နေပျဳဒဝ်၊ သိပ်တေမ်ပါ ၈
အပ္ဍဲလၟေၚ်တရဴဗဳယက်နာန် က္ဍိုပ်သ္ကိုပ်ပၞာန်သီအဝဵု ခါန်ကၞက်လဝ်ကေတ်တ် သမ္မတ ဥူမေန်အံၚ်လှိုၚ်ဂှ် သွက်သ္ဂောံဇၞော်ပတိုန်ပရေၚ်ပံၚ်တောဲ ကၠောန်ကဏ္ဍစုၚ် စပ်ကဵုပရေၚ်ဍုၚ်ကွာန်၊ ပရေၚ်စဵုဒၞာကေုာံ ပရေၚ်ဂီုကၠီု အကြာၜါ ရးနိဂီုဍုၚ်တံသဳကၠဳလဝ်ရဂှ် နူကဵုအလဵုအသဳပၞာန် ပတိတ်လလောၚ်တြးလဝ်ပရိုၚ်ရ။
စနူအံက်တိုဝ်ဗာ ၄ စဵုကဵု ၆ ဂှ် ဂကောံအလဵုအသဳပၞာန်ဗမာ ဥူမေန်အံၚ်လှိုၚ် သ္ပက္ဍိုပ်တုဲ အာစိုပ်လဝ်ရးနိဂီုဗဳယက်နာန် ဆဵုဂဗလဝ်ကဵု သမ္မတ တိုဠာန် ၊ သ္ကိုပ်ဝန်ဇၞော်ကေုာံ ဥက္ကဌစၠတ်ထဝ် ကောန်ဂကူတံ ဗွဲတၞဟ်ခြာရ။
အပ္ဍဲပေါဲဆဵုဂဗတံဂှ်မ္ဂး သွက်ဂွံသၠုၚ်ပတိုန်ဂလာန်ပတေဟ် ပရေၚ်ဍုၚ်ကွာန်ကေုာံ ပရေၚ်လညာတ်ဓဝ်ကၠိုဟ်ခၠၚ် အကြာၜါဍုၚ်၊ ပရေၚ်စဵုဒၞာကေုာံ ပရေၚ်ဂီုကၠီု၊ ပရေၚ်ပိုန်ဒြပ်၊ ပရေၚ်ကူသာန်ဗၞိက်၊ ပရေၚ်ဓလိုက်တမ်ရိုဟ် စတမ်နူကဏ္ဍစုၚ်ၚ်တံမ္ဂး သီုကဵုၜါလပါ် မိက်ဂွံဇၞော်ပတိုန်ပရေၚ်ပံၚ်တောဲတံရဂှ် သဳကၠဳလဝ်အိုတ်ရ။
တုဲပၠန် သွာၚ်ပရေၚ်ဆက်စၠောံ၊ တင်နၚ်ပရိုၚ်ကေုာံ နဲကဲပညာ၊ ပရေၚ်တဵုလွဳ၊ ပရေၚ်လွဳလွတ်၊ ပရေၚ်ပညာ၊ ပရေၚ်ထတ်ယုက်၊ ပရေၚ်မၞိဟ်၊ ကေၚ်ကာညးဗြဴ၊ ယေန်သၞာၚ်ကေုာံ စပ်ကဵုပရေၚ်အာတရဴတံ သွက်ဂွံသၠုၚ်ပတိုန် ပရေၚ်ပံၚ်တောဲတုဲ ကၠောန်အာမဒှ်ရ။
ပါဲနူဂှ်ပၠန် ပရေၚ်ဆက်ဆောံ အကြာအလဵုအသဳကဵု အလဵုအသဳ၊ စၠတ်ထဝ်ကဵု စၠတ်ထဝ်၊ ဗော်ပရေၚ်ဍုၚ်ကွာန်ကဵု ဗော်ပရေၚ်ဍုၚ်ကွာန်၊ ညးဍုၚ်ကွာန်ကဵု ညးဍုၚ်ကွာန်တံ ညံၚ်ဂွံပဵုသၠုၚ်တိုန်အာ သီုကဵုအပ္ဍဲဒေသကေုာံ ဂတမုက်ဂၠးကဝ်တံဂှ်လေဝ် သွက်သ္ဂောံဗိုၚ်ထံက်ဂလာန် ပံၚ်တောဲရေၚ်တၠုၚ်အာမာန်တံလေဝ် ပါလုပ်မံၚ်ရ။
