မတ်မလီု ၊ သိပ်တေမ်ပါ ၁၅
ဟိုတ်နူကဵုပရေၚ်ပါ်ပါဲတံ သၠုၚ်ကၠုၚ်တုဲ ဂၠံၚ်ဍာန်ညးဂမၠိုၚ် အာကၠုၚ် သုၚ်စောဲမံၚ်ဂှ် နူကဵုအလဵုအသဳပၞာန် တွဵုရးမန် သ္ပပၞ ပလေဝ်ကဵုမံၚ် ရောၚ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
စိုပ်လက်ထက်အလဵုအသဳပၞာန် တွဵုရးမန်ဏံ ဂၠံၚ်ဍာန်ညးဂမၠိုၚ် အာကၠုၚ်သုၚ်စောဲမံၚ်တံဂှ် ပလေဝ်ကဵုလဝ်ဟွံမွဲတုဲ လီုလာ်ကၠုၚ်မံၚ်အိုတ်အစောန်ဂှ်ရ ပရေၚ်အာကၠုၚ် ဒးဆဵုဂဗမံၚ်ကဵု ဒဒိုက်နာနာသာ်ရ။
ဗွဲတၟေၚ် ဂၠံၚ်ဇၞော်ကၟိန်ဍုၚ်ကီု အဓိကဂၠံၚ်ဇၞော်လုပ်အပ္ဍဲဍုၚ်၊ ဂၠံၚ်ဒကဲဒကဲတံ စနူဂၠံၚ်ဇၞော် ပလေဝ်ကဵုလဝ်ဟွံမွဲတုဲ ဗြဲဂူတှ်ေ ခလံက်ဒနက်တံ မံက်တိုန်ကၠုၚ် ဟဂှ်ရ။
ဟိုတ်နူ ပရေၚ်ပါ်ပါဲနွံတိုန်ကၠုၚ်တုဲ နူကဵုအလဵုအသဳပၞာန် တွဵုရးမန် ဒၞာဲသ္ကုတ်ဂၠံၚ် မတ်မလီု-မုဟ်-ဇြပ်ဗု ဒၞာဲလ္ၚဵု ဒှ်မံၚ်ခလံက်ဟနက်တံမ္ဂး ဗက်ဍာပ်နာပ်တုဲ သ္ပပၞပလေဝ်ကဵု ကၠောန်ထ္ၜးကဵုမံၚ်ကီုရ။
ဆဂးဂှ် လပါ်ဂၠံၚ် မတ်မလီု-လ္ဂုၚ်ကီု ဂၠံၚ်အပ္ဍဲဍုၚ်တံကီုဂှ် နူကဵုအလဵုအသဳတွဵုရးမန် ဟွံဗက်ကၠောန်ကဵု ပရေၚ်ပလေဝ်ပလေတ် ဏီဂှ်ရ ကွဳစက်အာတရဴဗွဲမဂၠိၚ် သၠာထောၚ်အာကီု ပရေၚ်ကွဳစက် ဒှ်ဟိုတ်တံ သၠုၚ်တိုန်မံၚ်ရ။
နူကဵုအလဵုအသဳ တွဵုရးမန်တံ စၞးဒးဗက်ဍာပ်နာပ် ဗၠအ်ကေတ်ဂၠံၚ် တံဂှ်တှ်ေ သွက်ဂွံလးကဵုဂၠံၚ်ကတ္တရာနိုၚ်လောန်ဂှ် ပရေၚ်အာတ်မိက်တံ နွံမံၚ်ရ။
တုဲပၠန် သွက်ဂွံကလေၚ်ပလေဝ်ဂၠံၚ် ကာန်ပဏဳဂွံလဝ်အခေါၚ် သၞောတ် BOT ဂၠံၚ်ဇၞော်ညးဂမၠိုၚ်စကာမံၚ်တံဂှ် ဒးကဵုမံၚ်သတိ သွက်ဂွံကလေၚ်စၟဳစၟတ်ကဵု ပရေၚ်ကမၠောန်တံညိဂှ် ပရေၚ်ဗတိုက်ဖအောဝ် တံနွံမံၚ်ရ။
သွက်ပရေၚ်ဘဏ္ဍာသၞာံ ၂၀၂၆-၂၇ ဏံ ဂကောံအလဵုအသဳ တွဵုရးမန် ဂွံလဝ်အခေါင်စကာသုၚ်စောဲ သြန်ဗာတ်ဂျက် ၇၆၄၀၀ ပြကောတိကိုတ်ပြၚ်နွံတုဲ အပ္ဍဲဏံ သွက်ဗာတ်ဂျက်ပရေၚ်ဂၠံၚ်ဍာန် ဂကောံဗဂဵုလဟဵုတံ ဂွံအခေါင်စကာသြန် ၁၀၀၀၀ ပြကောတိကိုတ် ဂၠိုၚ်အိုတ်မဒှ်ရ။
ဆဂးဂှ် လက်ထက်အလဵုအသဳတွဵုရးမန်ဏံ ဒဵုကဵုအခိၚ်လၟုဟ် ပရေၚ်ပလေဝ်ပလေတ်ကဵုဂၠံၚ်ဍာန်တံဂှ် ကၠောန်ကဵုမံၚ် ချိုတ်တ်ပၠိုတ်တ် ဟွံမွဲဏီပုဟ်။
ပရိုၚ်-သြၚ်လောန်တိုၚ်မ်
Photo – MOI