သိုလ်၊ သိပ်တေမ်ပါ ၉
ပရေၚ်ပံက်ကဵုဏာ ဒဒန်တၟိကၠာအိုတ် အကြာကိုဝ်ရဳယာသၟဝ်ကျာ ကေုာံ ရးနိဂီုရတ်ယှာဏံဝွံ သွက်ပရေၚ်ဆက်ဆောံၜါဍုၚ် ပဵုတုဲဂွံကြပ်ညောအ်ကၠုၚ်ဂှ် ဒှ်သက်သဳနတဲမွဲရောၚ် ဌာန်ပရိုၚ် KCNA အလဵုအသဳကိုဝ်ရဳယာသၟဝ်ကျာ ပ္ဍဲသိပ်တေမ်ပါ ၈ တေံ ထမံက်ထ္ၜးလဝ်ရ။
ဒဒန်တတ်ကၠောံအာ ၜဳတူမာန် သွက်သ္ဂောံဆက်စၠောံအာကဵု လပါ်ရးနိဂီုရတ်ယှာဏံဝွံ သွက်ကိုဝ်ရဳယာသၟဝ်ကျာမ္ဂး သွက်သ္ဂောံဇၞော်ပတိုန် ပရေၚ်ကူသာန်ဗၞိက် ကေုာံ ပရေၚ်ပလံၚ်ဗ္စိုပ်အာကဵု ရတ်ယှာ ဒှ်ဂၠံၚ်ဍာန်တၟိမွဲရောၚ်။
ပ္ဍဲမွဲအခိၚ်ဏံ ဆက်သိုၚ်ခၞံအာမံၚ် ဒဒန်တၟိ ဆက်စၠောံအာကဵု ရးနိဂီုကြုက်ကီုတုဲ ကိုဝ်ရဳယာသၟဝ်ကျာဝွံ သီုၜါရးနိဂီုဍုၚ် ရတ်ယှာကဵုကြုက်ဂှ် နကဵုဂၠံၚ်တရဴတိုက် ညံၚ်သ္ဂောံဆက်စၠောံအာတိုက်ရိုက်မာန် စိုပ်ကၠုၚ်မံၚ် အကာဲအရာဗီုဏံယျ။
အကာဲအရာဏံမ္ဂး နူဍုၚ်လပါ်ပလိုတ်တံ ကၠောန်ကၠုၚ်ပရေၚ်ကၟာတ်ဆိုအ် ကေတ်အရေ ကိုဝ်ရဳယာသၟဝ်ကျာမ္ဂး အခေါၚ်အရာပရေၚ်ပိုန်ဒြပ် ကေုာံ မဟာဗျူဟာနွံမံၚ်ပၟိက်အခိၚ်ကၠာတေံတံဂှ် ပဵုတုဲကလိဂွံအာမာန်ရောၚ် ညးတၠပညာစီုအကီုတံသ္ၚဳဂၠိပ်လဝ်ရ။
ကိုဝ်ရဳယာသၟဝ်ကျာ ကလိဂွံအာ ဂၠံၚ်တိုက်အဓိက ၂ ဂၠံၚ် သွက်သ္ဂောံဆက်စၠောံအာကဵု ရတ်ယှာ ကေုာံ ကြုက်တံတုဲ ပရေၚ်ပြိုၚ်ပကာန်အကြာၜါဍုၚ်ဂှ် စကာသုၚ်စောဲအာမ္ဂး သွက်ဖဵုဂုဏ်ဇကုဂွံဂွံဂၠိုၚ် ကၠောန်သ္ပအာမာန်ရောၚ် ပါမောက္ခ အေန်အူချဝ် နူတက္ကသိုလ်ဂျံၚ်နာမ် သ္ၚဳဂၠိပ်လဝ်ရ။
တုဲပၠန် ဒဒန်တံဏံဝွံ သွက်အမေရိကာန်လေဝ် နကဵုကိုဝ်ရဳယာသၟဝ်ကျာ သွက်သ္ဂောံယှအ်ဖျေံပရေၚ်ကၟာတ်ဆိုအ် ဟွံသေၚ်မ္ဂး ယှအ်ကဵုဝါယှေန်တာန်တုဲ သွက်ဂွံပလီုကၠေံ ပရေၚ်လွဟ်နျူကလဳယျာဂှ် ဒးသ္ပဗဓါန်စမံၚ်တံ ဟွံမွဲပုဟ် ဒှ်ပရိုၚ်ဂလာန်ပရေၚ်ဍုၚ်ကွာန်မွဲမာန်ရောၚ် သ္ဂးရ။
