ၜဳကလေၚ်၊ သိပ်တေမ်ပါ ၈
အပ္ဍဲတွဵုရးမန် ပွိုၚ်ဍုၚ်ၜဳကလေၚ် ကွာန်ထံက်ဇြဲဂှ် ဟိုတ်နူမကမ်လွဟ်ဇၞော် ဒပ်ပၞာန်ဗမာပန်လဝ် ဒတုံခတိုဟ်စှ်ေတုဲ ကောန်ၚာ်မွဲတၠ ချိုတ်တုဲ၊ သီုကဵု မိကောန်ၚာ် ဒးအာဘဲဝပ်ရဂှ် ဂွံတီနူကဵု KNU ခရိုၚ်သဓီု ရ။
အပ္ဍဲကဵုဂိတုသိပ်တေမ်ပါ ၆ လောန်ကၠုၚ်ဏံ အခိၚ်တ္ၚဲစေၚ်ၜိုတ် ၃ နာဍဳဂှ် ပေါဲဗတိုက်ဟွံမွဲကီုလေဝ် နူကဵုဒပ်ပၞာန်သီအဝဵု ပန်ပၠုပ်ဏာ လွဟ်ဇၞော် ၈၁ မမ ၂ မ အပ္ဍဲကွာန်ထံက်ဇြဲဂှ်ရောၚ်။
ဟိုတ်နူမကမ်လွဟ်ဇၞော် ဒတုံခတိုဟ်အာတုဲ ကောန်ကွာန်ထံက်ဇြဲ မအိဖျိုဝ်မျာတ် အာယုက် ၁၀ သၞာံ ချိုတ်အာအပ္ဍဲဒၞာဲဂှ်မွဲလန်ဓဝ်တုဲ မိကောန်ၚာ် ဒဝ်နဝ်တဳ အာယုက် ၄၆ သၞာံဂှ်လေဝ် ဒးအာဝပ် အပ္ဍဲကဵု သၚ်အိက်ညးကီုရ။
ပရေၚ်ပန်လွဟ်ဇၞော်ဏံဂှ် နူကဵုဌာန်ဂအုပ် ၝောံဒပ် ၄၄ ဖျေံသ္ဇိုၚ်ကျာ်ထဝ် ကၠောန်သ္ပလဝ်ရောၚ်ဂှ် ညးအုပ်ကာခရိုၚ်သဓီု KNU ပဒို သဝ်အေဝ်နိုၚ် ဟီုကဵုဌာန်ပရိုၚ်သြၚ်လောန်တိုၚ်မ်ရ။
ပရေၚ်ဒပ်ပၞာန်ပန်လဝ်လွဟ်ဇၞော် ကွာန်ထံက်ဇြဲဏံဂှ် ဒှ်မံၚ်တိဍာ် ပရေၚ်အုပ်ဓုပ်ခရိုၚ်သဓီု ဗော်သွးကောန်ဂကူကရေၚ် KNU သ္ဂးရ။
ပ္ဍဲခရိုၚ်သဓီု KNU ပရေၚ်ပေါဲဗတိုက်အကြာၜါလပါ် ယအ်စှ်ေကၠုၚ်မံၚ်ကီုလေဝ် နူကဵုဒပ်ပၞာန်သီအဝဵုတံဂှ် ဆက်တုဲပန်မံၚ်လွဟ်ဇၞော် အပ္ဍဲကွာန်ညးဍုၚ်ကွာန် မံၚ်စံၚ်တန်တဴမံၚ်တံဖိုဟ်ရ။
အပ္ဍဲဂိတုအဝ်ဂတ် လောန်ကၠုၚ်မွဲဂိတုဓဝ်ဂှ် ပ္ဍဲခရိုၚ်သဓီု KNU ဟိုတ်နူဒပ်ပၞာန်ဗမာ ပန်လဝ်လွဟ်ဇၞော်တံတုဲ ကောန်ၚာ်မွဲတၠချိုတ်အာ၊ ၁၃ တၠ ဒးလဝ်ဝပ်ရောၚ် ဂွံတီကေတ်ရ။
ပရိုၚ် – သြၚ်လောန်တိုၚ်မ်
Photo – KNU