သိုလ်- သိပ်တေမ်ပါ ၁၀
ညံၚ်ဟွံဂွံအာဖျေံဒပ်ပၞာန် အပ္ဍဲပ္ၚံက်ၜဳဟဝ်မုဇ် မဟာဗျူဟာဂှ် ကောန်ဍုၚ်ကိုဝ်ရဳယာသၠုၚ်ကျာဗွဲမဂၠိုၚ်တံ ပ္ဍဲသိပ်တေမ်ပါ ၂၉ ဂှ် ဗမံက်ပတိတ်ဆန္ဒတုဲ အာတ်မိက်ဏာ အလဵုအသဳရ။
အမေရိကာန်တံ ဗတိုက်မံၚ် အဳရာန်ဂှ် ဒှ်ပေါဲဗတိုက်လုပ်သၞောဝ်ဟွံသေၚ်တုဲ ရဲထ္ၜးဆန္ဒတံ ဟီုဂးပျုတ်ဗဒေက်လဝ်ရ။
သွက်ဂွံအာကဵုအရီုဗၚ်ဂၠံၚ်ဍာ် အခိၚ်က္ဍိုပ်သ္ကိုပ်တံ ဗ္စာရဏာမံၚ်ဂှ် ညးရပ်လဝ်တၞးလိက် ညံၚ်ဟွံဂွံပါလုပ်အာ အပ္ဍဲကဵုပေါဲပၞာန်ပရေၚ်ဂၠာဲသၞတံ ကောံမ္ၚးရုၚ်ကလုတ်အမေရိကာန် နွံမံၚ်ဍုၚ်သိုလ်တုဲ ထ္ၜးမံၚ်ဆန္ဒ မဒှ်ရ။
ပ္ဍဲကဵုပေါဲပၞာန် ဒေသဗမံက်လဒေါဝ် မဟာမိတ်ကိုဝ်ရဳယာသၠုၚ်ကျာ ညံၚ်ဂွံပါလုပ်ရီုဗၚ်အာ သမ္မတအမေရိကာန် ဒဝ်နာထရ ကဵုလဝ်ဇြဟတ်ဟရိုဟ်ရ။
ပ္ၚံက်ၜဳဟဝ်မုဇ်မ္ဂး သွက်ပရေၚ်အထံက်ပၚ် ကၠေၚ်စက်ဂၠးကဝ် ဒှ်ပရေၚ်ကိစ္စဇၞော်တုဲ ပြဟ်ဟ်ဏံ အဳရာန်ထိၚ်ချုက်လဝ်ဂှ် ၚုဟ်ကၠေၚ်စက်ဂၠးကဝ် တိုန်စိုပ်မံၚ်ကၟဳသၠုၚ်ရ။
သၟတ်ပိုဲတံဏံ အာပလံၚ်ဒၞာဲဗလးၜဳ ကတိုၚ်ချိုတ်တေံ ဟွံမာန်ပုဟ် ကညာၚ်ကရေဲတုဲ ထ္ၜးမံၚ်ဆန္ဒ ၜိုတ် ၆၀ နွံမံၚ် အစာပရိုၚ်တံ ဟီုရ။
ရဲထ္ၜးဆန္ဒတံ ကၠုၚ်စိုပ်ကောံလဝ် ဂတးမုက်သေၚ်တာ ယှဳဂျံၚ် ဍုၚ်သိုလ်ဂှ် အစာပရိုၚ်တံ သ္ဂးရ။
သွက်ဂွံအာလ္ၚတ် အကာဲအရာပရေၚ် ပ္ၚံက်ၜဳဟဝ်မုဇ်တေံ ဍာံဍာံမာန် ဗလးဏာဒပ်ပၞာန်ရောၚ် ညးတာလျိုၚ်ပရေၚ်စဵုဒၞာကိုဝ်ရဳယာတံဟီုတုဲ ခြာမွဲတ္ၚဲဂှ် ပေါဲထ္ၜးဆန္ဒ မံက်တိတ်ကၠုၚ် မဒှ်ရ။
အပ္ဍဲကဵုဂၠံၚ်ဍာန်ဍာ်ဏံ သွက်ဂွံဗလးဏာ ဒပ်ပၞာန် ဟွံဂွံဖျေံသ္ဂုတ်သွာတ်ဏီ ညးတာလျိုၚ်ပရေၚ်စဵုဒၞာ ကိုဝ်ရဳယာသၠုၚ်ကျာတံ ဟီုလဝ်ရ။
ပရေၚ်အမေရိကာန် အာဂစာန်ထိၚ်ချုက်မံၚ် ပ္ၚံက်ၜဳဏံဂှ် သွက်ဂွံကဵုအရီုဗၚ် ဒပ်ပၞာန်ကိုဝ်ရဳယာ ချပ်မံၚ်ရောၚ် အခိၚ်ပြဟ်ဟ်တေံ ဟီုလဝ်နွံရ။
ဟိုတ်နူ ဟွံလုပ်ကဵုလဝ်အရီုဗၚ် ပေါဲပၞာန်အဳရာန်တုဲ ထရ ယှအ်ဖျေံထောံ ပရေၚ်ခန်လ္ၚတ်ပံၚ်တောဲကဵု ကိုဝ်ရဳယာသၠုၚ်ကျာတံ တုဲယျ။
ကိုဝ်ရဳယာသၠုၚ်ကျာ အာဖျေံဒပ်ပၞာန်မ္ဂး ညးကဵုအရီုဗၚ်တိုက်ရိုက်ပရေၚ်ဂၠာဲသၞဏံ စၟတ်သမ္တီတုဲ ပရေၚ်ဇီုကပိုက်ဖဵုပရေအ်အ်တံ ဒးဒုၚ်ဘဲရောၚ် အဳရာန်ကဵုလဝ်သတိနွံရ။
အပ္ဍဲကဵုပေါဲဗတိုက်ဟွံလုပ်သၞောဝ်ဏံ ကိုဝ်ရဳယာသၠုၚ်ကျာ အာဖျေံစွံဒပ်ပၞာန်မ္ဂး ပါလုပ်မံၚ်တိုက်ရိုက်ဂှ် အဳရာန် ဟီုလဝ်ရ။
အပ္ဍဲပရေၚ် အမေရိကာန်တံ ဗတိုက်မံၚ်အဳရာန်မ္ဂး ဒှ်လဝ်ပရေၚ်ဖံက်ပကဝ် ဥပဒေဂၠးကဝ်တံ နွံဗွဲမဂၠိုၚ်ရောၚ် ညးတာလျိုၚ် အဳရာန်တံ ဟီုလဝ်ရ။
Ref:AFP