ဘာအၚ်၊ သိပ်တေမ်ပါ ၁၆
သ္ကိုပ်ဝန်ဇၞော် တွဵုရးကရေၚ် ဥူသဝ်မျေအ်ဥူဂှ် သ္ကိုပ်ပၞာန်မွဲတၠလေဝ် ညးကေၚ်ဒှ်လဝ်တုဲ လၟုဟ်နဒဒှ် သီုကဵုဥက္ကဌဗော်ဗျဳခိုၚ်ဖျိုဝ် တွဵုရးကရေၚ် ထပ်ဂွံဒုၚ်ရုဲစှ်လဝ်ရောၚ်ဂှ် နူကဵုလပါ်ဗော်ညးတံ လလောၚ်တြးလဝ်ရ။
လောန်ကၠုၚ်ဂိတုသိပ်တေမ်ပါ ၁၃ ပ္ဍဲကဵုဒၞာဲရုၚ် ဗော်ဗျဳခိုၚ်ဖျိုဝ် တွဵုရးကရေၚ် ကၠောန်ဗဒှ်ကောံဓရီု ပရေၚ်ရုဲစှ် ကမ္မတဳဗော် တွဵုရးကရေၚ်တုဲ ဂွံဒုၚ်ရုဲစှ်ဏာရောၚ်။
ပ္ဍဲကောံဓရီု ပရေၚ်ရုဲစှ် ဗော်ဗျဳခိုၚ်ဖျိုဝ် တွဵုရးကရေၚ်ဂှ် နူကဵုညးအုပ်ကာဗဟဵု ဥူသူရိန်ဇြဝ်၊ ဂကောံကဵုကသပ်ဗဟဵု ဥူသဝ်မျေအ်ဥူတံ နဒဒှ်သဘာပတိ ပရေၚ်ရုဲစှ်တွဵုရးဂှ် ပါလုပ်ရေၚ်တၠုၚ်လဝ်ရ။
အပ္ဍဲကဵုပေါဲရုဲစှ်ဏံမ္ဂး နဒဒှ်ဥက္ကဌ ဗော်ဗျဳခိုၚ်ဖျိုဝ် တွဵုရးကရေၚ်ဂှ် ဥူသဝ်မျေအ်ဥူ၊ ဒုဥက္ကဌ ဥူသာန်ကို၊ ညးအုပ်ကာ ဥူသဝ်ဝေန်ထိၚ်၊ သ္ကိုပ်ပရေၚ်ဘဏ္ဍာ ဒဝ်သာန္ဒာဥူတံ ဂွံဒုၚ်ရုဲစှ်ရ။
ဥက္ကဌဗော် ဥူသဝ်မျေအ်ဥူဝွံ ဂကောံကဵုကသပ်ဗဟဵု မွဲတၠလေဝ်ဒှ်တုဲ ပြဟ်ဟ်ဏံ ကေတ်လဝ်တာလျိုၚ် သ္ကိုပ်ဝန်ဇၞော် တွဵုရးကရေၚ်တုဲ ဥူသာန်ကိုဂှ် ပြဟ်ဟ်ဏံ ကေတ်လဝ်တာလျိုၚ် ဥက္ကဌ စၠတ်ထဝ် တွဵုရးကရေၚ် မဒှ်ရ။
အခိၚ်ကၠာတေံ ဥက္ကဌ ဗော်ဗျဳခိုၚ်ဖျိုဝ်တွဵုရးကရေၚ် ဒဝ်နာန်နဳနဳအေ ဒှ်လဝ်တုဲ ပြဟ်ဟ်ဏံ ပ္ဍဲကဵုဂကောံအလဵုအသဳ ဥူမေန်အံၚ်လှိုၚ် ပၠတရဴဂှ် ညးဒှ်မံၚ်ဒုသမ္မတ (၂) မဒှ်ရ။
သ္ကိုပ်ဝန်ဇၞော် တွဵုရးကရေၚ် ဥူသဝ်မျေအ်ဥူဂှ် ဒှ်ညးပတေဟ် ဥူမေန်အံၚ်လှိုၚ်မွဲတုဲ သီုကဵုဒၞာဲ ဥက္ကဌဗော် ဗျဳခိုၚ်ဖျိုဝ်တွဵုရးကရေၚ်ဂှ် ဂွံထပ်ဒုၚ်ရုဲစှ်လဝ် အလန်ဒုတိယပၠန်ရ။
ညးသြဇာနွံ လ္တူဌာန်ဂအုပ်ပၞာန်ရးအဂၞဲ သ္ကိုပ်ဝန်ဇၞော် ဥူသဝ်မျေအ်ဥူ ဝွံ လၟုဟ်ထိၚ်ဂွံလဝ် ဂကောံအလဵုအသဳ တွဵုရးကရေၚ်ကီု သီုကဵုသွာၚ်ပရေၚ်ဗော်ကီု ဒှ်အာယျဂှ် နူကဵုဂကောံပရေၚ်ဍုၚ်ကွာန်တံ ထံက်ထ္ၜးကဵုလဝ်ရ။
ပရိုၚ်-သြၚ်လောန်တိုၚ်မ်
Photo – USDP