ကျာ်မြဟ်၊ သိပ်တေမ်ပါ ၈
အပ္ဍဲတွဵုရးမန် ပွိုၚ်ဍုၚ်ကျာ်မြဟ် ဂကောံပံၚ်တောဲဒပ်ပၞာန်သီအဝဵု ကေုာံ ဒပ်ဗၠာဲသၟိၚ်တံ ရပ်ဏာလဝ်ကွဳစက်ဖ္ဍိုက်ပၠုပ်နၚ် ကပေါတ်ဗၞိက်နူသေံ ကြပ် ၆၀ မရဂှ် ညးဒေသတံ ဟီုကဵုဌာန်ပရိုၚ် သြၚ်လောန်တိုၚ်မ် ရ။
အပ္ဍဲဂိတုသိပ်တေမ်ပါ ၅ လောန်ကၠုၚ်ဏံ ပ္ဍဲအကြာကွာန် ကျက်တောန်ကုၚ်ကေုာံ ကွာန်နာတ်သာန် လတူဂၠံၚ်ကွဳစက် ကျာ်မြဟ်-မတ်မလီုဂှ် ကွဳစက်ဖ္ဍိုက်ကပေါတ် ပၠုပ်နၚ်နူသေံတံဂှ် ဂကောံပၞာန်ဗမာတံရပ်ဏာလဝ် မဒှ်ရ။
ကပေါတ်သေံ ဖဍိုက်ပၠုပ်နၚ်နူဍုၚ်ကျာ်ပိတံ စိုပ်ကၠုၚ်ကရပ် ရုၚ်စက်တိဗဳလာတ် ကွာန်ဂဒုၚ်သှ်ေ ပွိုၚ်ဍုၚ်ကျာ်မြဟ်ဂှ် ဒေါအ်ဇူမွဲခဏတုဲ နူကဵုဒၞာဲဏံမွဲအဆံၚ် အဟိန်ပြံၚ်ဖဍိုက်ပါ်တြးကဵုမံၚ် ကွဳစက်ဍောတ်တ်တံဂှ် ဒးဒုၚ်ရပ်ဏာ သ္ဂးရ။
ကပေါတ်သေံတံဂှ် စနူကဵု ပ္ဍဲဂိက်တံလေဝ် အလဵုအသဳပၞာန်ရပ်ကေတ်မံၚ်နွံဂှ်ကီု ဟိုတ်နူပရေၚ်ဗက်ရပ်မံၚ်ဗီုဏံတုဲ ကပေါတ်သေံတံၚုဟ်မးသၠုၚ်တိုန်မံၚ်ရောၚ် ညးဒေသမွဲတၠ ဟီုရ။
“ကပေါတ်သေံဂှ်တှ်ေ ပြဟ်ဟ်ဏံ ပ္ဍဲဂိက်တံရ ဍေံတံရပ်မံၚ်နွံ၊ လပါ်ပိုဲတံတှ်ေ လုပ်ကၠုၚ်နူကျာ်ပိရ၊ အဓိကတှ်ေ ကပေါတ်နူသေံတံရ စကာသုၚ်စောဲဂၠိုၚ်အိုတ်၊ ဗွဲမဂၠိုၚ်တှ်ေ ကပေါတ်စၞစသုၚ် ကေုာံ ကပေါတ်ပရေၚ်သုၚ်စောဲ နူဍုၚ်သေံတံ သုၚ်စောဲဂၠိုၚ်မံၚ်တှ်ေ၊ အတိုၚ်ဍေံတံ ဗက်ရပ်မံၚ်ဗီုဏံမ္ဂး ၚုဟ်ကပေါတ်တံ သၠုၚ်တိုန်အာရနွံလေဝ်” သာ်ဝွံ သ္ဂးရ။
တုဲပၠန် ညံၚ်ရဴကပေါတ်သေံ မနွံကဵုဍာ်ဒကေဝ်ခိုဟ်ဟ် သုၚ်စောဲမံၚ်အပ္ဍဲဍုၚ်ဏံဂှ် နူကဵုအလဵုအသဳပၞာန် ကၠောန်ပတိတ်ကဵုလေဝ်ဟွံမာန်တုဲ ဗက်ရပ်အာမံၚ်အတိုၚ်ဗီုဏံဂှ်တှ်ေ သွက်ညးဍုၚ်ကွာန်တံ ဒးဆဵုဂဗအာ ပရေၚ်အခက်အခုဲ ကြေပ်ဂြတ်ဇၞော်ဇၞော်တံပဵုဂၠိုၚ်တိုန်ရောၚ် ညးပါ်ပါဲလဝ်ရ။
