အပ္ဍဲကဵုပေါဲဗတိုက်တယိတ်ချံၚ် ညးဗြဴမွဲတၠ ချိုတ်အာတယိတ်ချံၚ်- သိပ်တေမ်ပါ ၉

အပ္ဍဲရးတနၚ်သဳ ပွိုၚ်ဍုၚ်တယိတ်ချံၚ် ပေါဲဗတိုက်အကြာၜါလပါ် ကွာန်တယိတ်ခွကဵုကွာန်တေန်ကျောန် ဒှ်လဝ်တုဲ ညးဍုၚ်ကွာန် ညးဗြဴမွဲတၠချိုတ်အာလဝ်ရဂှ် ရိုဟ်ကၞက်ပရိုၚ်ဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။

အပ္ဍဲအခိၚ်နူဂယး ဂိတုသိပ်တေမ်ပါ ၈  ဒပ်ပၞာန်သီအဝဵုဇြဟတ် ၁၀၀ ပြၚ်တံ ထပက်ကၠုၚ်ကရောၚ်ပၞာန်ဂှ် ဂကောံပံၚ်တောဲမဟာမိတ်ပၠန်ဂတးတံ တံၚ်မါၚ်ဗတိုက်လဝ်တုဲ ပေါဲဗတိုက် အကြာၜါလပါ် က္တဵုဒှ်လဝ်ရ။

အကြာပေါဲဗတိုက်ဒှ်မံၚ်ဂှ် ညးဗြဴအာယုက် ၅၀ သၞာံမွဲတၠ ဗက်ဂစာန်အောပ်မာကီုလေဝ် ဟိုတ်နူဒပ်ပၞာန်ဗမာ ပန်ခြော်မံၚ်ကြာန်န်တုဲ ဒးမကမ်ချိုတ်အာအပ္ဍဲဒၞာဲက္တဵုဒှ်ဂှ်ဟေၚ် သ္ဂးရ။

အတိုၚ်ညးဒေသတံဟီုလဴမ္ဂး  ညးဗြဴချိုတ်အာပ္ဍဲပေါဲဗတိုက်ဂှ် မဒှ်ဒဝ်မျေအ်မဝ် မံၚ်ဒၟံၚ်ကွာန်တယိတ်ခွရောၚ် ဂွံတီကေတ်ရ။

ဟိုတ်နူပေါဲဗတိုက်အကြာၜါလပါ်ဒှ်တုဲ ပ္ဍဲသ္ကုတ်ဂၠံၚ်ကၟိန်ဍုၚ် ဗိတ်-ထဝါဲဂှ် ကွဳစက်လၟိဟ်ကၠံပြၚ်ၚ် မာတ်ဆိုအ်အာမံၚ်တုဲ စဵုကဵုအခိၚ်တ္ၚဲစေၚ် ကလေၚ်ပံက်ဂၠံၚ်ဟွံမာန်ဏီ ဂွံတီရ။

ကရောၚ်ပၞာန်ဒပ်ပၞာန်ဗမာ ကရောံထပက်လုပ်ကၠုၚ်ဂှ် ပေါဲဗတိုက်အကြာၜါလပါ်ဒှ်တုဲ ညးဍုၚ်ကွာန်ကောန်ဒေသ ကွာန်တယိတ်ခွ ကေုာံကွာန်တေန်ကျောန်တံ ဒးအောပ်မာမံၚ်အပ္ဍဲအကြာသ္ၚိဌာန်တံရ။

ပ္ဍဲပွိုၚ်ဍုၚ်တယိတ်ချံၚ်ဂှ် စနူဂိတုလောန်ကၠုၚ်တေံတုဲ ဒပ်ပၞာန်သီအဝဵုထပက်မံၚ်ကရောၚ်ပၞာန် မွဲဏှမွဲဏှကၠောန်သ္ပမံၚ်တုဲ ဆဵုညာတ်အာညးဒေသတံအကြာဂၠံၚ်မ္ဂး ရပ်စကာမံၚ်နကဵုဂဒံၚ်မၞိဟ်အိုတ်ရ။

ပရိုၚ် – သြၚ်လောန်တိုၚ်မ်

Photo – Social Media