နေပျဳဒဝ် ၊ သိပ်တေမ်ပါ ၁၅
သွက်အရာညးသ္ပစၞး ကုရမျှာၚ်ညးဍုၚ်ကွာန် ဆေၚ်စပ်ကဵု ကုလသမဂ္ဂ ရးနိဂီုဍုၚ်ဗမာ ညးစၞးလၟိုန် ဥူကျဝ်မိုဝ်ထောန် ညံၚ်သ္ဂောံဂွံ ဆက်ဂွံအာဒၞာဲ လ္တူစၚ်သၠုၚ်ကုလသမဂ္ဂတေံမာန်ဂှ် ဗိုၚ်ထံက်ကဵုဂလာန်ညိ နူကဵုအလဵုအသဳညဳသၟဟ်ကောန်ဂကူ NUG ဗတိုက်ဖအောဝ်ရ။
စပ်ကဵုပရေၚ် ဆေၚ်ကဵုကုလသမဂ္ဂ ရးနိဂီုဍုၚ်ဗမာညးစၞးလၟိုန် ပ္ဍဲသိပ်တေမ်ပါ ၁၃ ဂှ် နူကဵုဌာန်ဝန်ဇၞော် ပရေၚ်ဍုၚ်သအာၚ် အလဵုအသဳပၞာန် လလောၚ်ပတိတ်လဝ်ပရိုၚ်တုဲ နူကဵုဌာန်ပရိုၚ် သြၚ်လောန်တိုၚ်မ် သၟာန်ဏာသဘဴလစွံစိုတ် NUG ကုညးနွံအခေါၚ် ဟီုဂး ရုၚ်သ္ကိုပ်ဝန်ဇၞော် ဥူနေဖုၚ်လာတ်ဂှ်တှ်ေ ကဵုဏာသွဟ် အတိုၚ်ဗွဲသၟဝ်ဏံရ။
အပ္ဍဲကုလသမဂ္ဂ ဟိုတ်နူဥူကျဝ်မိုဝ်ထောန် သ္ပစၞးသွက် NUG ကဵု CRPH တုဲ ချဳဒရာၚ်မံၚ်ဂှ် နူကဵုအလဵုအသဳပၞာန် စောဲစပ်တင်ဒုဟ် ညးတဝ်စၞေဟ်ပုန်ကဵု ရးနိဂီုဍုၚ်ဂးတုဲ ပတိတ်လိက်အမိၚ်ရပ်ကၠေၚ် (ဝရာန်) မဒှ်ရ။
တုဲပၠန် ဥူကျဝ်မိုဝ်ထောန် ဆက်သ္ပမံၚ်ညးစၞးကုလသမဂ္ဂ သွက်ဍုၚ်ဗမာဂှ် ပရေၚ်သ္ပစၟတ်သမ္တီ လုပ်သၞောဝ်ဟွံသေၚ်တုဲ ဒုၚ်လဝ်သ္ဇိုၚ်ကဵု တၚ်သ္ဂုတ်သွာတ် Credentials Committee အတိုၚ်ဗဒေါအ်စွံလဝ် လၟေၚ်ၚ်သၞာံတံဂှ်ရောၚ် အလဵုအသဳပၞာန် သ္ဂးရ။
တုဲကၠုၚ် ဂိတုသိပ်တေမ်ပါ ၈ ဂှ် စကၠောန်ဗဒှ် သဘၚ်သဳကၠဳ ကုလသမဂ္ဂ ပရေၚ်ကာနာနာ မရနုက်ကဵု ၈၁ ဝါဂှ် သွက်ဂွံကလေၚ်စၟဳစၟတ် ပရေၚ်ညးစၞး အမာတ်ကလုတ်ကုလသမဂ္ဂ စပ်ကဵုဍုၚ်ဆေၚ်စပ်တံတုဲ ဒက်ပတန်လဝ် Credentials Committee ဂှ်ရောၚ်။
အပ္ဍဲကမ္မတဳဏံ ဍုၚ်ဇြဟတ်ဇၞော်ဇၞော် အမေရိကာန်၊ ရတ်ယှာ၊ ကြုက်၊ ဗာဂျဳယာန်၊ ဂျမေကာ၊ စနူ ဍုၚ်ယူဂါန်ဒါ ၉ ဍုၚ်တံပါလုပ်တုဲ သွက်ဥူကျဝ်မိုဝ်ထောန် ညံၚ်ဂွံဆက်ပါအာ ပ္ဍဲကုလသမဂ္ဂပၠန် ကောန်ဍုၚ်ဗမာ ချဳဒရာၚ် ပရေၚ်ဒဳမဝ်ကရေသဳတံလေဝ် ဆက်ကၠောန်မံၚ် ကာန်ပုၚ်နာနာတံ နွံကီုရ။
