ၜၚ်ကံက်၊ သိပ်တေမ်ပါ ၈
စနူသတ္တဟဂတဏံတုဲ နကဵုပၟိက်ဆန္ဒဇကု သၟတ်မိက်ဂွံယိုက်ဂၠေၚ်ဝန်ပၞာန်တံ စပတိုန်လိက်ဂမြၚ်ပတီမာန်ရောၚ် အလဵုအသဳသေံ လလောၚ်တြးလဝ်ရ။
အတိုၚ်အစောန်စရာဲ ဍာ်ဒကေဝ်ကိတ်ညဳမံၚ်ကဵု တၚ်နၚ်ပရေၚ်ယိုက်ဝန်ပၞာန် ကောန်ပၞာန် အရန်တံ၊ ညးကေၚ်တိုန်လဝ်ဘာပၞာန်တံတုဲ မွဲဂိတုမ္ဂး သြန်ဂိတုကီု ပရေၚ်ထံက်ပၚ်နာနာ စဵုကဵု ၁၅၀၀၀ ၜါတ် ကလိဂွံမာန်ရောၚ်။
စနူစၟတ်တ္ၚဲ ဂိတုသိပ်တေမ်ပါ ၁၀၊ သၞာံ ၂၀၂၆ တုဲ စဵုကဵုစိုပ် ဂိတုဂျာန်နဝါရဳ ၂၄ သၞာံ ၂၀၂၇ တေံဂှ် ပတိုန်လိက်ဂမြၚ် ပတီမာန်ရောၚ် ဂွံတီကေတ်ရ။
အပ္ဍဲသၞာံဘဏ္ဍာ ၂၀၂၇ ကၠာဟွံစထမံက်ရုပ်ရဴကိုန်အစဳဇန်ဏံဏီဂှ် ဒစးဒုၚ်ကော်လဝ် လိက်ဂမြၚ်ပတီတံကၠာ မဒှ်ရ။
သွက်ဂွံကော်ကောန်ပၞာန်တၟိတံ ညးနွံပၟိက်မိက်ဂွံယိုက်ဝန်ပၞာန် နကဵုဆန္ဒဇကုဟေၚ် နူကဵုအလဵုအသဳ ကော်လိက်ဂမြၚ်ပတီ ဗီုဏံဂှ်တှ်ေ နကဵုပရေၚ်အစဳဇန် မွဲသ္ကုတ်မွဲသ္ကူမွဲကီုရောၚ်။
စပ်ကဵုပရေၚ်မူဝါဒဏံဂှ် သ္ကိုပ်ဝန်ဇၞော်သေံ အနုတေန် ပတိုန်ထ္ၜးလဝ်ဇရေၚ်စၠတ်ထဝ် တုဲဒှ်ယျတုဲ အခိၚ်လၟုဟ်ဏံတှ်ေ ဒပ်ပၞာန်ဧကရာဇ်သေံ ဆက်တုဲဖန်ဇန်ရေၚ်တၠုၚ်ကၠောန်အာရောၚ် ညးနွံအခေါၚ်ဟီုဂးအလဵုအသဳ ရာတ်ချာဒါ သာနာဒဳရတ် ဟီုရ။
သွက်ညးမအံၚ်ဇၞးအာ ပရေၚ်ပတိုန်လိက်ဂမြၚ်တံဂှ်တှ်ေ ပ္ဍဲတမ်ကာလပြဟ်ဟ်ဏံ ဒးထ္ပက်လိက်ကသုက်ပွိုၚ် ၄ သၞာံတုဲ ယဝ်ရမိက်ဂွံဆက်ယိုက်ဂၠေၚ်အာ တာလျိုၚ်ဝန်ပၞာန်သီုဖအိုတ်မ္ဂး ဂၠိုၚ်အိုတ် ၈ သၞာံ ထပ်ဆက်အာယုက်မာန်ရောၚ် ဂွံတီကေတ်ရ။
ပ္ဍဲအစဳဇန်ဏံဂှ်တှ်ေ ပ္ဍဲဍုၚ်သေံ ညးကော်စ “ပၞာန်ရဝ်ဒဝ်” ကောန်ဘာတန်ဗတောန်ကွးဘာစဵုဒၞာဒေသ စနူ ၃ သၞာံ စဵုကဵု ၅ သၞာံ တိုန်လဝ်တုဲတံဂှ် ပံက်ကဵုအခေါၚ်တုဲ ကောန်ပၞာန်အရန်တံကီု သီုညးလုပ်စရၚ်အပ္ဍဲဒပ် အခိၚ်ကၠာတေံတံဂှ်လေဝ် ကဵုဖျုန်တုဲ ကော်ပကောံအာရောၚ်။
