မတ်မလီု ၊ သိပ်တေမ်ပါ ၁၆
အပ္ဍဲကဵုတွဵုရးမန် သွက်ဂၠုၚ်ရပ်က တိတ်ၜဳဇၞော်တံကီု ဂၠုၚ်က အကြာသြၚ်ၜဳကြပ်ပ်တံကီု နူကဵုအလဵုအသဳပၞာန် ဟွံသွံကဵုကၠေၚ်စက်တံတုဲ ၚုဟ်ကတံထပက်တိုန်ကၠုၚ်မံၚ်ရဂှ် ညးဗြဴပါၚ်ဖဴတံကဵုတၠကမၠောန်ကတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
ဟိုတ်နူဟွံသွံကဵုကၠေၚ်စက်တံကီု ဒးရာန်သုၚ်စောဲအာမံၚ်ကၠေၚ်စက် နူဖျာဒမၠုတံ ၚုဟ်ဟွံတန်ကဵုဆကီု သယံဇာတကတံ ဆောံလေၚ်အာတုဲ ရပ်ကဂွံအောန်ကၠုၚ်ကီုတုဲ ပရေၚ်ၚုဟ်ကတံ သၠုၚ်တိုန်အာ မဒှ်ရ။
အပ္ဍဲဗွဝ်ဖျာမ္ဂး ကကြၚ်မွဲပဿာ ကြပ် ၄၀,၀၀၀ ဒကေဝ်၊ ကချဳလံက် မွဲပဿာ ၅၀,၀၀၀ ဒကေဝ်ပြၚ်၊ ကကသဴမွဲပဿာ ၃၅,၀၀၀ ဒကေဝ်၊ ၚုဲမွဲပဿာ ဒဵုကဵု ၄၀,၀၀၀ ဒကေဝ်ပြၚ်၊ ကအဟံက်၊ ကပၠေၚ်ပုၚ်တံ နူကဵု ၁၅၀၀၀ စိုပ်ဒဵုကဵု ၃၀၀၀၀ ဒကေဝ် ၚုဟ်မးသၠုၚ်တိုန်အာဟဂှ်ရ။
ပရေၚ်ၚုဟ်ကတံ ဂွံသၠုၚ်တိုန်အာဗီုဏံဂှ် ဟိုတ်နူရာန်ကၠေၚ်စက်ဟွံဂွံ၊ ဒးရာန်ကေတ်မံၚ် နူကဵုဆေၚ်ဖျာဒမၠုတံကီု ဗွဲမဂၠိုၚ် ကတံလေဝ်အောန်မံၚ်ကီုရောၚ် တၠကမၠောန်ကမွဲတၠ ဟီုကဵုဌာန်ပရိုၚ် သြၚ်လောန်တိုၚ်မ်ရ။
“ပြသၞာအဓိကဂှ် ရာန်ကၠေၚ်စက်ဟွံဂွံပုဟ်၊ ၚုဟ်ကပေါတ်တံလေဝ်ဍၚ်တိုန်အာ၊ ဂၠုၚ်တံ ဟွံတိတ်ပုဟ်။ ဂၠုၚ်တိတ်ဂှ် နွံညိညကီု၊ ကၠေၚ်ဂှ် ဍေံတံဟွံသွံကဵုစေဝ်ပုဟ်။ ဒးရာန်ကေတ်မံၚ် နူကဵုဆေၚ်ဖျာဒမၠုတံၚုဟ်ဍၚ်ၚ်တုဲ တိတ်အာဂၠုၚ်က။ ဗီုဏံရ ကတံလေဝ် အောန်ကွေံကွေံ” သာ်ဝွံ သ္ဂးရ။
တုဲပၠန် ပြဟ်ဟ်ဏံ အလဵုအသဳတံ ပရေၚ်ထိၚ်ဒဝ်သယံဇာတက ဗီုကဵုအလဵုအသဳကၠာတေံဟွံသေၚ်တုဲ ရပ်ဂွံက အောန်စှ်ေအာ ဗွဲမလောန်၊ ကသွက်ပလံၚ်ဍုၚ်သ္အာၚ်တံလေဝ် ရပ်ဂွံအောန်ကၠုၚ်မံၚ်ဂှ် ညးဆက်ဟီုရ။
တုဲကၠုၚ် အပ္ဍဲလက်ထက်အလဵုအသဳ NLD တေံ သွက်ဂွံထိၚ်ပရေၚ်သယံဇာကတံမ္ဂး အခိၚ် ကတိုန်အပါ ယဝ်ရရပ်ကမ္ဂးတှ်ေ ပရေၚ်ရပ်စပ်ကေတ်အရေဝ်တံနွံတုဲ ဇာနှိက်ပသဲဟွံလုပ်သၞောဝ်တံဂှ်လေဝ် ဗက်ရပ်စပ်ကေတ်အာအရေဝ်နွံရ။
ဆဂး စိုပ်ပ္ဍဲလက်ထက် အလဵုအသဳပၞာန်ဏံ ထ္ၜးလဝ်ဟိုတ် နကဵုပရေၚ်ဂီုကၠီုတုဲ ပရေၚ်ထိၚ်ဒဝ်သယံဇာတ ကတံလေဝ်ဟွံမွဲကီု ပရေၚ်ရပ်က ဟွံလုပ်သၞောဝ်တံလေဝ် ကေတ်ကၠုၚ်အရေဝ် ဟွံမွဲကီုပုဟ်။
ဟိုတ်နူၚုဟ်က ဍၚ်လောန်အာဂှ်ရ စိုပ်မံၚ်အကာဲအရာ ရာန်စကဟွံမာန်ရဂှ် ညးဗြဴပါၚ်ဖဴမွဲတၠ ဟီုကဵုဌာန်ပရိုၚ် သြၚ်လောန်တိုၚ်မ်ရ။
ပရေၚ်ၚုဟ်မးကတံ ကၠာအခိၚ်ဟွံသီအဝဵုတေံ တန်တဴကဵု ဂကူကနာနာသာ်တုဲ မွဲပဿာ နူကဵု ၃၅၀၀ ဒဵုကဵုပွဳပွူ ၈၀၀၀ ဒကဝ် ဟေၚ်နွံကၠုၚ်ကီုလေဝ် ဒပ်ပၞာန်သီအဝဵုတုဲ ၚုဟ်ကသၠုၚ်တိုန်အာ နူကဵုမသုန်ဆ စဵုကဵုဒစာံဆ တိုန်အာရ။
အပ္ဍဲကဵုတွဵုရးမန် ဂၠုၚ်ရပ်ကၜဳဇၞော်ကဵု အကြာဇိုၚ်သြၚ် ၃၀၀၀ ပြၚ် နွံတုဲ ကရပ်ဂွံတံမ္ဂး ပလံၚ်ဗစိုပ်ကဵုမံၚ် ဍုၚ်ကြုက်ကဵု ဍုၚ်သအာၚ်တၞဟ်ဟ်တံတုဲ ပရေၚ်ကမၠောန်ကဝွံ ဒှ်ပရေၚ်ကမၠောန် မရနုက်ကဵု အဆံၚ်တတိယ မဒှ်ရ၊
ပရိုၚ်-သြၚ်လောန်တိုၚ်မ်
Photo – CJ