မတ်မလီု၊ သိပ်တေမ်ပါ ၅
အပ္ဍဲဍုၚ်မတ်မလီု ဒပ်ပၞာန်သီအဝဵုပြံၚ်လဝ်ဗီုပြၚ်အလဵုအသဳပၞာန်မန် ဒၞာဲထမံက်လဝ်ဂအာၚ်သ္ၚိ ဍုၚ်တၟိလှိုၚ်ယျတနာ ဗွဲမဂၠိုၚ်တံဂှ်ဍာ်ဗၠိုက်မံၚ်ရောၚ် ရဲလတူဍုၚ်တံ ဟီုကဵုဌာန်ပရိုၚ် သြၚ်လောန်တိုၚ်မ် ရ။
ပရေၚ်ကိုန်အစဳဇန် ဂအာၚ်သ္ၚိ ဍုၚ်တၟိလှိုၚ်ယျတနာဂှ် ဇြုၚ် A၊ ဇြုၚ် B ကဵုဇြုၚ် C ဂးတုဲ ပါ်ခြာစွံလဝ် ဇြုၚ် ၃ ဒၞာဲတုဲ အလဵုအသဳပၞာန်မန် ထမံက်ပတိတ်လဝ်ဂအာၚ်သ္ၚိ နကဵုလၟိဟ်လ္ၚီုပြၚ်နွံရောၚ်။
ဟိုတ်နူ ဍာ်ၜဳကဍတ်သၠုၚ်တိုန်ကၠုၚ်ကီု စိုပ်အခိၚ်ဍာ်က္တဵု တ္ၚဲဂိတုပေၚ်ဂှ်ရ ဍာ်လုပ်စိုပ်အာပ္ဍဲကြုၚ်တံကီု ကြဴနူဂှ် ဍာ်လုပ်စိုပ်အာ အပ္ဍဲဗရံၚ်ဍာ် ပရေၚ်ကိုန်အစဳဇန်တံတုဲ ဍာ်ဗၠိုက်မံၚ်မဒှ်ရ။
ပရေၚ်ဍာ်ဗၠိုက်မံၚ်ဒၞာဲဂအာၚ်သ္ၚိ ကိုန်အစဳဇန်တံဏံဂှ်တှ်ေ ကာလထမံက်ကိုန်အစဳဇန်ဏံ ကြုၚ်နွံကၠုၚ်လဝ်ကၠာတေံဂှ် ကၠောန်ထောံဗရံၚ်ဍာ်တံတုဲ ဍာ်လုပ်စိုပ်ကၠုၚ် အကြာဂအာၚ်သ္ၚိတံဏံရောၚ် ညးလတူဍုၚ်မွဲတၠ ဟီုကဵုဌာန်ပရိုၚ် သြၚ်လောန်တိုၚ်မ် ရ။
“ကြုၚ်ဂှ် ကၠောန်ထောံဗရံၚ်ဍာ်တှ်ေ ဍာ်ဂှ် စိုပ်အာလတူရလေဝ်။ ဖံက်လဝ်ဂၠံၚ်လေဝ်နွံ။ ဇိုၚ်ဂၠံၚ်တံလေဝ် ကၠောန်လဝ်ဗရံၚ်ဍာ်တံနွံမံၚ်။ အကြာဗရံၚ်ဍာ်တံဂှ်တှ်ေ ဗရံၚ်ဍာ်ဂှ်ဗၠိုက်အာ။ ဂအာၚ်သ္ၚိဂှ်တှ်ေ ဍာ်မၚ်မံၚ်။ ဍာ်မၚ်မံၚ် ဒှ်မံၚ်အတိုၚ်ဗီုဂှ်ရ” သာ်ဝွံ သ္ဂးရ။