သွက်တာလျိုၚ်တံမ္ဂး ဒးအံၚ်လဝ်ဒဳဂရဳတက္ကသိုလ်တုဲ၊ ညးပတိုန်လိက်ဂမြၚ်ပတီတံဂှ်တှ်ေ ဒးနွံမံၚ်အာယုက်အကြာ ၁၈ သၞာံ ကဵု ၃၅ သၞာံတံ ဒးဒှ်ရောၚ်။
သွက်ဒၞာဲအဆံၚ် ညးတာလျိုၚ်ဟွံသေၚ်တံမ္ဂး ပညာအဆံၚ်တန်လဒေါဝ်၊ အဆံၚ်သၠုၚ် ဟွံသေၚ်မ္ဂး လိက်စၟတ်သမ္တီဘာကွတ်စက်တံ ဒးနွံတုဲ အာယုက်ဂှ်တှ်ေ စၟတ်စွံလဝ်စနူ ၁၈ သၞာံ စဵုကဵု ၃၀ သၞာံရောၚ်။
သွက်ညးပတိုန်လိက်ဂမြၚ်ပတီတံ ရုဲစှ်ကေတ်အာ ဒၞာဲဒပ်၊ တာလျိုၚ် ကိတ်ညဳကဵုဇကုတံမာန်ရောၚ် ဂွံတီကေတ်ရ။
သွက်ညးဒးဒုၚ်ကော်ဏာ ပရေၚ်ယိုက်ဝန်ပၞာန်တံမ္ဂး အခေါၚ်လွဳယဲ၊ ယဝ်ရသ္ၚိဌာန် ဒးဘဲသဘာဝမွဲမွဲသာ်မ္ဂး ပရေၚ်အထံက်ပၚ်သြန် ကေုာံ ပရေၚ်ဒုၚ်လျိုၚ်လမျီုတံ မွဲကရောံကဵုသြန်ဂိတု အခေါၚ်ပရေၚ်ဒုၚ်စသိုၚ်အိုတ်သီုတံဂှ် ပံၚ်တုဲမွဲဂိတုမ္ဂး မွဲဂိတု ကလိဂွံ ၁၅၀၀၀ ၜါတ်ရောၚ်။
ကိုန်အစဳဇန်လၟုဟ်ဂှ် သြန်လုပ် ကေုာံ ပရေၚ်မၞိဟ်ရုံဂပ်၊ ပရေၚ်ဇၞော်မောဝ်ပုဂ္ဂလိက၊ အခေါၚ်အရာပရေၚ်ပညာ ကေုာံ ကမၠောန် သီုကဵုတၠုၚ်လအာကမၠောန်အနာဂတ် စတမ် ပရေၚ်ဖဵုဂုဏ်အဓိကတံဏံဂှ် ကဵုဖျုန်တုဲကော်ဘိက်အာရောၚ် ညးနွံအခေါၚ်ဟီုဂး ရာတ်ချာဒါ ဟီုရ။
ညးယိုက်ဝန်ပၞာန်တံ သွက်သ္ဂောံဒက်ပ္တန်စေဝ်ပၞောန်၊ ညံၚ်ခန္ဓကာယ စိုတ်ဓါတ်တံဂွံခိုၚ်ဗိုန်အာတုဲ သွက်အစောန်စရာဲဂွံဒှ်အရီုဗၚ် ပ္ဍဲအခိၚ်ကၠောန်ကမၠောန်ဂတတံဂှ် ရန်တၟအ်တုဲ၊ ပရေၚ်လ္ၚတ်ပတိုက်ဗတိုက် ပရေၚ်ဆဵုဂဗဝေၚ်ပၞာန်တံဂှ် ဒးကတ်ဗတောန်လ္ၚတ်အာရောၚ်။
ဍာ်ဒကေဝ်စရာဲပညာကဵု အစောန်စီုသကီုပရေၚ်ကမၠောန်ညးတံ ညံၚ်ဂွံတောတက်အာဂှ် ကၠောန်ကဵုအာတုဲ ကြဴနူနုက်တိတ်နူဒပ်ပၞာန်တုဲမ္ဂးတှ်ေ အရာသွက်သ္ဂောံရုဲစှ်အာ သွက်ကမၠောန်ညးတံလေဝ် ပဵုတုဲသၠဲလးကၠုၚ်မာန်ရောၚ်။
Ref:Aseannow