ထဝါဲ၊ သိပ်တေမ်ပါ ၅
အပ္ဍဲကဵုရးတၞၚ်သဳ ပွိုၚ်ဍုၚ်ထဝါဲ ဒေသဂြိုပ်ဗမံက်ဂှ် ဟိုတ်နူဒပ်ပၞာန်သီအဝဵု ထပက်မံၚ်ကရောၚ်ပၞာန်တုဲ ညးဒေသနူ ၅ ကွာန် တံ ထောံဌာန်ဒၞာဲ ဒးဂြိပ်ပါဲဓလေတ်မံၚ်ရဂှ် ရိုဟ်ကၞက်ပရိုၚ်ဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
စနူဂိတုသိပ်တေမ်ပါ ၁ တေံတုဲ ဒပ်ပၞာန်သီအဝဵု ကြဳဖျေံဗုမ်နူၜၚ်ကျာ လတူဂအုံကွာန် ပကာရဳ ဒေသဂြိုပ်ဗမံက်ထဝါဲတုဲ ကြဴနူဂှ် နူကဵုလတူဗလးတိပၠန် ဍိုက်လုပ်ကၠုၚ်နကဵုဇြဟတ်ပေၚ်ၚ်တုဲ ထပက်မံၚ် ကရောၚ်ပၞာန်ကီုရောၚ်။
ကရောၚ်ပၞာန်ဏံဝွံ ပ္ဍဲဂိတုအဝ်ဂတ် ၂၉ လောန်ကၠုၚ်တေံ အဟိန်အာမံၚ် လပါ်ဇြုၚ်ပရေၚ်ပိုန်ဒြပ်တၟေၚ်ထဝါဲ စိုပ်ကရပ်ကွာန်မံၚ်မေဝ်ယှံၚ်ဂှ် ဒးဒုၚ်မာတ်ဆိုအ်ဗတိုက်တုဲ ကြဴနူဂှ် ဗက်ထပက်မံၚ်ကရောၚ်ပၞာန် အပ္ဍဲကွာန်ဗ္ဒာဲဗ္ဒာဲတံဂှ်ရောၚ်။
ဟိုတ်နူ ပရေၚ်ထပက်ကရောၚ်ပၞာန်တုဲ အပ္ဍဲသ္ကုတ်ဂၠံၚ်ဇၞော်ကၟိန်ဍုၚ် စၟတ် ၈ စနူကဵုကွာန်မံၚ်မေဝ်ယှံၚ် စဵုကဵုစိုပ် ကွာန်ယေဝိုၚ် သီုဖအိုတ် ၅ ကွာန်ဂှ် ညးဒေသတံ ဒးဂြိပ်ပါဲဓလေတ်အာဒၞာဲဗၠးဘဲတံရ။
ညးဒဴပၞာန်တံဝွံ ဒးဂြိပ်ပါဲအာမံၚ် အကြာဗြဲအကြာကျာတံတုဲ သွက်အရီုဗၚ်ပရေၚ်စဵုဒၞာ ဒၞာဲဂွံမံၚ်စံၚ်တံဂှ် နွံမံၚ်ပၟိက်ကွေံကွေံရောၚ် သ္ဂးရ။
ပြဟ်ဟ်ဏံ ကရောၚ်ပၞာန်တံဝွံ ဇရေၚ်ဒေသဂြိုပ်ဗမံက်ထဝါဲဂှ် နူဂိက်သၞေဟ်ကၚ်ကျာ်ဗစံက်ဂှ် မွဲကရောၚ်ပၞာန် နူလပါ်ဂၠံၚ်ဂြိုပ်ဖအံက် ဂှ် မွဲကရောၚ်ပၞာန် သီုဖအိုတ် ၂ ကရောၚ်ပၞာန် ထပက်လုပ်အာမံၚ်ဖိုဟ်ရောၚ်။
အတိုၚ်လိက်ဒုၚ်စဳရေၚ် ဂကောံသုတေသနအပ္ဍဲဒေသ FE 5 Thanintahryi မ္ဂး အပ္ဍဲရးတၞၚ်သဳ ဒပ်ပၞာန်သီအဝဵု ထပက်မံၚ်ကရောၚ်ပၞာန်တံဝွံ ရပ်စကာမံၚ်ညးဒေသတံ နကဵုဂဒံၚ်မၞိဟ်အဆက်က်ရောၚ် ဂွံတီရ။
အပ္ဍဲရးတၞၚ်သဳဂှ် စနူဂိတုအဝ်ဂတ်လောန်ကၠုၚ်ဏံ ဟိုတ်နူပရေၚ်ထပက်ကရောၚ်ပၞာန်ကီု ပရေၚ်ကြဳဗုမ်ၜၚ်ကျာတံကီုကၠောန်လဝ်ဂှ်ရ ညးဒးထောံလဝ်ဌာန်ဒၞာဲ ဂြိပ်ပါဲမံၚ်တံ လၟိဟ် ၈၅၀၀၀ ပြၚ် နွံကၠုၚ်လဝ်ရောၚ်။
ပရိုၚ် – သြၚ်လောန်တိုၚ်မ်
Photo – Social Media