လၟေၚ်တရဴ ဍုၚ်ဗဳယက်နာန်ဏံဂှ် ဆၜိုတ်ဇၞော်သၠုၚ်ပတိုန် ပရေၚ်စုက်လုက် ဆက်ဆောံၜါရးနိဂီုဍုၚ်တံဟွံက သီုကဵုပရေၚ်ဇၞော်သၠဲပတိုန် ပရေၚ်စုက်လုက်ဆက်ဆောံအာကဵု ဍုၚ်ကောန်ဂကောံအာသဳယာန်တံကီုရောၚ်ဂှ် ညးနွံအခေါၚ်ဟီုဂး ရုၚ်သမ္မတ အလဵုအသဳပၞာန် ဒံက်တာ ခိုၚ်ခိုၚ်သိုဝ် ဟီုလဴကဵုလဝ် မဳဒဳယာပရိုၚ်တံရ။
နကဵုပၟိက်ဆန္ဒ ဥူမေန်အံၚ်လှိုၚ် မွဲတှ်ေ ဒပ်ပၞာန်ပၠတရဴကၠောန်အာပရေၚ်ပိုန်ဒြပ်တံတုဲ ညံၚ်ဂွံကေမ်ဇျှာပ်ထိၚ်ချုက်ကေတ်လဝ် အဝဵုဍုၚ်မာန်ဂှ် ညးမိက်ဂွံကဵုဒှ်ရောၚ် ညးအုပ်ကာ ကံၚ်သဳမဳဒဳယာပရိုၚ်ဗၟာဗၠးၜး ဥူတိုဝ်ဇြဝ်လာတ် သ္ၚဳဂၠိပ်လဝ်ရ။
“လၟေၚ်တရဴဗဳယက်နာန်ဂှ်လေဝ် နတဲမ္ဂး ဥူမေန်အံၚ်လှိုၚ် မိက်ဂွံကၠောန်ဂှ် ရးနိဂီုဗဳယက်နာန်ဟီုတှ်ေလေဝ် ဒှ်မံၚ်ဍုၚ်တၠအဝဵုကီုရ။ ပ္ဍဲဍုၚ်ဗၟာ ဗီု Mytel ဒပ်ပၞာန် အုပ်ဓလီုဂှ်ကီု (ဗဳယက်နာန် ကဵု ဗၟာ) ဒပ်ပၞာန်ၜါ ပံၚ်တောဲလဝ်ရ။ ပရေၚ်ညးအဓိက မိက်ဂွံဂွံဂှ်တှ်ေ ဟွံဒးသၠးထောံကၠေံ ပရေၚ်သြဇာအဝဵုဒပ်ပၞာန်မွဲသာ် စကာသုၚ်စောဲအာ ပရေၚ်ပိုန်ဒြပ်ဒပ်ပၞာန်ပၠတရဴတုဲ သွက်သ္ဂောံဆက်ထိၚ်ဒဝ်အဝဵု နဲကဲပညာဂှ်ဟေၚ် ညးမိက်ဂွံဂွံ။ ပ္ဍဲဂကောံအာသဳယာန်ဟီုမ္ဂးတှ်ေ သွက်ပရေၚ်ဒးဇီုကပိုက် ကဏ္ဍကိစ္စဇၞော်ဇၞော်တံဂှ် မုမွဲသာ်မှလေဝ်ဟွံမွဲပုဟ် အဲမိက်ဂွံဟီုရအဴ” သာ်ဝွံ သ္ဂးရ။