ကွဳစက်ဖ္ဍိုက်ကပေါတ်သေံ ကြပ် ၆၀ မ ဒးဒုၚ်ရပ်လဝ်လၟုဟ်ဏံဂှ် အတိုၚ်သ္ကိုပ်ဗိုလ်ဇၞော် ကျဝ်ဇွာမျေအ် ဝန်ဇၞော်ပရေၚ်ဂီုကၠီုဒေသပယျဵု တွဵုရးမန်ကဵုလဝ်အခေါၚ် တတ်ကၠုၚ်ဂိက်ဒဒန်ဇၞော် ထီုမၠဵု ဍုၚ်ကျာ်မြဟ် ဂိက်ဂကောံပံၚ်တောဲ လုပ်သၞောဝ်တံတုဲမှ ဒဒှ်ရ ဒးဒုၚ်ရပ်ဏာဗီုဏံဂှ်တှ်ေ ဒှ်အရာပရေၚ်တၚ်သၟာန် ပ္ဍဲအကြာ ညးဒေသတံနွံရ။
မွဲလပါ်ပၠန် ရဲသၟဝ်တဲအလဵုအသဳပၞာန် တွဵုရးမန်တံဂှ် ကပေါတ်သေံဟီုတှ်ေ ပ္ဍဲဂိက်လုပ်တိတ်ဍုၚ်တံဂှ်လေဝ် ရပ်မံၚ်၊ ပ္ဍဲဂၠံၚ်ကပေါတ်သေံတံ လုပ်ကၠုၚ်ဂှ်လေဝ် ဗက်ရပ်မံၚ်၊ ဒၞာဲဂိုဒံၚ် ခြိုၚ်စွံကပေါတ်တံလေဝ် ရပ်မံၚ်၊ သီုကဵုပ္ဍဲဖျာဂှ်လေဝ် ဟွံကဵုသတိ မွဲသာ် ဗက်ရပ်မံၚ်အိုတ်ရ။
ၜိုန်ရဟီုမံၚ် ကပေါတ်ဟွံလုပ်သၞောဝ်ဂးတုဲ ရဲသၟဝ်တဲအလဵုအသဳပၞာန်တံ ဗက်ရပ်မံၚ်အတိုၚ်ဗီုဏံဂှ်ရ အပ္ဍဲဒေသမ္ဂး ကပေါတ်သေံလ္ၚဵုတံ ၚုဟ်သၠုၚ်တိုန်ညိညတုဲ ကပေါတ်ဗၞိက်လ္ၚဵုတံဂှ်လေဝ် စပိုတ်အိုတ်ကၠုၚ်မံၚ်ကီုရောၚ် ညးဒေသတံ သ္ဂးရ။
လၟုဟ်ဏံ သွက်သ္ဂောံဖဍိုက်ပလံၚ်ကပေါတ်သေံ ဗွဲမလုပ်သၞောဝ်မာန်ဂှ် ရဲသၟာဗၞိက်တံဂစာန်မံၚ်ကီုလေဝ် နူကဵုအလဵုအသဳပၞာန်ဂှ် ဍေံတံကၟာတ်လဝ်လာၚ်ဇြေန် ပရေၚ်ပၠုပ်နၚ်ကပေါတ်တံတုဲ ဒးပလံၚ်ပၠုပ်ကေတ်မံၚ် နကဵုဗီုပြၚ် ဂအာၚ်ဖျာဒမၠုတံရောၚ် သၟာဗၞိက်တံဟီုရ။
မပ္တံကဵုကပေါတ် စၞစသုၚ်သ္ဇိုၚ်၊ ကပေါတ်မၞိဟ်တံရပ်စပ်နာနာ၊ ဂဥုဲနာနာ၊ ကပေါတ်ကျိုၚ်ကျဝ်၊ ကပေါတ်ပရေၚ်သိုၚ်ခၞံကေုာံ ကပေါတ်သုၚ်စောဲပရေၚ်နာနာတံဂှ် ဒးပၠုပ်နၚ်နူကဵုရးနိဂီုဍုၚ်သေံတုဲ နကဵုပရေၚ်အဓိကမွဲ သုၚ်စောဲမံၚ် အပ္ဍဲကဵုတွဵုရးမန်ရ။
ပရိုၚ် – သြၚ်လောန်တိုၚ်မ်
Photo – Social Media