နကဵုညးစၞးကုလသမဂ္ဂ သွက်ဍုၚ်ဗမာ ဥူကျဝ်မိုဝ်ထောန် ညံၚ်ဟွံဂွံတန်တဴ ဆက်သ္ပအာစၞးဂှ် ပကိတ်လဝ်ကဵု ပ္ဍဲအကာဲအရာ ဏံတုဲ အလဵုအသဳပၞာန် လလောၚ်တြးဏာ ညးဂြိပ်ပါဲဒုဟ် စောဲစပ် တၚ်စုတ်ဒုဟ် နကဵုၝောံပိုဒ် ၅ ဂကူရ။
သွက်ဂွံဆက်မိၚ်အာ ရမျှာၚ်ညးဍုၚ်ကွာန် ရးနိဂီုဍုၚ်ဗမာမ္ဂး နူကဵု ဍုၚ်ပါမံၚ် Credentials Committee တံ ညံၚ်ဟွံဂွံဆက်ကဵုဒးအာ သွက်ပရေၚ်လီဠာန် ဂကောံပၞာန်တံရောၚ် ဥူနေဖုၚ်လာတ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“အမာတ်ကလုတ်ဇၞော်ပိုဲတံ ဆက်နွံတန်တဴမာန်မ္ဂး ညးတံဂွံဆက်မိၚ်အာ ရမျှာၚ်ညးဍုၚ်ကွာန်တံဏောၚ်။ သၠးစွံလဝ် ဒၞာဲအမာတ်ကလုတ်ဇၞော်မ္ဂး ညံၚ်ကဵုကၟာတ်ထောံ ရမျှာၚ်ညးဍုၚ်ကွာန် ကောန်ဍုၚ်ဗမာတံရ။ ပဵုတုဲသွက်ဂွံပရေံအာမွဲ ဒှ်ကၠုၚ်မာန်ဂှ် ဒၞာဲအမာတ်ဇၞော်ဏံ ယဝ်ရကဵုထောံဒၞာဲ ညးစၞးဂကောံပၞာန်ပကီုပရာတ်တံမ္ဂး ဒှ်အာညံၚ်ရဴ ကၟာတ်ထောံ Shut down တုဲ ကဵုထောံဒၞာဲ သွက်ပရေၚ်လီဠာန် အရၚ်ဂကောံပၞာန်ပကီုပရာတ်တံရောၚ် မိက်ဂွံစွံပရေၚ်ဇြိုဟ်နက်တုဲ ဟီုဏာရ” သာ်ဝွံ သ္ဂးရ။
နူကဵုသၞာံ ၂၀၂၁ ဂိတုဖေဖဝ်ဝါရဳ ၂၇ တေံ အလဵုအသဳပၞာန် ပတိတ်ထောံ ဥူကျဝ်မိုဝ်ထောန် နူကဵုသၞာဲဒါ ယိုက်ဝန်ပရေၚ်ဍုၚ်တုဲ ညးဆက်ကေတ်စကာသုၚ်စောဲလဝ် ဒၞာဲရုၚ်ဂကောံ၊ သ္ၚိဌာန် အမာတ်ကလုတ် ဇၞော်ကဵု ကပေါတ်ဍုၚ်နိဂီု ပိုၚ်ပြဳလဝ်တံရောၚ် စောဲစပ်လဝ်ရ။
တုဲပၠန် နူကဵုသြန်စရၚ်ဗာန် ဂကောံညးစၞးဍုၚ်ဗမာလၟိုန်ဂှ် အခေါၚ်ဟွံမွဲမွဲသာ် ပတိတ်ကေတ်လဝ် သြန်သှ်ေမံၚ် ဒဝ်လာအမေရိကာန် ၂ ဒဿမ ၇၆ ပြကောတိကိုတ် ကေုာံ သြန်ယူရို ၃၈၂၃၃ ဒသမ ၆၂ စကာလဝ် သွက်ပရေၚ်ပူဂဵုညး ဒၞာဲဗၠေတ်တ်ရောၚ် စောဲစပ်လဝ်ကီုရ။