ပြဟ်ဟ်ဏံ အလဵုအသဳပၞာန် ဂွံမံၚ်ပရေၚ်ထံက်ဂလာန် သ္ပစၟတ်သမ္တီ ပရေၚ်လုပ်သၞောဝ်သွာၚ်ပရေၚ်ဍုၚ်ကွာန် နူကဵုဍုၚ်မိတ်သဟာဲ ကြုက်၊ ရတ်ယှာ၊ ဗေလာရုသ်၊ အိန္ဒိယတံကဵု ဍုၚ်အပ္ဍဲဒေသလ္ၚဵုတံကီုလေဝ် နူအာသဳယာန်ကဵု ပွဳဗွိုၚ်ဂၠးကဝ်တံဂှ်တှ်ေ ဆက်တုဲ ပါဲစွံလဝ်တၞဟ်ခြာဏီရ။
ပြဟ်ဟ်ဏံမ္ဂး က္ဍိုပ်သ္ကိုပ်ပၞာန်သီအဝဵု ဥူမေန်အံၚ်လှိုၚ် နကဵုတာလျိုၚ်သမ္မတ ခါန်ကၞက်လဝ်ကေတ်တ်ဂှ် အာစိုပ်လဝ် ဍုၚ်လဴ၊ ဍုၚ်သေံ၊ ဗဳယက်နာန် တုဲဒှ်အာယျ။ ခြာဟွံလံဏံ သွက်ဂွံအာ ရးနိဂီုဍုၚ်ခမေန် နွံမံၚ်တုဲ ပါဲနူဂှ်ပၠန် သွက်သ္ဂောံဆက်အာ ဍုၚ်ကောန်ဂကောံ အာသဳယာန်တၞဟ်ဟ်တံလေဝ် အစဳဇန်နွံမံၚ် ရောၚ်ဂှ် နူကဵုအလဵုအသဳပၞာန် ဟီုပတိတ်လဝ်ရ။
ဣဏံဂှ်တှ်ေ နူဒပ်ပၞာန်သီအဝဵု ပြံၚ်လှာဲဗီုပြၚ် အလဵုအသဳညးဍုၚ်ကွာန်တုဲ နကဵုပရေၚ်ဍုၚ်ကွာန်လုပ်သၞောဝ် ညံၚ်ဂကောံဂၠးကဝ်တံ သွက်ဂွံသ္ပစၟတ်သမ္တီ နဒဒှ်အလဵုအသဳ ဒးဒုၚ်ရုဲစှ်ဂှ်ကီု ဂစာန်မံၚ်ညံၚ်သ္ဂောံကလေၚ်လုပ်စိုပ် အပ္ဍဲအာသဳယာန်မာန်တုဲ ဗက်သၠုၚ်ပတိုန်မံၚ်ပရေၚ်ဆက်ဆောံကဵု ဍုၚ်ကောန်ဂကောံတံရောၚ်။
အခိၚ်လၟုဟ်ဏံ သွက်တရဴဍုၚ်ဗၟာ ဒက်ပတန်အာ ရးနိဂီုဍုၚ် ဒဳမဝ်ကရေဇြဳဂွံခိုၚ်ဗိုန်တိုန်အာမာန်ဂှ် ထမံက်မံၚ်ရုပ်ရဴ သၞောတ်ဖိတ်ဒရေဝ် ဒုၚ်သ္ဇိုၚ်ကဵုဒေသတံတုဲ နူစၠတ်ထဝ်ကောန်ဂကူ ဗဳယက်နာန်တံလေဝ် ၜိုတ်သ္ပမာန်မိက်ဂွံကဵု ဗိုၚ်ထံက်ပၚ်ရီုဗၚ် ကဵုညိကီုဂှ် ဥူမေန်အံၚ်လှိုၚ် ဟီုလဝ်ရ။
အပ္ဍဲမုက်ဗလးဒေသကေုာံ စၠတ်ထဝ်ဂၠးကဝ်တံမ္ဂး သွက်ဂွံဆက်ကၠောန်လှာဲဂတးအာ ပရေၚ်ထံက်ပၚ်မာန်ကီု ညံၚ်သ္ဂောံဇၞော်သၠုၚ် ပရေၚ်ပံၚ်တောဲရေၚ်တၠုၚ်ကၠောန်ၜိုတ်အာ အကြာစၠတ်ထဝ်အာသဳယာန်တံဂှ်ကီု အကြာစၠတ်ထဝ်ၜါဍုၚ်ဏံ ဆက်တုဲပံၚ်တောဲအာကြပ်ပ်မာန်ရောၚ် သ္ဂးရ။
