တိုကျို၊ သိပ်တေမ်ပါ ၅
အခိၚ် ဒးဆဵုဂဗမံၚ်ကဵု ပရေၚ်အခက်အခုဲ ပ္ဍဲအရာပကောံအာ ကောန်ပၞာန်တၟိတံဂှ်တှ်ေ ဆေၚ်စပ်ကဵုအကာဲအရာဒှ်ကၠုၚ်မာန်ဂှ် နူကဵုဂကောံတၠပညာတံ စဗၟံက်ထ္ၜးကၠုၚ်တုဲ သွက်ဂွံကော်အာ ကောန်ဍုၚ်သအာၚ်တံဂှ် ဗွဲကြဴ အစဳဇန်သွက်ကောန်ဍုၚ်သအာၚ် ဂွံလုပ်ဒပ်ပၞာန်ဂျပါန်ဂှ် ဝန်ဇၞော်ပရေၚ်စဵုဒၞာ ယှေန်ဂျဳရဝ် ကဝ်အိဇုမိ (Shinjiro Koizumi) တးပါဲထောံ ပ္ဍဲသိပ်တေမ်ပါ ၄ ဂှ်ရ။
သွက်ဒပ်ပၞာန်ဂျပါန် သွက်ဂွံကော်အာ ကောန်ဍုၚ်သအာၚ်တံဂှ် ညးတံကေၚ်ချပ်လဝ်ဟွံမွဲပုဟ် ပ္ဍဲပေါဲသောင်ကလးပရိုၚ်လၟေၚ်ဍာံဂှ် ဝန်ဇၞော် ကဝ်အိဇုမိ ဟီုလဴကဵုလဝ်ရ။
ပ္ဍဲဂျပါန် ပရေၚ်လၟိဟ်မၞိဟ်သၠးပဋိသန္ဓိတံ ယအ်စှ်ေမံၚ်ဏံ အခိၚ်လၟိဟ်ညးဗျုဗျုတံ ပဵုဂၠိုၚ်တိုန်မံၚ်ဏံမ္ဂး ပရေၚ်ပကောံကောန်ပၞာန်ယိုက်ဝန်တံဂှ် ဒှ်တၚ်ကော်ဆောအဓိကမွဲရောၚ်ဂှ် ညးထပ်ဗပေၚ်ဟီုလဝ်ရ။
ဆဂး သွက်ညးယိုက်ဂၠေၚ်မံၚ်တာလျိုၚ် လၟုဟ်တံဂှ်ဟေၚ် ညးတံဒးကဵုဒၞာဲ ကၠာအိုတ်ရောၚ် ဝန်ဇၞော်ပရေၚ်စဵုဒၞာဂျပါန် ကလေၚ်ဟီုသှ်လဝ်ရ။
သွက်အစောန်စရာဲပရေၚ်ဒပ်ပၞာန်ဂျပါန် ဂွံခိုၚ်ဗိုန်ဇၞော်တိုန်အာ အစဳဇန်ပရေၚ်ကော်အာကောန်ဍုၚ်သအာၚ်ဂှ် နကဵုတၚ်ကဵုကသပ်မွဲသ္ကုတ်မွဲသ္ကူ နူကဵုတၠပညာနူဖံၚ်ဒေယှေန်ပရေၚ်ၜိုဟ်လလမ် ဆာဆာကာဝါတံ ပတိုန်ထ္ၜးလဝ် မဒှ်ရ။
တၚ်ကဵုကသပ်ဏံဂှ် ပ္ဍဲသိပ်တေမ်ပါ ၂ တေံ ပတိုန်ထ္ၜးကဵုလဝ် ဝန်ဇၞော် ကဝ်အိဇုမိ ရ။
