မတ်မလီု၊ သိပ်တေမ်ပါ ၁၆
ဥက္ကဌစၠတ်ထဝ် တွဵုရးမန် ဥူတိတ်ထိုဲဝွံ ဂွံဒုၚ်ရုဲစှ်ဏာ နဒဒှ် ဥက္ကဌ ဗော်ဗျဳခိုၚ်ဖျိုဝ်တွဵုရးမန်ရောၚ် ညးကြပ်ကဵုဗော်တံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
ဥက္ကဌ ဗော်ဗျဳခိုၚ်ဖျိုဝ် တွဵုရးမန် ယာယဳ ဥူတိတ်ထိုဲဝွံ ပ္ဍဲကဵုသိပ်တေမ်ပါ ၁၄ ကၠောန်လဝ်ပရေၚ်ရုဲစှ် ကမ္မတဳဗဟဵု ကဆံၚ်တွဵုရးဂှ် ဂွံဒုၚ်ရုဲစှ်ဏာ နဒဒှ်ဥက္ကဌ ဗော်ဗျဳခိုၚ်ဖျိုဝ်တွဵုရးမန် မဒှ်ရ။
နူကဵုပေါဲရုဲမာဲ ဒပ်ပၞာန်ဗမာကၠောန်လဝ်ဂှ် သၟာပရေၚ်ဍုၚ်ကွာန်ဝှ်ကြံၚ် ဗော်ဗျဳခိုၚ်ဖျိုဝ် ဥူတိတ်ထိုဲ ဂွံဒုၚ်ရုဲစှ်ဏာ နကဵုညးစၞးပွိုၚ်ဍုၚ်မတ်မလီု (၂) တုဲ ဒှ်ကၠုၚ် ဥက္ကဌစၠတ်ထဝ် တွဵုရးမန်ရောၚ်။
အကြာစၠတ်ထဝ်မ္ဂး ညးစၞးအမာတ်တံကဵု ဂကောံအလဵုအသဳပၞာန် ပြံၚ်လဝ်ဗီုပြၚ်တံ ညံၚ်ဂွံဒှ် ပရေၚ်ဇီုဟဗောတ်ညးသ္ကံဂှ် လ္ပကၠောန်အိုတ်ညိ၊ ဂလာန်အလဵုအသဳ ကၠောန်ကဵုမာန်တံဂှ်ဟေၚ် သၟာန်အိုတ်ညိ ဥူတိတ်ထိုဲ ဖတိုက်ဖအောဝ်ကဵုမံၚ် မွဲဏှမွဲဏှ မဒှ်ရ။
တုဲပၠန် ခရိုနဳမတ်မလီု ဥူမိုဝ်ကျဝ်ဂှ်လေဝ် ဟိုတ်နူ ဥူတိတ်ထိုဲ ခါန်ကၞက်စုတ်ကဵုလဝ် ဂကောံကမ္မတဳကဵုကသပ် ပရေၚ်ကေၚ်ကာစၠတ်ထဝ် တွဵုရးမန်ကီုတုဲ ပရေၚ်ပါ်ပါဲတံ နွံကၠုၚ်ရ။ ဝန်ဇၞော်ကောန်ဍုၚ်အရၚ်ဂကူဗမာ ဥူမျိုဝ်မေန်လှိုၚ်ဂှ် ဂွံဒုၚ်ရုဲစှ်ဏာ နဒဒှ်ညးအုပ်ကာ ဗော်ဗျဳခိုၚ်ဖျိုဝ် တွဵုရးမန်တုဲ ဂကောံကမ္မတဳ ပရေၚ်ကေၚ်ကာဗဟဵု ဗော်ဗျဳခိုၚ်ဖျိုဝ် တွဵုရးမန်ဂှ် ဒက်ပတန်ရုဲစှ်လဝ် နကဵု ကောန်ဂကောံ ၁၅တၠ တံ မဒှ်ရ။
ဥက္ကဌ ဗော်ဗျဳခိုၚ်ဖျိုဝ် တွဵုရးမန် ဥူအံၚ်ကျဳတိၚ်ဝွံ ပ္ဍဲကဵုပေါဲရုဲစှ် ဂကောံကမ္မတဳပရေၚ်ကေၚ်ကာဗဟဵုဂှ် နဒဒှ်သဘာပတိရေၚ်တၠုၚ်တုဲ ဆက်မံၚ်အာ ဆၜိုတ်ကောန်ဗော်မွဲတၠ ဓမ္မတာဟေၚ်ရဂှ် ဂွံတီရ။
ဗော်ဗျဳခိုၚ်ဖျိုဝ် ဒးဒုၚ်သီအဝဵုကဵုဒပ်ပၞာန်တုဲ စနူကဵုအကြာမွဲၜါတ္ၚဲဏံဂှ် ကလေၚ်ကၠောန်လဝ်ပရေၚ်ပေါဲရုဲစှ် ဂကောံကေၚ်ကာဗဟဵု အဆံၚ်ရးဒေသကဵုတွဵုရးတံဂှ် ကၠောန်အာမံၚ်ရောၚ်။
ပရိုၚ်-သြၚ်လောန်တိုၚ်မ်
Photo – Social Media