တုဲပၠန် ဂအာၚ်သ္ၚိကိုန်အစဳဇန် ဍုၚ်တၟိလှိုၚ်ယျတနာလ္ၚဵုတံဂှ်တှ်ေ အခိၚ်ဍာ်ချိုတ်မ္ဂး ဍာ်စှ်ေအာတုဲ ဍာ်ဟွံဗၠိုက်မံၚ်ကီုလေဝ်၊ ဒၞာဲဂအာၚ်သ္ၚိလ္ၚဵုလ္ၚဵုတံဂှ်တှ်ေ ဍာ်ဆက်မံၚ်မံၚ်နွံရောၚ် ညးဆက်ဟီုရ။
ပရေၚ်ကိုန်အစဳဇန်ဂအာၚ်သ္ၚိ ဍုၚ်တၟိလှိုၚ်ယျတနာဏံဂှ် ပ္ဍဲလက်ထက်သ္ကိုပ်ဝန်ဇၞော်တွဵုရးမန် ဥူအံၚ်ကျဳတိၚ်ဂှ်တှ်ေ ထ္ၜးဟိုတ်ကဵု ရဲၜက်ၜေတ်ဒၞာဲဝါဲဂးတုဲ ဘာတ်ပတိတ်ထောံ လ္တူရဲမံၚ်စံၚ်အပ္ဍဲဒၞာဲတံဏံတုဲမှ ထမံက်ကၠုၚ်လဝ်ရုပ်ရဴ ပရေၚ်ကိုန်အစဳဇန်ဏံ မဒှ်ရ။
အပ္ဍဲလက်ထက်သ္ကိုပ်ဝန်ဇၞော် ဥူအံၚ်ဝေန်တာန် ဒးဒုၚ်ခါန်ကၞက်လဝ် နကဵုအလဵုအသဳပၞာန် ပြံၚ်လဝ်ဗီုပြၚ်လၟုဟ်ဏံလေဝ် ဆက်တုဲထမံက်မံၚ်ရုပ်ရဴ ပရေၚ်ကိုန်အစဳဇန်ဏံတုဲ သီုကဵုသုၚ်စောဲလဝ် သြန်ဂအုံဘဏ္ဍာ အလဵုအသဳတွဵုရး ဂၠိုၚ်အိုတ် မဒှ်ရ။
သွက်သၞာံပရေၚ်ဘဏ္ဍာ ၂၀၂၆-၂၀၂၇ ဂှ်တှ်ေ ဂကောံအလဵုအသဳပၞာန် မန် ဂွံလဝ်သြန်ဂအုံပရေၚ်ဘဏ္ဍာ သုၚ်စောဲမာန်တိုက်ရိုက် သြန် ၁၄၇၅၀ ပြကောတိကိုတ်ဒကေဝ်ပြၚ်နွံတုဲ သွက်ကိုန်အစဳဇန်ဂအာၚ်သ္ၚိ ဍုၚ်တၟိလှိုၚ်ယျတနာဏံဂှ်တှ်ေ သုၚ်စောဲလဝ်သြန်ၜိုတ် ၉၀၀၀ ပြကောတိကိုတ်ဒကေဝ် နွံရောၚ်။
စပ်ကဵု ပရေၚ်ကိုန်အစဳဇန်ဂအာၚ်သ္ၚိ ဍုၚ်တၟိလှိုၚ်ယျတနာ ဍုၚ်မတ်မလီုဏံဂှ်တှ်ေ အလဵုအသဳပၞာန်တွဵုရးမန်ကဵု ခရိုနဳ ဥူမိုဝ်ကျဝ် နူဂကောံပရေၚ်ကမၠောန်င္ၚိုဝ်မိုဝ်တံ ပံၚ်တောဲထမံက်မံၚ်ရုပ်ရဴတုဲ လၟုဟ်ဏံဂအာၚ်သ္ၚိမွဲဒၞာဲမ္ဂး စနူသြန် ၈၀၀ ကိုတ်ဒကေဝ် စဵုကဵု ၄၀၀၀ ကိုတ်ဒကေဝ်ပြၚ် ပံက်လဝ်ၚုဟ်မးနွံမံၚ်ရောၚ်။
ပရိုၚ် – သြၚ်လောန်တိုၚ်မ်
Photo – CJ