မွဲလပါ်ပၠန် ဥူကျဝ်မိုဝ်ထောန် ဆက်စၠောံကဵု NUG၊ CRPH တုဲ နကဵုညးစၞး ချဳဒရာၚ်ကဵုမံၚ်တံဂှ် အလဵုအသဳပၞာန် ပံက်လဝ်အမှု နကဵုရာဇာသာဒ်ဇၞော် ၝောံပိုဒ် ၁၂၂(၂) ပ္ဍဲကဵုရုၚ်သၞောဝ်ဓဝ် ခရိုၚ်ဒက္ခိဏတုဲ ပတိတ်လဝ်ဝရာန် လိက်အမိၚ်ရပ် မဒှ်ရ။
တုဲပၠန် စောဲစပ်ပရေၚ်ကေတ်အရေဝ် နကဵုအမှု ဆက်စၠောံ ဂကောံဟွံဗွဲဓဝ် နကဵုၝောံပိုဒ် ၁၇(၁) ကီု၊ ဥပဒေ ပရေၚ်စဵုဒၞာ ပွမပိုၚ်ပြဳ ကပေါတ်ညးဍုၚ်ကွာန် ၝောံပိုဒ် ၆ (၁) ကေုာံ ၝောံပိုဒ်ရာဇာသာဒ်ဇၞော် ၆၆(ဃ) တံတုဲ အလဵုအသဳပၞာန် ထပ်စောဲလဝ် အမှု မဒှ်ရ။
ပြဟ်ဟ်ဏံ လ္တူဥူကျဝ်မိုဝ်ထောန် နကဵု ၝောံပိုဒ်ဥပဒေရာဇဝတ် ၈၇/၈၈ အလဵုအသဳပၞာန်လလောၚ်တြးဏာ ကောန်ဒုဟ် ဂြိပ်ပါဲအာမွဲတုဲ နူကဵုရုၚ်သၞောဝ်ဓဝ် ထပ်ပတိတ်လဝ်အမိၚ်အဆံၚ်ၚ် မဒှ်ရ။
နူကဵု ဒပ်ဗၠာဲသၟိၚ်ဂၠးကဝ် INTERPOL ကေုာံ United States National Central Bureau (USNCB) တံ မွဲအဆံၚ် ပံၚ်တောဲအာကဵု ရုၚ်ကလုတ်ဗမာ ဍုၚ်ဝါယှေန်တာန်တုဲ သွက်ဂွံချိက်ဆက်စၠောံအာကဵု ဒပ်ဗၠာဲသၟိၚ်အမေရိကာန်တံဂှ် ဆက်ကၠောန်အာ နူကဵုဂၠံၚ် ပရေၚ်ကလုတ်တမာန်တံရောၚ် အလဵုအသဳပၞာန် သ္ဂးရ။
ဟိုတ်ဂှ်တုဲ ပရေၚ်ဥူကျဝ်မိုဝ်ထောန် ချဳဒရာၚ်ဟီုဂးမံၚ်တံဂှ် သဘဴလစွံစိုတ် အလဵုအသဳပၞာန်ဟွံသေၚ်ရောၚ် နူကဵုဌာန ပရေၚ်ဍုၚ်သအာၚ် ကဵုဏာသမ္တီကု အလုံပွဳဗွိုၚ်ဂၠးကဝ်တံကဵု အလဵုအသဳနွံမံၚ်ပရေၚ်ဆက်ဆောံ အမာတ်ကလုတ်တံ သီုဖအိုတ် မဒှ်ရ။
ပရေၚ်ကၠောန်မံၚ်ဗီုတံဏံဂှ် ပ္ဍဲကဵုကုလသမဂ္ဂ ညံၚ်ဂွံလုပ်ဗဗွဲသၞောဝ် နူကဵုအလဵုအသဳပၞာန် ဂစာန်ကၠောန်ဏာ ပရေၚ်ထပက်ပြယာဲ အမာတ်ကလုတ်မွဲ ဇၞော်ကဵုဇြဟတ်ရောၚ် က္ဍိုပ်သ္ကိုပ်ကွးဘာတြေံ ကိုမေန်တိုဲတေတ် ဟီုကဵုဌာန်ပရိုၚ်သြၚ်လောန်တိုၚ်မ်ရ။