အပ္ဍဲအနာဂတ်လေဝ် လၟိဟ်မၞိဟ်ကောန်ဍုၚ်ဂျပါန် ဆက်ယအ်စှ်ေအာမာန် နွံမံၚ်တုဲ သွက်ဒပ်ပၞာန်ဂျပါန်မ္ဂး အကာဲအရာသွက်သ္ဂောံကော်အာ ကောန်ဍုၚ်သအာၚ်တံဂှ် ဒးချပ်ဗ္စာရဏာ နူလၟုဟ်ဏံဂှ် အခိၚ်စိုပ်မံၚ်ယျ ပတေဟ်ကေတ်လဝ်ရောၚ် ပ္ဍဲတၚ်ကဵုကသပ်ညးတံဂှ် ဂကောံတၠပညာတံ ထမံက်ထ္ၜးလဝ်ရ။
အတိုၚ်သ္ဇိုၚ်မူမ္ဂး သွက်ညးယိုက်ဝန်အလဵုအသဳတံမ္ဂး ဒးဒှ်ကောန်ဍုၚ်ဂျပါန်ရောၚ် နွံမံၚ်ပၟိက်ဂှ်ရ သွက်သ္ဂောံကော်အာ ဍုၚ်သအာၚ်တံဂှ် ပရေၚ်ချပ်ဗ္စာရဏာတံ ဟွံရုံဂပ်ဏီပုဟ် ဂကောံဏံ ဟီုလဝ်ရ။
ဆဂး ပရေၚ်စၟဳစၟတ်ပရေၚ်ရာဇဝၚ်ကၠာတံ၊ ပရေၚ်တုပ်စိုတ်စပ်ကဵုဓဝ်ပတေဟ်တံတုဲ ညံၚ်ရဴအကာဲအရာလ္ၚဵုတံ ယဝ်ရကိတ်ညဳမ္ဂး ပ္ဍဲအရာမကၠောန်သ္ပ နွံတၚ်စၟတ်ပိုၚ်ခြာတံဂှ် ညးဍုၚ်သအာၚ်တံ ပါဝင်အာမာန်ရောၚ် ဂကောံဂှ် သ္ဂးရ။
ဆဂး သွက်ပရေၚ်ကောန်ဍုၚ်သအာၚ်တံမ္ဂး အခေါၚ်သွက်သ္ဂောံတီကေတ် တၚ်နၚ်ကာပၞုက်တံဂှ် ဒးစၟတ်ပိုၚ်ခြာတာဒၞာလဝ်ထေက်ရောၚ် ဂကောံဂှ် ဟီုရ။
ဂုဏ်စရာဲဒပ်ပၞာန်ဂျပါန် ညံၚ်ဂွံခိုၚ်ဗိုန်ဇၞော်မောဝ်တိုန်အာ နကဵုဌာနဝန်ဇၞော်ပရေၚ်စဵုဒၞာ ကၠောန်မံၚ်တုဲ ညံၚ်အကာဲအရာတံ ဂွံတောတက်ကၠုၚ်ဂှ်ဟေၚ် ဒးစွံအာရီုအဓိကထေက်ရောၚ် ညးပါ်ပါဲလဝ် လတူအစဳဇန်ဏံတံ ထံက်ထ္ၜးလဝ်ရ။
သွက်သၞာံပရေၚ်ဘဏ္ဍာဂတဏံမ္ဂး ဗါတ်ဂျက်စရိတ် သုၚ်စောဲအာ ဒဝ်လာ ၅၅ ဗဳလဳယာန် (ယာန် ၈ ဒသမ ၉ ထြဳလဳယာန်) သွက်ဂွံသ္ပကဵုစၟတ်သမ္တီဂှ်လေဝ် နကဵုဌာနဝန်ဇၞော်ပရေၚ်စဵုဒၞာ ရန်တၟအ်လဝ်ရ။
လၟိဟ်မၞိဟ် ရးနိဂီုဍုၚ်ယအ်စှ်ေကၠုၚ်မံၚ်တုဲ ပရေၚ်ပကောံကောန်ပၞာန်တၟိတၟိ သွက်ဒပ်ပၞာန်ဂျပါန် ဒးဆဵုဂဗမံၚ်ကဵု အခက်အခုဲတံဏံဂှ် လံကၠုၚ်ဂၠိုၚ်ကဵုသၞာံ မဒှ်ရ။
Ref:The Japan Times