လံၚ်လုၚ်-သိပ်တေမ်ပါ ၁၁
အပ္ဍဲကဵုရးတနၚ်သဳ ပွိုၚ်ဍုၚ်လံၚ်လုၚ် ဒပ်ပၞာန်ဗမာလုပ်မွဲကွာန်တိတ်မွဲကွာန် ထပက်ကရောၚ်ပၞာန်တုဲ ရပ်ဂစိုတ်ထောံကောန်ကွာန် ၅ တၠဂှ် ဂွံတီလဝ် နူကဵုညးဒေသတံကဵု ဂကောံဒပ်ပၠန်ဂတးတံရ။
စနူသိပ်တေမ်ပါ ၈ တေံတုဲ ကရောၚ်ပၞာန်ဒပ်ပၞာန်ဗမာ ဇြဟတ် ၁၂၀ ပြၚ်ၚ်တံ နူကဵုဍုၚ်လံၚ်လုၚ်မွဲအဆံၚ် လုပ်အာပ္ဍဲကွာန် ဝေဒဳ၊ ကူဇြယျာတ်၊ မဂျဝ်မဝ် ကဵု ကွာန်တဗျာတံ လုပ်မွဲကွာန်တိတ်မွဲကွာန် ထပက်လဝ်ကရောၚ်ပၞာန်ရောၚ်။
ဂိတုသိပ်တေမ်ပါ ၁၀ ဂှ် ကရောၚ်ပၞာန်ဏံ အဟိန်ကလေၚ်ဆုတ် စဴကၠုၚ် နူကွာန်ဝေဒဳ ၜိုတ်ဆဵုညာတ်အာလ္တူဂၠံၚ် ညးဗျုဗျုအာယုက် ၉၀ မွဲတၠကဵု ကောန်ကွာန် ၄ တၠတံဂှ် ရပ်ဂစိုတ်ထောံလဝ် မဒှ်ရ။
မဒှ်ရဲကွာန်ဝေဒဳ၊ မဂျဝ်မဝ်၊ ကူဇြယျာတ်တံ အာယုက်အကြာ၂၀-၃၀ သၞာံ ညးဗြဴမွဲတၠကဵု ညးတြုံပိတၠ၊ ညးဗျုဗျုအာယုက် ၉၀ သၞာံ မွဲတၠ သီုဖအိုတ် ရပ်ဂစိုတ်ဏာ ၅ တၠရ။
အဟိန်ဒပ်ပၞာန်ဗမာစံၚ်မံၚ်သ္ၚိဂှ် အနော်ဗျု ဥူအေဖေ အာယုက် ၉၀ ရဲကွာန် ကူဇြယျာတ် အာဗဒေါအ်တုဲ ဒပ်ပၞာန်ပန်ဂစိုတ်လဝ်ကဵု သေနာတ်ဂှ် ညးဆဵုနမတ်တံဟီုရ။
အတိုၚ်ညးဒေသတံဟီုလဝ်မ္ဂး ပ္ဍဲသိပ်တေမ်ပါ ၉ ဂှ် ဟိုတ်နူဒပ်ပၠန်ဂတးတံကြတ်ပန်လဝ် ပ္ဍဲကွာန်ဝေဒဳ၊ ကရောၚ်ပၞာန်တဏံဒးလဝ်ဘဲဝပ်ဂိလောန်အာဂှ်ရ ပၞောတ်လဝ်စိုတ်ကဵုကောန်ကွာန်တံဂှ်တုဲ ပန်ဂစိုတ်လဝ်ဗီုဏံ သ္ဂးရ။
အပ္ဍဲကဵုပေါဲဗတိုက်ကွာန်ဝေဒဳဂှ် လပါ်ဒပ်ပၞာန်ချိုတ်အာ ဟွံအောန်နူကဵု ၄ နွံတုဲ ဇွကောန်ပၞာန်လ္ၚဵုတံဂှ် ကၠဟ်ထောံလဝ်အတိုၚ်ဏံရောၚ် ဂွံတီနူ ဂကောံဒပ်ပၠန်ဂတးတံရ။
အပ္ဍဲကဵုပွိုၚ်ဍုၚ်လံၚ်လုၚ် ဟိုတ်နူကဵုကရောၚ်ပၞာန် ဒပ်ဗမာတံထပက်မံၚ်ဂှ်တုဲ ညးဒေသ ၅၀၀၀ ပြၚ် ထောံသ္ၚိဌာန်ဒးဂြိပ်ပါဲမံၚ် ဒၞာဲဗၠးဘဲတံဂှ်ရ။
ဟိုတ်နူကရောၚ်ပၞာန်ဗမာတံ ဆက်နွံမံၚ်ပ္ဍဲကဵုကွာန်တဗျာ ပွိုၚ်ဍုၚ်လံၚ်လုၚ်ဏီတုဲ ညံၚ်ဟွံဂွံဆဵုဒးကဵု ကရောၚ်ပၞာန် ပါဲဓလေတ်အိုတ်ညိဂှ် ညးဒေသတံဖတိုက်ဖအောဝ် ဟီုဂးမံၚ်အိုတ်ရ။
ပရိုၚ်-သြၚ်လောန်တိုၚ်မ်
Photo – Social Media