ဖာပွန်၊ သိပ်တေမ်ပါ ၁၅
အပ္ဍဲတွဵုရးကရောၚ် ပွိုၚ်ဍုၚ်ဖာပန် ဟိုတ်နူ ဒပ်ပၞာန်ဗမာ ထပက်ကရောၚ်ပၞာန် ကၠောန်မံၚ် ပွပရေၚ်ပကီုပရာတ်တံဂှ်ရ။
ညးဍုၚ်ကွာန်တံ ပရေၚ်ဒးဝပ်၊ ချိုတ်တံဒှ်လဝ်တုဲ ညးဒေသနူကဵု ၜိုတ် ၃၀ ကွာန်တံ ဟွံဂံၚ်မံၚ်အပ္ဍဲကွာန်ရပုဟ်ဂှ် နူကဵုဗော်သွး ကောန်ဂကူကရေၚ် KNU ခရိုၚ်ဖာပန် မဟာဒပ် ၅ ပတိတ်လဝ် လိက်လလောၚ်တြးရ။
သၞာံ ၂၀၂၆ စနူကဵု ဂိတုမေ ပထမသတ္တဟ အကြာဂိတု သိပ်တေမ်ပါ ဒုတိယသတ္တဟဂှ် ကရောၚ်ပၞာန်ဗမာထပက်လုပ်ကၠုၚ် နူကမမံၚ် အာလပါ်ဖာပန်တုဲ အကြာကွာန်ဂှ်ပၠန် ဟိုတ်နူပၞာန်ကျာဗတိုက်ကီု နူကဵုထပက်ပၞာန်ဗလးတိတံဂှ်ရ ညးဒေသဒးဝပ် ၂၂ နွံတုဲ ချိုတ်အာ ပန်တၠ နွံမံၚ် ပ္ဍဲလိက်လလောၚ်တြးဂှ် ချူလဝ်ရ။
ဟိုတ် ပရေၚ်ပကီုပရာတ် ဒပ်ပၞာန်ဗမာဗတိုက်လဝ်ဂှ်ရ သ္ၚိဌာန်ညးဍုၚ်ကွာန် ၂၇၅ မကဵု စမြိုၚ်ဌာန်ဒတန် ပရေၚ်သာသနာ ဘာဗတောန်လိက်တံလီုလာ်အာတုဲ ပ္ဍဲဘာဗတောန်လိက် ၁၇ မ တံဂှ်လေဝ် ညးဍုၚ်ကွာန်တံ ဟွံဂံၚ်အာတိုန်ဘာအိုတ်ရပုဟ်ဂှ် ပ္ဍဲလိက်လလောၚ်တြး ချုထမံက်လဝ်ရ။
တုဲပၠန် ညးဍုၚ်ကွာန် ၃၅၀၀၀ တံ ဒးထပ်ဂြိပ်ပါဲပၞာန်ပၠန်တုဲ တိရိစ္ဆာန် ဝဳလဝ်ပ္ဍဲသ္ၚိတံကီု ကၠအ်တဵုလဝ်ခၞေဝ်ကေဝ်၊ ကပေါတ်စက်ယာန် တံလေဝ် လီုလာ်အာလဝ်နွံရောၚ်ဂှ် နူကဵုမဟာဒပ် ၅ ခရိုၚ်ဖာပန် ပတိတ်လဝ် လိက်လလောၚ်တြးရ။
ဒပ်ပၞာန်ဗမာတံ ညံၚ်ဂွံ အာကဵုပရေၚ်အရီုဗၚ် ရုၚ်ဗျူဟာဗဒိုပ်ပၞာန် နွံမံၚ်ဍုၚ်ဖာပန် ဒၞာဲဗဒိုပ် KNU တံ သီကေတ်လဝ် အလုံမွဲဒမြိပ်ပယျဵု တံဏံ ညံၚ်ကလေၚ်ဂွံသီကေတ်ဖအိုတ်တုဲ စနူဂိတုမေဂှ် ကရောၚ်ပၞာန်ဗမာတံ ထပက်ကၠုၚ်ပၞာန် ပ္ဍဲကဵုဂၠံၚ် ကမမံၚ်- ဖာပန် ဂှ်ရောၚ်။
အပ္ဍဲကဵုဂိတုသိပ်တေမ်ပါ ၅ ကဵု အကြာဂိတု သိပ်တေမ်ပါ ဒုတိယသတ္တဟ ဏံဂှ် ကရောၚ်ပၞာန်ဗမာထပက်လုပ်ကၠုၚ် နူကမမံၚ် အာလပါ်ဖာပန်ဂှ် ဒှ်လဝ်ပေါဲဗတိုက် အကြာဒပ်ပၞာန်ဗၠးၜး ကောန်ဂကူကရေၚ် KNLA မဟာဒပ် ၅ တံဇၞော်ကဵုဇြဟတ်ရ။
အကြာ နူကမမံၚ် အာလပါ်ဖာပန်ဂှ် ဟိုတ်နူဒပ် KNLA မဟာဒပ် ၅ ဗတိုက်တုဲ ဒပ်ပၞာန်ဗမာဒးဘဲဝပ်ဂိ ပရေၚ်ထပက်ပၞာန် လံအာ ပွိုၚ် ၄ ဂိတုကီုလေဝ် ဒဵုကဵုအခိၚ်လၟုဟ် အာစိုပ်ဖာပန်ဟွံမာန်တုဲ ခက်မံၚ် ပ္ဍဲကဵုကွာန် ဖာလုၚ် ဖိုဟ်ရောၚ်။
အပ္ဍဲဂိတုသိပ်တေမ်ပါ ၈ ဒၞာဲပရေၚ်ထိၚ်ချုက် KNU ခရိုၚ်ဖာပန်ဂှ် နူကဵုမဟာဒပ် ၅ သီဂွံဗဒိုပ်ပၞာန်ဗမာ ထဝ်မူပလေဝ်မေဝ်တုဲ လပါ်ရုၚ်ဗျူဟာ ဖာပန်တေံလေဝ် ဒှ်မံၚ်ပေါဲဗတိုက်ဆက်က် ဟွံပိုတ်ရဂှ် ဂွံတီကေတ်ရ။
ပရိုၚ်-သြၚ်လောန်တိုၚ်မ်
Photo – CJ