တနၚ်သဳ၊ သိပ်တေမ်ပါ ၉
အပ္ဍဲကဵုရးတနၚ်သဳ ပွိုၚ်ဍုၚ်တနၚ်သဳ ကရပ်ကွာန်သိၚ်ခေါန်ဂှ် ဟိုတ်နူကွဳစက်ဖ္ဍိုက်မၞိဟ်ယဲ ဒးဒုၚ်ပန်တုဲ ကောန်ဂကောံရီုဗၚ်ဟံၚ်ပြာ်မွဲတၠ ချိုတ်အာလဝ်ရဂှ် ရိုဟ်ကၞက်ပရိုၚ်ဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
လောန်ကၠုၚ် ဂိတုသိပ်တေမ်ပါ ၇ အခိၚ်တ္ၚဲစေၚ် ၁ နာဍဳပြၚ်ၚ်ဂှ် နူဍုၚ်တနၚ်သဳ အာပလံၚ်မၞိဟ်ယဲ လပါ်ဍုၚ်မဝ်တံၚ်တုဲ အဟိန်ကလေၚ်စဴကၠုၚ်ဂှ် ကွဳစက်ဖ္ဍိုက်မၞိဟ်ယဲ ဂကောံသၚ်္ဂဟမိတ္တဍုၚ်မဝ်တံၚ်ဂှ် ဒးဒုၚ်ပန်လဝ်ရောၚ်။
ဟိုတ်နူ ဒးဒုၚ်ပန်ကဵုသေနာတ်တုဲ ကိုဇြဝ်မေန်ထောန် အာယုက် ၃၀ သၞာံ ကောန်ဂကောံရီုဗၚ်ပရေၚ်မှာဇန် သၚ်္ဂဟမိတ္တ ဍိုက်ပါကၠုၚ်လတူကွဳစက်ဂှ်တှ်ေ ဒးမကမ်ပ္ဍဲက္ဍိုပ်တုဲချိုတ်အာလဝ်ရောၚ်။
ပရေၚ်ပန်လဝ်ဏံဂှ် စဵုကဵုစိုပ် ဂိတုသိပ်တေမ်ပါ ၈ နူကဵုဂကောံသီုၜါလပါ်တံ ပရေၚ်လလောၚ်တြးပရိုၚ် မွဲမွဲသာ်လေဝ် ဟွံဂွံဆဵုဏီပုဟ်။
အတိုၚ်ညးဒေသတံ ဟီုလဴမ္ဂး အကြာသ္ကုတ်ဂၠံၚ် မဝ်တံၚ်-တနၚ်သဳဂှ်တှ်ေ ပါဲနူဒပ်ပၞာန်သီအဝဵုတုဲ ဂကောံဒပ်ပံၚ်တောဲ ဒပ်ပၞာန်ဗၠးၜးကောန်ဂကူကရေၚ် KNLA တံလေဝ် ချဳဒရာၚ်မံၚ်ပရေၚ်ပၞာန်တံ နွံရောၚ်။
အပ္ဍဲဂိတုသိပ်တေမ်ပါ ၅ လောန်ကၠုၚ်တေံလေဝ် ပ္ဍဲအကြာကွာန် ရာန်ဖိုအ်ကဵု ကွာန်ကာန်တို ပွိုၚ်ဍုၚ်တနၚ်သဳဂှ် ကွဳစက် ဂကောံစီရေၚ်အုပ်ဓုပ်ဘဲသဘာဝ ခရိုၚ်ဗိက် အာရီုဗၚ်ပရေၚ်ဘဲဍာ် တံဒးဒုၚ်ပန်တုဲ ရဲကောန်ဒပ်ဂကောံဇိုၚ်ခရက်မွဲတၠ ဒးလဝ်ဝပ်ကီုဂှ် ဂွံတီကေတ်ရ။
ပရိုၚ် – သြၚ်လောန်တိုၚ်မ်
Photo – CJ