ဒဒန်တၟိဏံဝွံ ညံၚ်ပရေၚ်ပလံၚ်ဗပေၚ်ကပေါတ်အကြာၜါဍုၚ် ဂွံပဵုတုဲညံၚ်ဂွံသၠဲလးတိုန်အာဂှ် တၚ်လဝ်ဒဳဇြာၚ်တုဲ မွဲတ္ၚဲမ္ဂး ကွဳစက်ၜိုတ် ၃၀၀ မ တတ်ကၠောံအာမာန်ရောၚ် နူလပါ်ရတ်ယှာ ဟီုလဝ်ရ။
ဆဂး ဂကောံအခေါၚ်အရာမၞိဟ် ယူခရုၚ် Truth Hounds ဂှ်တှ်ေ ဒဒန်တၟိဏံဝွံ သီုသွာၚ်ပရေၚ်ပၞာန်လေဝ် စကာသုၚ်စောဲအာမာန်တုဲ သ္ဂံၚ်ပၞာန်ကိုဝ်ရဳယာသၟဝ်ကျာတံ၊ ဒပ်သိုၚ်ခၞံတံ၊ ညးတာလျိုၚ်ပရေၚ်ပၞာန်တံ သွက်သ္ဂောံလုပ်အာလပါ်ရတ်ယှာဂှ် ဒှ်ဂၠံၚ်တရဴအဓိကမွဲမာန်ရောၚ် ကၠာတေံ ကဵုလဝ်သတိနွံရ။
မွဲလပါ်ပၠန် နဲကဲပညာ ကေုာံ ရိုဟ်ကၞက် နူလပါ်ရတ်ယှာတံ ညံၚ်သ္ဂောံလုပ်စိုပ်အာ လပါ်ကိုဝ်ရဳယာသၟဝ်ကျာမာန်ရောၚ် သ္ဂးရ။
ပေါဲပံက်ဒဒန်ဏံဂှ် ပ္ဍဲသိပ်တေမ်ပါ ၇ ကၠောန်ဗဒှ်လဝ် မဒှ်တုဲ စနူသၞာံ ၂၀၂၂ တေံ ရတ်ယှာ စကၠောန်ပရေၚ်လဝေၚ်ပၞာန် လတူယူခရုၚ်တုဲ ကြဴနူဂှ် ပရေၚ်ပံၚ်တောဲပၞာန် ကေုာံ ပရေၚ်ပိုန်ဒြပ် အကြာကိုဝ်ရဳယာသၟဝ်ကျာ ကေုာံ ရတ်ယှာတံ သၠုၚ်တိုန်အာသောၚ်ၚ်ကၠးကၠးရ။
ပ္ဍဲသၞာံ ၂၀၂၄ ဂှ် ကိုဝ်ရဳယာသၟဝ်ကျာ ဗလးဏာကောန်ပၞာန် လၟိဟ်လ္ၚီဗွဲမဂၠိုၚ် ကုရးနိဂီုရတ်ယှာတုဲ ပ္ဍဲအရာတာဒၞာပရေၚ်ထပက်ပၞာန် ဒပ်ယူခရုၚ်တံ ပ္ဍဲဒေသကာတ်ဒ်တံဂှ် ဗိုၚ်ရီုဗၚ်ကဵုလဝ်ရောၚ် ပရိုၚ်တံမံက်ကၠုၚ်ရ။ နူလပါ်ယူခရုၚ်လေဝ် ရတ်ယှာဝွံ သုၚ်စောဲမံၚ်ကမ်သၠောဝ် ပတိတ်နူကိုဝ်ရဳယာသၟဝ်ကျာတံနွံမံၚ် တၚ်စောစပ်နွံရ။
သွက်သ္ဂောံဆက်စၠောံ ရးနိဂီုကြုက် ကေုာံ ကိုဝ်ရဳယာသၟဝ်ကျာတုဲ သိုၚ်ခၞံမံၚ် ဒဒန်ကၠောံ ၜဳယာလူတၟိဂှ်တှ်ေ အပ္ဍဲသၞာံဏံ တုဲဒှ်အာမာန်ရောၚ် တၠပညာတံ တော်ဆလဝ်ရောၚ်။
Ref:AFP