ဗြဝတဳ-သိပ်တေမ်ပါ ၅
အပ္ဍဲကဵုတွဵုရးကရေၚ် ပွိုၚ်ဍုၚ်ဗြဝတဳ ဒေသဖလူ ပယျဵုသေံ-ဗၟာ ပေါဲဗတိုက်အကြာၜါလပါ် ဆက်က္တဵုဒှ်မံၚ်ဂှ် ဟိုတ်နူဒပ်ပၞာန်သီအဝဵု ဗတိုက်ကဵုဒရုၚ်ဂှ်ရ ကောန်ၚာ် ၁ တၠ ချိုတ်တုဲ၊ ညးဍုၚ်ကွာန် ၃ တၠတံ ဒးလဝ်ဝပ်ရဂှ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ဒၞာဲကရပ်ဒေသကျံက်ခေတ် လပါ်သၠုၚ်ကျာဗြဝတဳပယျဵုသေံ-ဗၟာဂှ် အကြာဒပ်ပၞာန်ဗမာကဵု ဂကောံဇြဟတ်ပၠန်ဂတးတံ ပေါဲဗတိုက်ဆက်ဒှ်မံၚ်တုဲ ပ္ဍဲတိဍာ်ဖလူ ဒပ်ပၞာန်ဗမာဗတိုက်ကဵုဒရုၚ်ဂှ်တှ်ေ ပရေၚ်ညးဍုၚ်ကွာန်ဒးဝပ်၊ ချိုတ်တံ နွံကၠုၚ်ရ။
လပါ်သၠုၚ်ကျာဍုၚ်ဗြဝတဳ ဒၞာဲဒပ်ပၞာန်ကရေၚ်ပတုဲဖဵုဒဳမဝ်ကရေသဳ DKBA ထိၚ်ဒဝ်လဝ် ပ္ဍဲကဵုကျံက်ခက် ကရပ်ဒေသ ကြုၚ်ဗတဳဗတာၚ်ဂှ် ဒပ်ပၞာန်ဗမာဆက်ထပက်မံၚ်ကရောၚ်ပၞာန်တုဲ ပေါဲဗတိုက်က္တဵုဒှ်မံၚ်ကဵု ဂကောံပၠန်ဂတး KNLA မဟာဒပ် ၆ သ္ကိုပ်သ္ကလဝ်တံ စဵုကဵုစိုပ်သိပ်တေမ်ပါ ၄ ဂှ် ရ။
နူကဵုဒေသကြုၚ်ဗတဳဗတာၚ် သွက်ဂွံလုပ်ဗတိုက် ပ္ဍဲဒေသကျံက်ခက် ဒၞာဲသ္ကိုပ်ပၞာန်သိုၚ်ကျဝ်လှ DKBA တံဂှ် ဒပ်ပၞာန်ဗမာဂစာန်မံၚ်မဒှ်တုဲ သၟာကမၠောန်ကျာဖျ (လီသြန်အန်လာၚ်) နွံမံၚ်ဒေသကျံက်ခက်တံဂှ်တှ်ေ နူကဵု DKBA ဒစးဒုၚ်ဆုဲပြံၚ်စွံလဝ် ဒၞာဲတုဲတုဲရ။
အပ္ဍဲကဵုဂိတုသိပ်တေမ်ပါ ၄ အခိၚ်တ္ၚဲစေၚ်ဂှ် ဒပ်ပၞာန်ဗမာဗတိုက်ကဵုဒရုၚ် ပ္ဍဲကွာန်ကျောန်တဝ်တိဍာ်ဖလူဂှ်၊ ညးဍုၚ်ကွာန် ၄ တၠဒးလဝ်တုဲ အပ္ဍဲဂှ်တှ်ေကောန်ၚာ် ချိုတ်အာမွဲတၠ၊ ၃ တၠ ဒးလဝ်ဝပ်ရဂှ် ညးဒေသမွဲတၠ ဟီုရ။
ပရေၚ်ဒပ်ပၞာန်သီအဝဵု ထပက်မံၚ်ကရောၚ်ပၞာန် လပါ်သၠုၚ်ကျာဗြဝတဳတံဂှ် ဟိုတ်နူဒးဒုၚ်ဗတိုက်လဝ် ဂိလောန်အာတုဲ ပတဝ်က္ဍိုပ်စွံပွန်ကဵု ဒၞာဲညးဍုၚ်ကွာန်တံနွံ ဗတိုက်မံၚ်ဂၠိုၚ်ၚ်ကဵုအလန်ဂှ်ကီု သီုကဵုဒၞာဲဗ္ဒိုပ်ဒပ် DKBA တံကဵု ဒၞာဲသေန်တာကျာဖျတံနွံဂှ်လေဝ် ပန်ဗတိုက်မံၚ်ဂၠိုၚ်ၚ်ကဵုအလန် ကၠောန်ကၠုၚ်မံၚ်ရ။
အပ္ဍဲဂိတုဂျူလာၚ်-အဝ်ဂတ် လောန်ကၠုၚ်တေံ နူကဵုဒပ်ပၞာန်ဗမာ ကြဳဗုမ်နူၜၚ်ကျာ ပန်လွဟ်ဇၞော်တံတုဲ ဗ္ဒာဲဒေသဖလူ ဒၞာဲပိပ္ၚံက်ဂှ် ဘာလကျာ်မွဲမကဵု ဗ္ဒိုပ်သ္ကိုပ်ပၞာန် DKBA သ္ကိုပ်ပၞာန် သဝ်သာန်အံၚ် နွံကွာန်ကျောန်တဝ်တံဂှ် ခမဳသၚ်မွဲဇကုကဵု ကောန်ဒပ် DKBA တံလေဝ် ချိုတ်လဝ်နွံရ။
အပ္ဍဲလပါ်သၠုၚ်ကျာဗြဝတဳ ဟိုတ်နူဒပ်ပၞာန်ဗမာ ဒးအာလဝ်ဘဲဂိဂိတံဂှ်တှ်ေ စကာကောန်ပၞာန်ယိုက်ဝန်ပၞာန် စှ်ေဘာတံတုဲ ဆက်ဗပေၚ်မံၚ်ကဵုဇြဟတ်ကဵုကၠုၚ်ဗတိုက်မံၚ်တုဲ ပ္ဍဲပေါဲဗတိုက်တံဂှ် ကောန်ပၞာန်ယိုက်ဝန်ပၞာန်တံ ချိုတ်ကီု ဒးဝပ်ကီု ဂြိပ်ပါဲဓလေတ်အာနူဒပ်တံလေဝ်နွံမံၚ်ရဂှ် နူဂကောံပံၚ်တောဲပၠန်ဂတးတံ လလောၚ်တြးလဝ် ပရိုၚ်ရ။
ပရိုၚ် – သြၚ်လောန်တိုၚ်မ်
Photo – Social Media