မွဲလပါ်ပၠန် ကုညးပူဂဵု၊ ဂကောံလဵုမွဲဟွံဟီု နူပ္ဍဲတိဍာ်အကြာၜါရးနိဂီုတံမ္ဂး ညံၚ်ဟွံကဵုအခေါၚ်ပရေၚ်ချဳဒရာၚ် ပရေၚ်ဒစဵုဒစး လတူအလဵုအသဳ သီုၜါလပါ်တံဂှ်လေဝ် ပ္ဍဲသိပ်တေမ်ပါ ၅ တေံ အခိၚ်ပေါဲဆဵုဂဗ သမ္မတ ဗဳယက်နာန် တိုဠာန် ကဵု ဥူမေန်အံၚ်လှိုၚ်တံ ပ္ဍဲဍုၚ်ဟနေၚ်ဂှ် ကဵုလဝ်ဂတိဝတ်ညးသ္ကံကီုရောၚ်။
အကြာက္ဍိုပ်သ္ကိုပ်ၜါလပါ် စွံလဝ်ပရေၚ်တၚ်တုပ်စိုတ် ကဵုလဝ် ဂတိဂဝတ်ဗီုဏံဂှ် နူကဵုအလဵုအသဳဗဳယက်နာန် လလောၚ်တြးပတိတ်လဝ်ပရိုၚ်ကီုလေဝ် ပ္ဍဲလိက်လလောၚ်တြး လပါ်အလဵုအသဳပၞာန်ဗမာဂှ် စုတ်ထမံက်ထ္ၜးလဝ် ဟွံဆဵုပုဟ်။
သွက်ဂွံပတိုက်သရိုဟ်ပလီုထောံ ဂကောံဇြဟတ်ပၠန်ဂတးတံ ရဲထံက်ပလံၚ်ဗမာ နူဍုၚ်နာနာပါလုပ်မံၚ် အပ္ဍဲပရေၚ်ပၠန်ဂတး နကဵုမွဲနဲမွဲဗီုတံဂှ်တှ်ေ ဍေံတံကၠောန်အာဗီုဏံရောၚ်ဂှ် က္ဍိုပ်သ္ကိုပ်ကွးဘာတြေံ ကိုမေန်တွိုဲတေတ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“လပါ်အလဵုအသဳပၞာန်တှ်ေ ပ္ဍဲဂၠးကဝ်ကီု သီုအပ္ဍဲဒေသတံကီု ဗွဲမတၟေၚ် ရဲဂြိပ်ပါဲပရေၚ်ယိုက်ဝန်ပၞာန် ပြးဇးစိုပ်အာ ဍုၚ်အပ္ဍဲဒေသတံ၊ တုဲတှ်ေ ရဲပြံၚ်ဆုဲအာ ဗွဲမဟွံလုပ်သၞောဝ်တံ ညးမနွံမံၚ် အပ္ဍဲဂကောံဇြဟတ်ပၠန်ဂတး ဗီုဗီုတံဏံဂှ် ဍေံတံမိက်ဂွံပလီုသၠေက်ထောံရ။ တုဲပၠန် သၟာကမၠောန်ဗၟာ စိုပ်မံၚ်ဍုၚ်သအာၚ်တံ ကၠောန်မံၚ်ပရေၚ်ထံက်ပလံၚ်တံဂှ်လေဝ် ဂၠံၚ်ဍာန်ထံက်ပလံၚ်ညးတံဂှ် ဍေံတံမိက်ဂွံဗတိုက်ပလီုထောံဏောၚ်။ ဟိုတ်ဂှ်ရ နကဵုနဲကဲပရေၚ်ဍုၚ်ကွာန် မွဲဍုၚ်တုဲမွဲဍုၚ် ဗက်စန်ဒက်အာတုဲ ကၠောန်မံၚ် မဒှ်ရ” သာ်ဝွံ သ္ဂးရ။