“လ္တူအမာတ်ကလုတ်ဇၞော် ဥူကျဝ်မိုဝ်ထောန် ကောန်ဍုၚ်ဗမာပိုဲ ဗိုၚ်ထံက်မံၚ်ဂလာန်တံဂှ် ဍေံတံညာတ်မံၚ် ညံၚ်ရဴမၞိဟ်သၞဇၞော်ဇၞော်မွဲတုဲ ဗဂပ်စုတ်လဝ် နကဵုၝောံပိုဒ်နာနာသာ်တုဲ ဍေံတံကၠောန်မံၚ် မွဲလပါ်သက်က်ရ။ ကွေံကွေံဂှ် ပရေၚ်တံဏံ မုလေဝ်စိုပ်တရဴမာန်ဟွံသေၚ်ပုဟ် စပ်ကဵုပရူပရာကိစ္စ ပရေၚ်ဍုၚ်ဗမာတုဲ ၚုဟ်မးဟွံမွဲပုဟ် ဗီုလဵုလေဝ် ရဲလပါ်အလဵုအသဳပၞာန်တံ တြးမံၚ်ပရိုၚ်ကီုလေဝ် ဍေံတံမိက်ဂွံဂွံဒၞာဲဏံတုဲ ဂစာန်ကၠောန်မံၚ် နဲကဲစုၚ်ၚ်တံဏောၚ်။ ပရေၚ်ဏံဂှ် အပ္ဍဲကဵုဗလးမုက်ကလုတ်တံ ညံၚ်ဍေံတံ ဂွံလုပ်ဗဗွဲသၞောဝ် ဂစာန်ကၠောန်မံၚ် မဒှ်ရ” သာ်ဝွံ သ္ဂးရ။
ဟိုတ်ဂှ်ရ နူကဵုဂကောံဇြဟတ်ပၠန်ဂတးတံ သွက်ဂွံကဵုအာဇြဟတ် ဟရိုဟ် ပ္ဍဲကဵုပရေၚ်ကလုတ်တမာန်၊ ပရေၚ်ဍုၚ်ကွာန်၊ ပရေၚ်ပၞာန်တံတုဲ ညံၚ်တိဍာ် အလဵုအသဳပၞာန်ပကၚ်ရၚ်လဝ် ပရေၚ်အုပ်ဓုပ်၊ ပရေၚ်ဍုၚ်ကွာန်၊ ပရေၚ်ပၞာန်၊ ပရေၚ်ပိုန်ဒြပ်တံ ညံၚ်ဂွံအောန်စှ်ေအာရောၚ် ညးဆက်ဟီုရ။
စနူအခိၚ်သီအဝဵု ဒဵုကဵုအခိၚ်လၟုဟ် ပရေၚ်ဖံက်ပကဝ်အခေါၚ်မၞိဟ် ကေုာံ အမှုရာဇဝတ်ပၞာန် က္တဵုဒှ်လဝ် ပ္ဍဲကဵုဍုၚ်ဗမာတံဂှ် သွက်ဂၠးကဝ်ဂွံတီ သ္ပစၞးကဵုကောန်ဍုၚ်ဗမာတံတုဲ ဥူကျဝ်မိုဝ်ထောန် ပတိုန်ထ္ၜးကဵုမံၚ်ရောၚ် ညးလ္ရတ်တံ ထံက်ထ္ၜးရ။
နူကၠာဒပ်ပၞာန် ဟွံသီအဝဵုတေံဂှ် ပ္ဍဲကဵုကုလသမဂ္ဂ နကဵုညးစၞးဍုၚ်ဗမာ လၟိုန်ဂှ် ခါန်ကၞက်စွံလဝ် ဥူကျဝ်မိုဝ်ထောန်ရောၚ်။ ဆဂး ပ္ဍဲသၞာံ ၂၀၂၁ ပရေၚ်သီအဝဵုဒှ်တုဲဗွဲကြဴ ညးလဵုတံ သ္ပအာညးစၞးဍုၚ်ဗမာရော နူကဵု Credentials Committee ဖျေံတၚ်သ္ဂုတ်သွာတ် ဒေါအ်လဝ်ကၠာတုဲ ဥူကျဝ်မိုဝ်ထောန်ဂှ်ဟေၚ် ဆက်ဂွံအာအခေါၚ် ပရေၚ်ညးသ္ပစၞး မဒှ်ရ။
ပရိုၚ်-သြၚ်လောန်တိုၚ်မ်
Photo – NUG