မနဳလာ၊ သိပ်တေမ်ပါ၇
ဒုသမ္မတ ဖိလေတ်ပိုၚ် သာရာ ဒူတာတေ ဘပဠလဝ် သွက်သ္ဂောံဂစိုတ် သမ္မတ မာကိုအ်ဂှ် နကဵုတၚ်စောဲစပ် ကြဴနူဒးဒုၚ်ပတိတ်လဝ်အမိၚ်ရပ်တုဲ ခြာမွဲတ္ၚဲ ပ္ဍဲသိပ်တေမ်ပါ ၅ ဂှ် အာတ်မိက်ဂမြၚ်လဝ် ပရေၚ်ဒုၚ်လျိုၚ် ပ္ဍဲရုၚ်သၞောဝ်ဓရ် ဍုၚ်မနဳလာရ။
သွက်ဂွံဂစိုတ် သမ္မတ ဖာဒဳနန် မာကိုအ် ဂျူနီယာ၊ သမ္ဘာညး ကေုာံ ညးစၞးစၠတ်ထဝ် ကောဒေံညးတံတုဲ ဆာရာ ဒူတာတေ လိၚ်လဝ်မၞိဟ်ပရီု ဟီုလဝ်နူကဵုလလောၚ်တြးပရိုၚ် အခိၚ်သဝ်တ္ၚဲတုဲ ပ္ဍဲဂိတုလောန်ကၠုၚ်တေံဂှ် ဒးဒုၚ်စောဲစပ်လဝ်ရ။
ကိုပ်ကၠာအိုတ် ဒးဂစိုတ်ထောံ မၞိဟ် ၃ တၠတံဂှ် ဒုသမ္မတ ဟီုလဝ်ရောၚ် ထမံက်ထ္ၜးလဝ် ပ္ဍဲပရိုၚ်ရ။
လက်ကရဴဏံ ပရေၚ်စၟတ်သမ္တီတံနၚ်တံဂှ်တှ်ေ ဒှ်အရာဒက်ပတန်လဝ် ဗၠေတ်ဗၠေတ်ရောၚ် ညးဟီုရ။
ပွမဂစာန်သွက်သ္ဂောံဂစိုတ် ပရေၚ်ဘပဠလဝ်ဗီုဏံနွံတုဲ လတူညးဂှ် နူကဵုစၠတ်ထဝ်အဆံၚ်သၠုၚ် ပတိုန်ဂလာန်ပတေဟ်ဟၟဲ အကာဲအရာကိစ္စဇၞော်မွဲ က္တဵုဒှ်အာရ။
ဒုဟ်နွံရောၚ် ယဝ်ရဒးဒုၚ်ဖျေံအမိၚ်မ္ဂး နူတာလျိုၚ်အဆံၚ်ညးလၟုဟ်ဂှ် ဒးဒုၚ်ပါဲပတိတ်တုဲ နူပွဳဗွိုၚ်ပရေၚ်ဍုၚ်ကွာန်လေဝ် ဒးတိတ်အာ လၟိုန်ထာဝရရောၚ်။
ဒုသမ္မတမွဲ ညံၚ်ဟွံဂွံဒးဒုၚ်ရပ်ဂှ်တှ်ေ စိုပ်ကၠုၚ်ရုၚ်သၞောဝ်ဓရ် ပတိတ်လဝ်အမိၚ်ရပ်လတူညးဂှ် သၟာဥပဒေညး လဝ်ရေတ်သာ်လောန် ဟီုရ။
ညးအာတ်မိက်ဂမြၚ်ပတိုန် ပရေၚ်ဒုၚ်လျိုၚ် နကဵုသြန်ဂှ် နူရုၚ်သၞောဝ်ဓရ် သ္ပလဝ်ဒတန်ရ။
ကၠာဟွံအာတ်မိက်ဂမြၚ်ပတိုန်ပရေၚ်ဒုၚ်လျိုၚ် ပ္ဍဲရုၚ်သၞောဝ်ဓရ်ဏီဂှ် ဒှ်မံၚ်ဒဝိၚ် သွက်ဘဲလမျီုညးရောၚ်ဂှ် ဟီုလဴကဵု အစာပရိုၚ်တံရ။
ယြဴညးလဵုမွဲမှာ ဟွံသ္ပဂရုတှ်ေ အဲဟွံမိက်အာတ်မိက်ဂမြၚ်ပတိုန် ပရေၚ်ဒုၚ်လျိုၚ်ပုဟ် သာရာ ဒူတာတေ ဟီုရ။
အတိုၚ်ဥပဒေဖိလေတ်ပိုၚ်မ္ဂး ညးပြာကတ်ဒုဟ်ဆေၚ်စပ်ကဵု ပွမဘပဠလဝ် ဗွဲမသကာတ်မြဟ်တံဂှ်တှ်ေ ဒးဒုၚ်ဖျေံထံၚ်စဵုကဵု ၆ ဂိတုမာန်ရ။
ပၟိက်ဆန္ဒမိက်ဂွံဝေၚ်ပါဲ ပရေၚ်သၞောဝ်ဥပဒေ ဟၟဲကၠုၚ်ပုဟ် ညးဟီုဂးတုဲ အခေါၚ်ပရေၚ်သက်သာလုပ်သၞောဝ်အိုတ်သီုတံဂှ် ဆက်သုၚ်စောဲအာရောၚ် ဟီုရ။
လတူပွမဖံက်ပကဝ်သၞောဝ်ဥပဒေ ဆက်စပ်ကဵုတၚ်စောဲစပ်လ္တူညးတုဲ အတိုၚ်ပရေၚ်ဥပဒေမ္ဂး ကဵုဒုဟ်ဟွံဂွံပုဟ် ဂလာန်သၟာဥပဒေညးတံဟီုလဝ်ဂှ် ညးတာလျိုၚ်နူဌာနဝန်ဇၞော်ပရေၚ်သၞောဝ်ဓဝ်တံ တးပါဲလဝ်ရ။
ပ္ဍဲဂိတုမေ လောန်ကၠုၚ်တေံ ညးစၞးစၠတ်ထဝ်အဆံၚ်သၟဝ်တံ စောဲစပ်ပတိုန်လဝ်ဒုဟ် သာရာ ဒူတာတေတုဲ ပရေၚ်အဂတိဒဂေတ်လီုတံ နကဵုတၚ်စောဲစပ်ဗွဲမဂၠိုၚ်တံ ဒးဒုၚ်စောဲစပ် ပတိုန်လဝ်ဒုဟ် မဒှ်ရ။
Ref:AFP