မတ်မလီု၊ သိပ်တေမ်ပါ ၁၁
အပ္ဍဲကဵုတွဵုရးမန် ဟိုတ်နူဒပ်ပၞာန်ဗမာ ဗက်ရပ်မံၚ်ကပေါတ်သေံတံတုဲ အပ္ဍဲကဵုဗွဝ်ဖျာမ္ဂး ကပေါတ်သေံဗွဲမဂၠိုၚ် ပိုတ်အိုတ်မံၚ်ယျရောၚ်ဂှ် သၟာဗၞိက်တံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
အပ္ဍဲပၞော်လုပ်တိတ်ဍုၚ် ထ္ၜးဟိုတ်ကဵုပရေၚ်ဟွံလုပ်သၞောဝ်ဂးတုဲ ရဲသၟဝ်တဲအလဵုအသဳပၞာန်တံ ဗက်ရပ်သီကေတ်မံၚ် ကပေါတ်သေံတံကီု အပ္ဍဲဂၠံၚ်ဍာန်ဂှ်လေဝ်ဗက်ရပ်မံၚ်ကီုတုဲ ဒၞာဲဂိုဒံၚ်ဖျာတံဟွံသှ်ေ ဒၞာဲဟွံထေၚ်ခယျလဝ်တံဂှ် ဗက်ရပ်မံၚ်ရ။
ဟိုတ်နူကရေပ်ဓရတ် ရပ်မံၚ်ကပေါတ်သေံတံ ဗီုတဏံတုဲ အပ္ဍဲဂအာၚ်ဖျာ ကပေါတ်မၞိဟ်ဂမၠိုၚ်သုၚ်စောဲဂၠိုၚ်တံ ပိုတ်အာတုဲ ကပေါတ်သှ်ေမံၚ်တံပၠန်ဂှ်လေဝ် ၚုဟ်ဍၚ်တိုန်အာ အိုတ်အစောန်ရ။
ကပေါတ်သေံဟီုတှ်ေ စနူကဵုသတ်ဆုသတ်ဒုန် ခၞေဝ်ကေဝ်တံလေဝ် ဟွံသှ်ေ ဗက်ရပ်ကေတ်ထောံအိုတ်တုဲ ကပေါတ်သေံအိုတ်ဿီုတံ ပိုတ်အိုတ်မံၚ်ရောၚ် သၟာဗၞိက်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“ကပေါတ်ဒျူဒျာ ညံၚ်ကဵုသီုဖအိုတ် ပိုတ်မံၚ်ယျ၊ မုလေဝ်ဟွံလုပ်ကၠုၚ်ဏီပုဟ်။ စနူကဵုသတ်ဆုသတ်ဒုန်တံ ကပေါတ်မၞိဟ်တံသုၚ်စောဲ စနူကပေါတ်ပရေၚ်ကျိုၚ်ကျေဝ်နာနာသာ်တံ ဖအိုတ်ရ။ လုပ်လဝ်ကၠာတေံဂှ် သှ်ေဇးမံၚ်ညိညနွံကီု။ ပထမအလန် ဍာ်ဇၞော်တုဲ ကပေါတ်ကၠုၚ်ဟွံဂွံတုဲ ပိုတ်အာလဝ်မွဲဝါ။ လၟုဟ်ဗက်ရပ်သီကေတ်ကေတ်တှ်ေ အကြာဖျာလေဝ် ကပေါတ်တံဟွံမွဲရ” သာ်ဝွံ သ္ဂးရ။
တုဲပၠန် အကြာဗွဝ်ဖျာ ကပေါတ်သေံတံပိုတ်အာတုဲ ကပေါတ်ၜိုတ်သှ်ေဇးမံၚ်တံဂှ် တန်တဴကဵုဂကူကပေါတ်တုဲ ပတိုန်ၚုဟ်သွံမံၚ်လေဝ်နွံ၊ ရဲကပေါတ်ဟွံသှ်ေတံဂှ် ဒးကၟာတ်လဝ်ဆေၚ်ဖျာရဂှ် ညးဆက်ဟီုရ။
ဟိုတ်နူဗက်ရပ်မံၚ်ကပေါတ်သေံတုဲ ၚုတ်ကပေါတ်တံသၠုၚ်တိုန်အာဂှ်ရ ညးဍုၚ်ကွာန်တံဟေၚ် ဒးဂိမံၚ်ပၠန်ရဂှ် ညးဒေသမန်မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ဍေံတံ ကၠောန်ထောံဗီုဏံတှ်ေ အခိၚ်တေံ ကၠောန်မွဲဗူ ပိုဲဒးရာန် ၜိုတ် ၆၀၀၀ ဂှ် ဟိုတ်နူပရေၚ်ဗက်ရပ်မံၚ်နွံတုဲ တိုန်အာ ၁၀၀၀၀ ပြၚ်ယျ။ ညးဍုၚ်ကွာန်တံရ ဒးဂိပၠန်” သာ်ဝွံ သ္ဂးရ။
မွဲလပါ်ပၠန် ကပေါတ်ကၠုၚ်နူသေံမ္ဂး စနူကပေါတ်မၞိဟ်ရပ်စပ် သုၚ်စောဲ၊ ပရေၚ်ကျိုၚ်ကျေဝ်သၟးဟွံက သတ်ဆုသတ်ဒုန်တံလေဝ် ထ္ၜးဟိုတ်ကပေါတ်ဗၞိက်ဟွံလုပ်သၞောဝ်ဂးတုဲ ရဲသၟဝ်တဲအလဵုအသဳပၞာန်တံ ဆက်ဗက်ရပ်မံၚ်ဖိုဟ်ရ။
တုဲကၠုၚ်သိပ်တေမ်ပါ ၅ တေံလေဝ် ပ္ဍဲအကြာဂၠံၚ် ကျာ်မြဟ်-မတ်မလီု ကွဳစက်ဖဍိုက်နၚ်ကပေါတ်သေံ ၆၀ မ ဒးဒုၚ်သီဏာတုဲ ရပ်ထိၚ်လဝ် သီုကဵုသၟာဒဳကွဳစက်တံရ။
ဟိုတ်နူ ဂကောံသၟဝ်တဲအလဵုအသဳပၞာန်တံ ဗက်ဆက်ရပ်အာမံၚ်ကပေါတ်သေံဂှ်တုဲ သၟာဒဳကွဳစက်ဗွဲမဂၠိုၚ် ဟွံဂံၚ်ဖ္ဍိုက်ကေတ်နၚ် ကပေါတ်သေံတံဂှ် အပ္ဍဲကဵုဗွဝ်ဖျာမ္ဂး ကပေါတ်သေံပိုတ်မံၚ်ရောၚ်ဂှ် တီညာတ်ကၠးမံၚ် သောၚ်ၚ်ရ။
တွဵုရးမန်ဂှ် မပ္တံနူကဵု စၞစသုၚ်သဇိုၚ် ကပေါတ်မၞိဟ်သုၚ်စောဲ၊ ဂဥုဲဂဗ၊ ကပေါတ်ကျိုၚ်ကျေဝ်၊ ကပေါတ်ပရေၚ်သိုၚ်ခၞံတံသၟးဟွံက ကပေါတ်စကာပရေၚ်နာနာသာ်လေဝ် မဒှ်တွဵုရး ဒးပၠုပ်ကေတ်သုၚ်စောဲမံၚ် ကပေါတ်နူသေံတံ အဓိက မဒှ်ကီုရ။
ပရိုၚ်-သြၚ်လောန်တိုၚ်မ်
Photo – Social Media