ်ဏံတုဲ ဒးဒုၚ်ရပ်ဏာရ။
ဒပ်ပၞာန်သီအဝဵုတံဝွံ လတူညးလုပ်ချူ Comment ကေုာံ ညးလုပ်ကဵုဂြိုဟ် ပ္ဍဲအကံက် Facebook လကိုဟ်ရေဝ်တံဂှ် မၚ်ဗက်ရံၚ်ဗဵု လ္ၚတ်မံၚ်တုဲ ရပ်လဝ်ဆက်က်ရောၚ်။
အတိုၚ်တင်နၚ် ဌာန်ပရိုၚ်သြၚ်လောန်တိုၚ်မ် ပကောံဂွံလဝ်မ္ဂး သၟဝ်အကံက် လကိုဟ်ရေဝ်ဂှ် မၞိဟ်လုပ်ချူလဝ် Comment ဟွံအောန်နူ ၄ တၠ ဒးဒုၚ်ရပ်လဝ်တုဲ လ္တူညးဒးဒုၚ်ရပ်လဝ်တံဂှ်တှ်ေ နကဵုၝောံပိုဒ် ၅၂ (က) သၞောဝ်ဗတိုက်ပလီုပကီုပရာတ်ဂှ် ပံက်အမှုကေတ်လဝ်အရေဝ်ရောၚ်။
ပရိုၚ် – သြၚ်လောန်တိုၚ်မ်
Photo – Social Media