ပရေၚ်မွဲဍုၚ်ကဵုမွဲဍုၚ် ဖဵုပရဲပရၚ်ပရေၚ်ပိုန်ဒြပ် မူဝါဒတံ ဟွံတုပ်သၟဟ်ညးသ္ကံတုဲ ရးနိဂီုဗဳယက်နာန်ဂှ် ညံၚ်ရဴဍုၚ်သေံ ဒးစကာမံၚ်သၟာကမၠောန်ဗၟာ ဗွဲမဂၠိုၚ်လေဝ်ဟၟဲကီုတုဲ ရဲစိုပ်မံၚ်ဍုၚ်ဂှ်တှ်ေ ထေက်ကဵုဒးစွံသတိကီူရောၚ် ညးထံက်ထ္ၜးလဝ်ရ။
အကြာညးတာလျိုၚ်အဆံၚ်သၠုၚ် ၜါရးနိဂီုဍုၚ်ဗဳယက်နာန်-ဗၟာ ဟိုတ်နူပရေၚ်ဆက်စၠောံကြပ်ပ်တံနွံမံၚ်တုဲ အကြာၜါဍုၚ်ရးနိဂီုကီု ပရေၚ်ဒပ်ပၞာန်သီုၜါဍုၚ်တံဂှ် ပရေၚ်ဆက်ဆောံ ပံၚ်တောဲရေၚ်တၠုၚ်တံဂှ် ပဵုတုဲခိုၚ်ဗိုန် တောတက်ကၠုၚ်မံၚ်ရောၚ် ဥူမေန်အံၚ်လှိုၚ် ဟီုလဝ်ရ။
ပ္ဍဲသိပ်တေမ်ပါ ၆ တေံ “ဝိုၚ်သဳကၠဳပရေၚ်ပိုန်ဒြပ် ဗၟာ-ဗဳယက်နာန်” ကၠောန်ဗဒှ်လဝ် ပ္ဍဲဍုၚ်ဟနေၚ်ဂှ်တှ်ေ အကြာတၠကမၠောန်ပရေၚ်ပိုန်ဒြပ်တံ ထ္ပက်လဝ်စၟတ်တဲ လိက်သဝဏ်တၚ်တုပ်စိုတ် ပရေၚ်ပံၚ်တောဲတံဂှ် နူကဵုအလဵုအသဳပၞာန် ဟီုလဴလဝ် မဒှ်ရ။
အတိုၚ် Justice For Myanmar ထမံက်ပတိတ်လဝ်မ္ဂး ကာန်ပဏဳဗဳယက်နာန်တံ ပါလုပ်ဆက်စပ်မံၚ် ပ္ဍဲပရေၚ် ထံက်ပလံၚ်ကၠေၚ်ၜၚ်ကျာ သွက်ဂကောံပၞာန်တံတုဲ သီုကဵုပရေၚ်သၠောဲပြံၚ် ပလံၚ်ဗ္စိုပ်ကပေါတ်ဆက်စၠောံ သုၚ်စောဲပရေၚ်ပၞာန်ကဵု ဍုၚ်ဗၟာတံဂှ်လေဝ် ပါလုပ်ဆက်စပ်မံၚ်ကီုရောၚ် ဂွံတီကေတ်ရ။
ဗီုဗီုဏံ သွက်ဂကောံပၞာန်တံ ကဵုမံၚ်အရီုဗၚ်နဲကဲပညာ ပရေၚ်ထံၚ်ပရိုၚ် မၚ်ရံၚ်ဗက်ဗဵုလ္ၚတ်တံဂှ် ဒှ်ပရေၚ်ကဵုဇြဟတ် ဗိုၚ်ရီုဗၚ်မံၚ်ကဵု ရာဇဝတ်ပၞာန် ဒပ်ပၞာန်ဗမာ ကၠောန်မံၚ် လ္တူဂကူမၞိဟ် တံကီုရောၚ်ဂှ် နူကဵု JFM ပတိတ်လလောၚ်တြးလဝ်ရောၚ်။
ပရိုၚ် – သြၚ်လောန်တိုၚ်မ်
Photo – HOS