သဓီု-သိပ်တေမ်ပါ ၈
အပ္ဍဲတွဵုရးမန် လတူဍုၚ်သဓီု ပ္ဍဲကဵုဆေၚ်အရက် နွံမံၚ်အကြာအရာပ်တံဂှ် ဒပ်ပၞာန်သီအဝဵု၊ ဗၠာဲသၟိၚ် ကေုာံ ဂကောံဒပ်မၚ်ကွာန်တံ ဗက်ရပ်မံၚ်ပဝ်တာဆက်က်ကၠောန်မံၚ်ရဂှ် ညးလတူဍုၚ်တံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ဂကောံပံၚ်တောဲ ဒပ်ပၞာန်သီအဝဵုတံဝွံ စနူတမ်ဂိတုသိပ်တေမ်ပါ ဏံတုဲ ပ္ဍဲဆေၚ်အရက် နွံမံၚ်ပ္ဍဲအရာပ်နာန်ခေဝ်၊ လိက်အေၚ် ကေုာံ အံက်ကျေန် ဍုၚ်သဓီုတံဂှ် စဗက်ရပ်လဝ် ပဝ်တာအိုတ်ရ။
ပ္ဍဲဂိတုသိပ်တေမ်ပါ ၅ တေံဂှ် ပ္ဍဲကဵုဆေၚ်အရက် နွံအရာပ်အံက်ကျေန် သ္ကုတ်အံၚ်မျေယှိုဲဗုၚ်ဂှ် ကၠုၚ်ရပ်ဏာလဝ် မၞိဟ်သုၚ်မံၚ် အရက် ၁၃ တၠ၊ ဒၞာဲဆေၚ်အရက် ကရပ်ကျာ်ယှိုဲသာယာန် အရာပ်အံက်ကျေန် မၞိဟ်သုၚ်မံၚ်အရက် ၅ တၠတံဂှ်ရ။
တုဲပၠန် ပ္ဍဲဂိတုသိပ်တေမ်ပါ ၇ တေံလေဝ် အကြာဆေၚ်အရက်ဒမၠုက် နွံမံၚ်အရာပ်လိက်အေၚ် ဍုၚ်သဓီုဂှ် ထပ်ရပ်ဏာရဲဂဇအ်သုၚ်မံၚ် အရက် ၈ တၠတံနွံကီုရ။
အတိုၚ်ညးလတူဍုၚ်တံ ဟီုမ္ဂး မၞိဟ်ဒးဒုၚ်ရပ်ဏာဗွဲမဂၠိုၚ်တံဂှ်တှ်ေ ဟိုတ်နူသုၚ်အရက်တုဲ မၞိဟ်တဏံဝွံ ရဲဇိုၚ်တဲဒေၚ်မံၚ်တံကီု၊ ရဲဒးလဝ်ယဲကျာ၊ ရဲခန္ဓကာယဟွံထတ်ယုက်၊ ရဲကတေၚ်ဓဇက်မံၚ် ကေုာံ ရဲဇိုၚ်တဲဂုဟ်မံၚ်တံသၟး ပါလုပ်မံၚ်ရောၚ် သ္ဂးရ။
သွက်ဂွံအာတန်ဗ္တောန်ဘာယိုက်ဝန်ပၞာန်ညးဍုၚ်ကွာန် လၟေၚ် ၂၉ ဏံဂှ် ဟိုတ်နူ ဝန်ဇၞော်ပရေၚ်ဂီုကၠီုဒေသပယျဵု တွဵုရးမန် သ္ကိုပ်ဗိုလ်ဇၞော် ကျဝ်ဇွာမျေအ် ကဵုဇြဟတ်ဟရိုဟ်တုဲ ပရေၚ်ဗက်ရပ်ပဝ်တာ ရဲသၟာအရက်တံဏံ ဒှ်မာန်ရောၚ် ဟီုဂးမံၚ်အိုတ်ရ။
အပ္ဍဲပွိုၚ်ဍုၚ်သဓီု သွက်ဂွံအာဘာတန်ဗ္တောန်ယိုက်ဝန်ပၞာန်ဂှ် သၟတ်စိုပ်ကၠုၚ်အဝဲ လုပ်အဝေါၚ်ပရေၚ်ယိုက်ဝန်ပၞာန်မ္ဂး နကဵုနဲကဲနာနာ ဒပ်ပၞာန်သီအဝဵုတံဗက်ရပ်တုဲ ပကောံကေတ်မံၚ် ကောန်ပၞာန်တၟိတံရ။
အတိုၚ်တၚ်နၚ် ဌာန်ပရိုၚ်သြၚ်လောန်တိုၚ်မ် ပကောံလဝ်မ္ဂး ပ္ဍဲတွဵုရးမန် ဒပ်ပၞာန်ဗမာ ပံက်မံၚ်ဘာတန်ဗ္တောန်ယိုက်ဝန်ပၞာန် ဇၟာပ်ဂိတု စနူလၟေၚ် ၁ စဵုကဵုစိုပ်လၟေၚ် ၂၈ ဂှ် သၟတ်အပ္ဍဲဒေသ ဟွံအောန်နူ ၅၈၀၀ တၠဒးဒုၚ်ပကောံဏာတုဲ ဒှ်အာကောန်ပၞာန်တုဲရ။
ပရိုၚ် – သြၚ်လောန်တိုၚ်မ်
Photo – CJ